Nga wayangalele tanga malongi mavaikiswa mu mvu wau muna Eyingidilu? Avo i wau, olenda vana e mvutu za yuvu ilende:

Nkia mbandu Yave kasikidisa muna mpila yakadila ye akento?

Yave ke sianga mpambula ko muna mpila kekadilanga ye akento, ke songanga ko vo akala basundidi akento. Nzambi owanga e sambu y’akento. Ovuanga ngindu zau o mfunu ye ntokani zau. Yave okalanga ye vuvu vo balenda sala e salu kiandi.—w24.01, luk. 15-16.

Aweyi tulenda sadila e sono kia Efeso 5:7 kivovanga vo: “Ke nukadi yau ntwadi ko”?

Paulu wa ntumwa watulukisa vo twalembi kalanga entwadi yo wantu ana balenda kutufila mu yambula lemvokela nkanikinu mia Nzambi. Tulenda kala entwadi ye wantu awaya muna viokesanga yau e ntangwa va fulu kimosi yovo muna mokenanga yau muna internete yovo muna telefone.—w24.03, luk. 22-23.

Mu nkia nsangu zaluvunu tufwete kuyikebelanga?

Tufwete kebanga mu kuma kia nsangu zitukanga kwa mpangi zeto zina ke batomene fimpa ko kana vo zaludi yovo ve. Tufwete keba mpe mu kuma kia email ina tulembele zaya kuna itukidi ye nsangu za avengomoki ana bevunanga vo bena ye tima dia wa e nsangu zeto.—w24.04, luk. 12.

Nkia mambu tuzeye ye nkia mambu ke tuzeye ko mu kuma kia una Yave kafundisila Solomo, wantu ana bafwaswa muna Sodoma ye Ngomora ye awana bafwaswa muna Kizalu?

Ke tuzeye ko kana vo Yave lufwasu lwakwele mvu kabazengela. Kansi, tuzeye wo vo Yave ozeye mawonso mavangama ye nkwa nkenda kikilu.—w24.05, luk. 3-4.

Ozaya vo Nzambi i “Tadi” nkia lusikidisu dikutuvananga? (Nsi. 32:4)

Dikutusikidisanga vo tulenda kitula Yave se tininu dieto. Yave nkwa kwikizi ye ntangwa zawonso olungisanga e nsilu miandi. Yave ke sobanga ko, e kiwuntu kiandi ye kani diandi mpe ke disobanga ko.—w24.06 luk. 26-28.

Aweyi olenda kulukilwa e nkutakani yampa?

Bunda e vuvu kwa Yave ona okusadisa nze una kasadisila selo yandi kuna nz’ankulu. Venga e fu kia tezanesa nkutakani ina watuka ye nkutakani yampa. Kuyambula salu ya kimwanda ko muna nkutakani aku yampa ye vanga e ngolo kimana wakala ye akundi ampa.—w24.07, luk. 26-28.

Nkia mambu tulenda longoka muna yingana tatu ina muna Matai kapu kia 25?

E kingana kia mameme ye nkombo kiyikanga o mfunu wakala yo lukwikilu yo songa kwikizi. E kingana kia mienze mia lungalala ye mienze mia mazowa, kisonganga o mfunu wakala twakubama yo lungalala. E kingana kia talanta, kisonganga o mfunu wa sala ye fululu kiawonso yo vanga mawonso tulenda.—w24.09, luk. 20-24.

E veta kia tempelo a Solomo meta kwa kiakala?

Muna 2 Tusansu 3:4, e nsekola zankaka zivovanga vo veta “yinkoso 120” kiakala, i sia vo, meta 53. Kansi, e sono yankaka ivovanga vo o lambuka kwandi yinkoso 20 yovo tezo kia meta 9. E meta zazi nanga zafwanana ye nkandu wa yaka ya tempelo.—w24.10, luk. 31.

Okala “yakala dia nkento mosi,” aweyi disongele kwa selo kia salu? (1 Tim. 3:12)

Disongele vo kafwete sompana kaka yo nkento mosi ye kalendi kuyivana mu mavangu ma zumba ko. Kuna diak’e sambu, kafwete lengokelanga akento akaka moyo ko.—w24.11, luk. 19.

Ekuma tulenda vovela vo e sono kia Yoane 6:53 ke kiasikidisa mpila yavangila Nlekelo a Mfumu ko?

E sono kia Yoane 6:53 kivovelanga o mfunu wa dia e nitu a Yesu yo nua menga mandi. Muna mvu wa 32 wa tandu kieto, Yesu wavova e mvovo miami kwa Ayuda kuna Ngalili ana bavavanga songa lukwikilu muna yandi. Kansi, o Nlekelo wa Mfumu wasikidiswa muna mvu walanda kuna Yerusaleme. Okwakuna, Yesu awana beyala yandi kuna zulu kavovesa.—w24.12, luk. 10-11