•   Nge kesepelaka kusala mambu na kintulumukina; kasi nkuelani na nge kesepelaka kusala mambu nionso na programe.

•   Nge ketubaka mingi ve mpe nge kevuandaka nsoninsoni; kasi nkuelani na nge kezolaka kuvuanda kintuadi na bantu yankaka.

 Nkuelani na nge kele na mua bikadulu yina kepesaka nge nganzi? Kana nge kena kutula makanisi kaka na mua bikadulu yango, yalenda bebisa dikuela na beno. Na yau, Biblia metuba ti “muntu yina kena kutatamana kaka kutuba diambu kekabulaka bankundi ya ntima.”​—Masese 17:9.

 Na kisika nge bika mua bikadulu yango ya nkuelani na nge bimisa kuzonza na dikuela na beno, nge lenda tadila mua bikadulu yango na mutindu yankaka to na mutindu yina mebonga.

Na disolo yayi, beto ketubila:

•  Mutindu ya mbote ya kutadila mua bikadulu ya nkuelani na nge yina kefuemisaka nge

•  Mambu yina bankuelani yankaka metuba

•  Biuvu yina kesadisa nge

 Kikadulu mosi ya nkuelani na nge yina kefuemisaka nge lenda vuanda kikadulu ya mbote yina tindaka nge nge zola yandi. Beto tadila bifuani tatu:

 “Mbala mingi bakala na munu kesalaka mambu malembemalembe to yandi kebongamaka malembemalembe samu na kubima. Kasi kikadulu yango kesalaka ti yandi vuanda ntima yinda, ata na munu. Na bantangu yankaka mutindu na yandi ya kusadila mambu kefuemisaka munu, kasi na bantangu yankaka munu kesepelaka kumona kikadulu yango na yandi.”​—Chelsea.

 “Nketo na munu kelandelaka mambu nionso ya fiotifioti; yandi kevuandaka na nsatu ya kuzaba kana mambu nionso kena kutambula mbote, kikadulu ya mutindu yina lenda pesa muntu nganzi. Kasi kikadulu na yandi ya kulandela mambu ya fiotifioti kesalaka ti yandi sala ve mambu kondua ti yandi kukibongisa.”​—Christopher.

 “Na bantangu yankaka bakala na munu kekipeke mambu ve, mpe yakepesaka munu nganzi. Kasi, mutindu na yandi yina ya kusadila mambu kele mosi ya bikadulu yina munu kesepelaka kumona na yandi. Munu kesepelaka na kikadulu na yandi ya kuvuanda niee ntangu mikakatano mebima.”​—Danielle.

 Mutindu Chelsea, Christopher, mpe Danielle bakusaka yau: Mambu ya mbote mpe bulembu ya nkuelani mosi kevuandaka mbala mingi na kati ya kikadulu mosi. Na yau, nge lenda katula ve bulembu mosi kondua ti nge katula mambu ya mbote yina bulembu yango kebimisaka, mutindu mosi mpe nge lenda katula ve ndambu mosi ya mbongo ya kisengo.

 Ya kedika, bulembu yankaka kevuandaka ve na mambu ya mbote. Na kifuani, Biblia metuba ti bantu yankaka kevuandaka “nganzinganzi.” (Masese 29:22) Na yau, muntu nionso fueti sala bangolo samu na kukatula “mambu nionso ya ndudi, nganzi, nganzi ya ngolo, kuganga mpe bampova ya kufinga, yavuanda mpe mambu nionso yina keluadisaka.” a​—Baefese 4:31.

 Kasi ata kana nkuelani na nge kele na mua bikadulu yina kepesaka nge nganzi, landa dilongi yayi ya Biblia: “Beno tatamana kukanga ntima na mambu ya bantu yankaka . . . ata muntu mosi kele na mambu na muntu yankaka.”​—Bakolose 3:13.

 Katula yau, sosa kutadila mua bikadulu yango na mutindu yina mebonga. Mbala yankaka kikadulu yango nde tindaka nge nge zola nkuelani na nge na ebandeli. Bakala mosi na nkumbu ya Joseph metuba: “Kutula makanisi kaka na mua bikadulu yina kepesaka nge nganzi, kele lokola kutula dikebi kaka na nsongi ya diama yina keluadisaka kasi nge kena kusepela ve na mutindu yakena kulezima.”

 Ntetentete, mosimosi kati na beno lenda tadila biuvu yayi melanda. Na manima beno tubila bamvutu na beno kintuadi.

•   Nge mekanisa ti nkuelani na nge kele na mua kikadulu yina kena kubimisa kubendana na dikuela na beno? Kana yakele mutindu yina, yinki kele kikadulu yango?

•   Kikadulu yango kele mpenza yimbi, to yakefuemisaka nge kaka?

•   Kikadulu yango kele na mambu ya mbote? Kana yakele mutindu yina, yinki kele mambu yango, mpe samu na yinki kikadulu yango kele na mfunu na kimuntu ya nkuelani na nge?