“Munu mebandaka kuvingila yau banda bamvula 19!” Yinki yina mpangi na beto vuandaka kuvingila? Biblia—Mbangudulu ya Yinza ya Yimpa ya Masonukua ya Greki ya Buklisto na Bengali yina kele ndinga na yandi. Bantu mingi ketubaka kaka mutindu yina kana Biblia—Mbangudulu ya Yinza ya Yimpa mebima na ndinga na bau. Kasi nge mekukiyuvusaka kana yinki mambu yakelombaka samu na kubangula mpe kubimisa Bablia yango?

 Ya ntete, bakeponaka ekipi ya bambangudi mpe Komite ya Kusonika ya Kimvuka ya Ntuadisi nde ketuadisaka yau. Yakelombaka ntangu yikua na ekipi samu na kumanisa kubangula Biblia? Nicholas Ahladis, yina kesalaka na biro ya bambangudi na Warwick, na New York, metuba ti: “Yakele na mambu mingi yina yakelombaka kutadila, kati na yau, bambangudi yikua kesala yau, ndinga yina bakena kubangudila kele mpasi mingi, bantu yina ketanga yau bamezaba mutindu mambu vuandaka salama na ntangu ya ntama, mpe ndinga yango ketubukaka mutindu mosi to ve na bisika nionso yina baketubaka yau. Mbala mingi, samu na kubangula kaka Masonukua ya Greki, yakelombaka mvula mosi to tatu mpe samu na kubangula Biblia ya mvimba, yakelombaka bamvula yiya to kuluta. Samu na kubangula na bandinga ya mababa, yakebakaka ntangu mingi diaka kuluta.”

 Yakesukaka kaka ve na kubaka bambangudi samu na kubangula Biblia. Yakelombaka diaka kubaka bampangi ya mutindu na mutindu, yina kevuandaka na bisika ya mutindu na mutindu yina ketubaka ndinga yango na buala yango, samu na kutanga mambu yina mebangulua, mpe bakesala yau ofele. Makanisi yina bakepesa kesadisa bambangudi babimisa Biblia yina mesonama na sikisiki, puelele, mpe yina bantu kebakusa . Mpangi mosi ya Afrique du Sud yina kepesaka bambangudi ya Biblia formasion metuba ti: “Bambangudi kemonaka ti kubangula Biblia kele kiyekua ya nene na meso ya Yehova mpe na meso ya bantu yina ketanga yau.”

 Kana bamemanisa kubangula, Babiblia yango fueti bimisama (imprimer) mpe kukangikisa yau. Samu na kusala yau, bakesadilaka bima kuluta 10 na imprimeri: Papie, encre, kuvertire, kole, kuvertire ya kukangila, papie ya kulere ya palata, ruban, bande, bima yina kesala ti yavuanda ngolo na manima, mpe bima ya kufuka yau samu yasangana mbote. Na 2019, badolare kuluta milion 20 bimaka kaka samu na kusumba bima yango. Bampangi yina kesalaka na ba imprimeri na beto, basalaka bawola kuluta 300 000 na mvula yango kaka samu na kubimisa Babiblia mpe kutinda yau.

 Samu na yinki kulutisa bawola mingi mpe kubimisa mbongo mingi playi samu na bisalu yango? Mpangi Joel Blue yina kesalaka na departema ya imprimeri samu na yinza ya mvimba metuba: “Biblia kele mukanda ya mfunu mingi kuluta mikanda nionso yina beto kebimisaka. Yau yina, beto zola ti mutindu yina yakemonana na meso ya bantu yapesa Nzambi yina beto kesambilaka nkembo, mpe yakumisa nsangu yina beto kesamunaka.”

 Katula Biblia—Mbangudulu ya Yinza ya Yimpa yina beto nionso kevuandaka na yau, beto kebimisaka diaka Babiblia samu na bantu yina kele na mikakatano. Na kifuani, Biblia—Mbangudulu ya Yinza ya Yimpa samu na bantu yina meso mekufuaka, tokebimisaka yau na bandinga 10. Yalenda lomba bawola 8 samu na kusonika Biblia ya mvimba na masonukua ya bantu yina meso mekufuaka, mpe yakelombaka kisika yina kele na nene ya bametre 2,3 samu bavolime na yau fuana. Beto kebimisaka diaka Babiblia ya mutindu yankaka mpenza samu na bantu yina kele na buloko kisika yina kaka mikanda yina kele na bakuvertire ve nde lenda kota.

 Biblia—Mbangudulu ya Yinza ya Yimpa kena kusoba luzingu ya bantu yina kena kutanga yau. Beto baka kifuani ya kimvuka mosi ya ndinga Kiluba, yina kele na buala mosi bakebokidilaka Tombe na République Démocratique du Congo. Nzila yina kekatukaka na Tombe samu na kukuma na Kinshasa kele na bakilometre 1 700. Bambangi ya Yehova yina kele kuna, bavuandaka na Biblia kaka mosi mpe Biblia yango sonamaka na ndinga ya Kiluba ya ntubulu ya ntama. Mpe Biblia yango vuandaka luta na mpangi mosimosi samu na kubongisa lukutakanu. Kasi, kubanda na ngonda ya Août 2018, kimvuka ya mvimba babakaka muntu na muntu Biblia—Mbangudulu ya Yinza ya Yimpa ya Kiluba na ntubulu ya bubu yayi.

 Mpangi mosi ya nketo yina ketubaka ndinga ya Allemand metuba samu na Biblia—Mbangudulu ya Yinza ya Yimpa yina bamebongisa diaka na ndinga na bau ti: “Munu ketubaka diaka ve ti mufueti tanga Biblia. Kasi, munu kekukiyuvusaka nde ‘Yinki ntangu mulenda tanga diaka mingi?’” Muntu mosi ya buloko sonikaka ti: “Bapesaka munu Biblia—Mbangudulu ya Yinza ya Yimpa, mpe yasobaka luzingu na munu. Munu ntekaka bakusa ntete Mpova ya Nzambi mutindu yayi ve tekila mubanda kutanga mbangudulu yayi. Muzola muzaba mbote mpenza mambu metadila Bambangi ya Yehova mpe mambu mufueti sala samu munu diaka mukuma Mbangi ya Yehova.”

 Bantu nionso yina ketangaka Biblia—Mbangudulu ya Yinza ya Yimpa bakena kupesa matondo samu na makabu yina kena kusimba kisalu ya kubimisa Babiblia yango. Makabu samu na kisalu ya kusamuna na yinza ya mvimba kepesamaka mbala mingi na nzila ya donate.mt1130.com. Matondo mingi samu na kikadulu na beno ya kukaba.