LONGI DIA 21
NKUNGA WA 107 Mbandu a Zola kwa Nzambi
Aweyi Olenda Sololwela Muntu Ambote Muna Kazala Yandi?
“O nkento angangu, nani olenda kunsolola? E ntalu andi ilutidi kikilu makolado.”—NGA. 31:10.
DIAMBU DIASINA TULONGOKA
Tulongoka nkanikinu mia Bibila milenda sadisa muntu ozolele kazala mu solola muntu ambote kalenda kazala yandi ye una akaka muna nkutakani balenda sadisila ampumpa ana bazolele kazala.
1-2. (a) Akristu ana bena vo ampumpa, nkia mambu bafwete yindula vitila bayantika vava makangu? (b) Nki i “kimakangu”? (Tala “Mvovo Misasilu.”)
NGA ozolele kazala? Kana una vo o longo ke nsabi ko kwa muntu muna kala ye kiese, Akristu ayingi ana bena vo ampumpa, kiakala ambuta yovo matoko ye ndumba, bevingilanga vo basolola muntu ambote balenda kazala yandi. Kansi, vitila wayantika vava makangu, ofwete teka kubama, i sia vo, ofwete kumika e ngwizani aku yo Yave, ofwete toma kuyizaya ye ofwete kala ye nzimbu zivavua muna lukazalu. a (1 Kor. 7:36) Avo olungisi mambu mama mawonso, ka lukatikisu ko vo okala ye longo lwakiese.
2 Kansi, ezak’e ntangwa diampasi dikalanga mu solola muntu ona okala se nkento ambote yovo yakala diambote muna longo. (Nga. 31:10) Kana nkutu osolwele muntu ozolele toma zaya, ke diasazu ko muna yantika kimakangu. b Mu longi diadi, tulongoka mana malenda sadisa Akristu ana bena vo ampumpa mu solola muntu ambote yo yantika kimakangu. Tulongoka mpe una akaka muna nkutakani balenda sadisila awana bazolele kazala.
AWEYI OLENDA SOLOLWELA MUNTU AMBOTE MUNA KAZALA YANDI?
3. Nkia mambu kafwete badika o Nkristu wampumpa ona ovavanga muntu kalenda kazala yandi?
3 Avo ozolele kazala, vitila wayantika banda kimakangu, diambote wateka zaya e fu ina ozolele vo muntu ona okazala yandi kakala yau. Avo ke wau ko, olenda yantika zola yovo banda kimakangu yo muntu una vo ke kala yakala yovo nkento ambote ko kuna kwa ngeye. Kansi, o muntu ona osola muna banda yandi kimakangu, kafwete kala Nkristu wavubwa. (1 Kor. 7:39) Dialudi vo, okala Nkristu wavubwa ke disongele ko vo yakala diambote yovo nkento ambote kekala kuna kwa ngeye. Muna diadi, diambote wakiyuvula: ‘Ameyi i makani mame muna zingu? Nkia fu isundidi o mfunu kafwete kala yau o muntu ona ikazala yandi? Nga e mambu ivavanga ke maviokele tezo ko?’
4. Nkia mambu akaka belombanga muna sambu yau?
4 Kieleka, avo ozolele kazala, ofwete lombanga diambu diadi muna sambu yaku. (Fili. 4:6) Dialudi vo, Yave ke sianga nsilu ko vo ovavila muntu yakala yovo nkento ona kekazala yandi. Kansi, wau vo otokanenanga e wete diaku, olenda kusadisa mu solola muntu ambote. Muna kuma kiaki, kwamanana kunzayisa e ngindu zaku ye nsatu zaku. (Nku. 62:8) Lombanga ngangu yo luzindalalu muna sambu. (Yak. 1:5) Mpangi John, c una vo mpumpa kuna Estados Unidos wayika mambu kelombanga muna sambu yandi, wavova vo: “Izayisanga kwa Yave e fu ina nzolele vo kakala yau o nkento ona ivavanga. Ilombanga kwa Yave kampana e lau diawanana yo nkento ona ndenda kazala yandi. Ikunlombanga mpe kimana kansadisa yayima e fu ina ikunkitula se yakala diambote.” Mpangi ankento Tanya ozingilanga kuna Sri Lanka, wavova vo: “Ekolo yavavanga yakala diambote, yalombanga kwa Yave kansadisa kimana yasikila ye kwikizi, yakalanga ye kiese ye ngindu zasikila.” Kana nkutu vo yamu wau kusolwele muntu ambote ko ona olenda kazala yandi, Yave osianga nsilu vo okwamanana kusadisa tuka muna kinitu yamuna kimwanda.—Nku. 55:22.
5. Aweyi Akristu ampumpa balenda kadila ye lau dia wanana ye akwau ampumpa ana besadilanga Yave? (1 Korinto 15:58) (Tala mpe e mafoto.)
5 E Bibila kikutukasakesanga ‘twawokesa kaka e salu kia Mfumu.’ (Tanga 1 Korinto 15:58.) Avo ukivene emvimba muna salu kia Yave yo kalanga entwadi ye mpangi zaswaswana, dikuvana e lau mu kala ye akundi ambote. Vana ntandu, okala mpe ye lau dia wanana ye mpangi zankaka zampumpa ana besianga e salu kia Yave va fulu kiantete. Avo ovangidi mawonso olenda muna yangidika Yave, okala ye kiese kiakieleka.
Avo ukivene emvimba muna salu kia Yave yo kalanga kumosi ye mpangi zaswaswana, olenda wanana ye mpangi zankaka ana bena mpe ye nsatu za sompa (Tala e tini kia 5)
6. Akristu ana bena vo ampumpa, adieyi bafwete sungamena ekolo bevavanga muntu ona bekazala yandi?
6 Kansi, keba kimana ovava muntu ona olenda kazaya yandi dialembi kituka se diambu disundidi o mfunu muna zingu kiaku. (Fili. 1:10) Okala ye ngwizani ambote yo Yave i diambu ditwasanga kiese kiakieleka, kansi ke lukazalu ko. (Mat. 5:3) Ekolo wakinu mpumpa, ovuidi luvevoko lwa wokesa uselo waku. (1 Kor. 7:32, 33) Toma sadilanga e ntangw’aku. Mpangi ankento Jessica kuna Estados Unidos, ona wakazala vava kakala ye tezo kia mvu 40, wavova vo: “Yakivananga emvimba muna salu kia umbangi, ediadi diansadisa mu kala ye kiese ekolo yavingilanga mpangi ayakala olenda kazala yame.”
VAULA E NTANGWA MUNA TOMA KUNZAYA
7. Ekuma dinina dia ngangu mu vaula e ntangwa mu toma zaya o muntu vitila wamvovesa? (Ngana 13:16)
7 Adieyi ovanga avo oyantikidi yindula vo mpangi kingandi wafwana kwandi mu kazala yaku? Nga ofwete kumvovesa vana vau? E Bibila kivovanga vo o nkwa ngangu oteka vuanga e nzayilu vitila kavanga e diambu. (Tanga Ngana 13:16.) Muna kuma kiaki, dia ngangu mu vaula e ntangwa muna toma kunzaya vitila wamvovesa. Mpangi ankento Aschwin wa musi Holanda wavova vo: “E ngindu muna ntima nzaki zikwizanga ye nzaki zivilanga. Dianu vo, ovaula e ntangwa mu toma zaya o muntu, dikusadisa mu lembi yantika kimakangu mu kuma kia zaka-zaka.” Vana ntandu, avo ovawidi e ntangwa muna toma zaya o muntu, nanga obakula vo ke kala yakala yovo nkento ambote ko kwa ngeye.
8. O mpumpa aweyi kalenda zayila muntu ona kalenda kazala yandi? (Tala mpe e mafoto.)
8 Aweyi olenda toma zayila muntu ankaka kuna nsweki? Muna tukutakanu yovo muna nkinzi olenda bakula kimwanda kiandi, kiwuntu kiandi ye fu yandi. Aki nani i akundi andi? Nkia mambu kezolanga mokenena? (Luka 6:45) E makani mandi mafwanana ye maku? Olenda yuvula mpe kwa akuluntu a nkutakani andi yovo kwa Akristu akaka azikuka ana batomene kunzaya. (Nga. 20:18) Olenda yuvula kana vo mpangi ndiona una ye fu yambote ye nkumbu ambote. (Rute 2:11) Ekolo ovavanga kunzaya kuna nsweki, keba walembi kumfusulwisa e nsoni. Zitisa e ngindu zandi, kiwuntu kiandi ye venga fu kia kalanga yandi fini-fini.
Vitila wavova kwa muntu vo zola okunzolanga, vava kunzaya kuna sweki mu fikolo (Tala e tini kia 7-8)
9. Vitila wenda mokena yo muntu ona omwene vo wafwana kwandi kwa ngeye, nkia ziku ofwete kala kiau?
9 Nga ofwete viokesa kolo kiayingi muna toma zaya o muntu vitila wamvovesa vo ongeye zola okunzolanga? Avo kuviokese ntangwa yafwana ko, o muntu olenda vova vo kutomene yindula ko muna baka e nzengo zazi. (Nga. 29:20) Kuna diaka e sambu, avo oviokese kolo kiayingi lembi vova, musungula avo muntu obakwidi wo, kalenda yindula vo ongeye fu kia lukatikisu una kiau. (Kim. 11:4) Zaya wo vo, vitila wenda mokena yo muntu, ke difwete vava ko vo wakala ye ziku vo kazala kikilu okazala yandi. Kansi, ofwete kala ye ziku vo ongeye wakubama wina muna kazala, o muntu ndioyo wafwana kwandi kwa ngeye mu kala nkaz’aku.
10. Adieyi ofwete vanga avo obakwidi vo mpangi kingandi zola kekuzolanga, kansi ongeye kuzolele ko?
10 Adieyi ovanga avo obakwidi vo mpangi kingandi zola kekuzolanga? Avo kuzolele banda yandi kimakangu ko, toma dio songa muna mavangu maku. Ke diambote ko mu fila muntu ankaka kayindula vo okala ye lau dia banda yaku kimakangu, kinga nkatu kwandi.—1 Kor. 10:24; Efe. 4:25.
11. Avo mpangi ulombele vo wamvavila makangu, nkia mambu ofwete sungamena?
11 Muna nsi zankaka, mase yovo ambuta balenda solela mpumpa makangu. Muna nsi zankaka mpe, e yitu yovo akundi balenda sola mwan’a ndumba yovo mwan’a toko una vo mpumpa yo vanga e nkubika kimana bawanana mu zaya kana vo balenda wizana yo banda kimakangu. Avo mpangi ulombele vo wamvavila makangu, toma badika mana yau awole bezolanga yo yangalela. Avo omwene vo mpangi wafwana mu kazala yo nkundi aku yovo yitu kiaku, vanga e ngolo mu toma kunzaya, toma zaya fu yandi, musungula kimwanda kiandi. E diambu disundidi o mfunu kwa muntu i ngwizani andi ambote yo Yave, kansi ke nzimbu ko, yovo tezo kia sikola katanga, ngatu fulu kina kasansukila. Vana ntandu, sungamena wo vo e nzengo zansuka za sompana i mbebe ya mwan’a ndumba yo mwan’a toko.—Ngal. 6:5.
AWEYI OLENDA YANTIKILA BANDILA KIMAKANGU?
12. Avo ozolele banda kimakangu yo muntu, aweyi olenda kumvovesela?
12 Avo ozolele yantika banda kimakangu yo muntu, aweyi olenda kumvovesela? d Vanga e programa kimana wamokena yandi, nulenda mokenena va fulu kia ndonga yovo muna telefone. Toma kiesesa vo zola okunzolanga ye ozolele toma kunzaya. (1 Kor. 14:9) Avo divuilu o mfunu, umvana e ntangwa katoma yindula vitila kavana e mvutu. (Nga. 15:28) Avo kazolele banda yaku kimakangu ko, zitisa e ngindu zandi.
13. Adieyi ofwete vanga avo muntu uvovese vo zola kekuzolanga ye ozolele banda yaku kimakangu? (Kolosai 4:6)
13 Adieyi ovanga avo muntu uvovese vo zola kekuzolanga ye ozolele banda yaku kimakangu? Kalukatikisu ko vo unkabu kasongele muna mokena yaku. Muna diadi, umvovesela kuna ngemba yo luzitu. (Tanga Kolosai 4:6.) Avo ntangwa ovua mfunu muna toma yindula, umvovesa wo. Kansi, kuzingila kolo kianda ko muna kumvana e mvutu. (Nga. 13:12) Avo kuzolele ko, umvovesela kuna luzitu ye mu mvovo miakia. Tala e mvutu kavana mpangi Hans wa musi Áustria vava mpangi mosi ankento kanlomba vo babanda kimakangu: “Yasadila e ndekwa ye mvovo miatoma kia muna kunzayisa e nzengo zame. Yavanga wo vana vau muna lembi kumvana e vuvu kia nkatu. Tuka muna lumbu kiakina, yatoma kebanga muna lembi vova yovo vanga diambu diadi kumfila mu yindula vo e ngindu zame zisobele.” Kansi, avo ngeye mpe ozolele toma kunzaya, umvovesa dio, numokenena una nulenda lungisila mawonso mevavuanga muna kimakangu. Mu kuma kia fu ya kisi nsi ya konso muntu yovo mambu mankaka, nulenda kala ye ngindu zaswaswana muna diambu diadi.
AWEYI AKAKA MUNA NKUTAKANI BALENDA SADISILA AKRISTU AMPUMPA?
14. Aweyi tulenda sadisila Akristu ampumpa muna mvovo mieto?
14 Yeto awonso aweyi tulenda sadisila Akristu ampumpa ana bazolele kazala? I mosi muna mpila tulenda kubasadisila i toma keba muna mana tuvova. (Efe. 4:29) Tulenda kukiyuvula: ‘Nga iyangumunanga etima dia awana bazolele kazala? Avo mbwene mpangi ayakala wampumpa omokenanga yo mpangi ankento wampumpa, nga vana vau iyindulanga vo nzolani a kimakangu bena yau?’ (1 Tim. 5:13) Vana ntandu, ke tufwete vova ko ngatu vanga diambu dilenda fila Akristu ampumpa mu yindula vo diambu bevidisanga wau vo ke basompa ko. Mpangi Hans ona tuyikidi kala wavova vo: “Mpangi zankaka beyuvulanga vo: ‘Ekuma kwa sompele ko? Ongeye ku mwan’akete diaka ko.’ E mvovo miami milenda fila ampumpa mu yindula vo ke bena mfunu ko yo wokesa etima diau dia sompa.” Diambote twavavanga konso lau mu sanisina Akristu ampumpa.—1 Tes. 5:11.
15. (a) Landila nkanikinu wasonama muna Roma 15:2, adieyi tufwete badika vitila twasadisa mpumpa kimana kasolola muntu kalenda kazala yandi? (Tala mpe e foto.) (b) Nkia diambu diamfunu olongokele muna video? (Tala e mvovo vana yand’a lukaya.)
15 Adieyi tulenda vanga avo tumwene vo mpangi kingandi yakala diambote yovo nkento ambote kekala? E Bibila kikutuvovesanga vo twatokanenanga e wete dia akaka. (Tanga Roma 15:2.) Mpangi zayingi bena vo ampumpa ke bezolanga ko vo akaka babasunzula kwa muntu ona balenda kazala yandi. Tufwete zitisanga e ngindu zau. (2 Tes. 3:11) Akaka balenda yangalela lusadisu lweto muna solola muntu balenda kazala yandi, kansi avo ke balombele lusadisu ko, ke tufwete wo vanga ko. e (Nga. 3:27) Mpumpa zankaka bevavanga vo bavewa lusadisu lwalu kuna ndekwa. Mpangi ankento Lydia wa musi Alemanha una vo mpumpa, wavova vo: “Olenda bokelesa mpangi za matoko ye ndumba baviokesela e ntangwa va fulu kimosi. Muna mpila yayi, okubavana e lau kimana bazayana yo yambula mana masidi vana moko mau.”
Okwenda mu nkinzi divananga e lau kwa Akristu bena vo ampumpa mu zayana (Tala e tini kia 15)
16. Adieyi bafwete sungamenanga Akristu bena vo ampumpa?
16 Diakala ampumpa yovo awana bakazala, yeto awonso tulenda kala ye zingu kiakiese. (Nku. 128:1) Avo ozolele kazala, kansi yamu wau kusolwele ntete muntu ko, kwamanana sia e salu kia Yave va fulu kiantete. Mpangi ankento Sin Yi wa musi Macau wavova vo: “Avo oyindwidi e ntangwa ina okala yo nkaz’aku muna Paradiso, e ntangwa yayi una se mpumpa yankufi kikilu. Toma yangalelanga e ntangwa yayi ye sadila yo una ufwene.” Kansi, adieyi tuvova avo wasolwele kala muntu ambote ona olenda kazala yandi ye nuayantikidi kala kimakangu? E longi dilanda, divovela una olenda bandila kimakangu kitwasa nkembo kwa Yave.
NKUNGA WA 137 Akento a Kwikizi
a Muna zaya kana vo wakubama wina muna kazala, tala e longi, Namoro — Parte 1: “Será que estou pronto para namorar?” muna jw.org.
b MVOVO MISASILU: E “kimakangu” tuvovele mu longi diadi ye dina dilanda, i ntangwa ina yakala yo nkento betoma mokenanga muna zaya kana vo konso muntu muna yau, yakala diambote yovo nkento ambote kekala muna longo. Muna nsi zankaka, e kimakangu i mvukana za yakala yo nkento ana bezolananga. E kimakangu kiyantikanga vava yakala yo nkento bevovanga kwa muntu yo nkwandi vo zolana bezolananga ye kikwamanana yavana bebaka e nzengo za sompana yovo fokola kimakangu.
c Nkumbu zankaka zasobwa.
d Muna fu ya kisi nsi zankaka, mpangi ayakala ovovanga kwa mwan’a nkento muna yantika kimakangu. Kansi, ke diambi kwandi ko kwa mpangi ankento mu vovesa mpangi ayakala. (Rute 3:1-13) Muna zaya diaka mayingi, tala e longi, Os Jovens Perguntam . . . Como contar-lhe tudo o que sinto por ele? muna Sikama! dia 22 Okutoba, 2004.
e Tala e video, Awana Benuananga Vita mu Kuma kia Lukwikilu yo Sikila—Akristu Bena vo Ampumpa, muna jw.org.
