Mpangi Nicolas yo Céline nkakalakani zankaka bawanana zau. E vula dia França diabafila muna nkutakani yampa. Bavova vo: “Kuna lubantiku kiese kiayingi twakala kiau, kansi kuna kwalanda twayantika mona viangi kia akundi eto. Ke twakala ye akundi ayingi ko muna nkutakani yampa.” a Avo ozolele soba e nkutakani, aweyi olenda kadila ye kiese muna nkutakani yampa? Adieyi akaka balenda vanga muna sadisa awana besobanga e nkutakani? Nkia nsambu za kimwanda otambula? Aweyi olenda sadisila akaka muna nkutakani yampa?

MAMBU YÁ MALENDA KUSADISA MU KULUKILWA

1. Bunda Yave e vuvu. (Nku. 37:5) Mpangi ankento Kazumi kuna Japão, wakala mvu 20 muna nkutakani andi. I bosi nkaz’andi wabaka e salu mu mbanza yankaka ye diavavanga vo kasoba nkutakani. Aweyi ‘kayekekela e nzil’andi kwa Yave’? Wavova vo: “Nkumbu miayingi yasamba kwa Yave muna kunzayisa una yamonanga. Yabakama wonga, kinsona yo ntelamw’a moyo. Kansi, konso ntangwa yasambanga kwa Yave, wamvananga ngolo yavuanga o mfunu.”

Aweyi olenda toma kumikina e vuvu kwa Yave? Nze una nti uvuilanga maza o mfunu yo ntoto muna kula, o lukwikilu lweto mpe muna kumama lufwete dikilwanga. Mpangi Nicolas ona tutekele yika, muna kumika e vuvu kiandi muna lusadisu lwa Yave, wabadikanga mbandu ya wantu ana babembola mambu mayingi muna vanga luzolo lwa Nzambi, nze Abarayama, Yesu yo Paulu wa ntumwa. Okalanga ye longi dia ngeye kibeni ke dikusadisa kaka ko muna zizidila e mpasi za zingu, kansi dikusadisa mpe mu longoka mambu mayingi mana olenda sadila muna kasakesa akaka muna nkutakani yampa.

2. Venga e fu kia tezanesa mambu. (Kim. 7:10) Mpangi Jules vava kayaluka kuna Benin,  África yo kwenda zingila kuna Estados Unidos, wamona vo e fu ya kisi nsi yatoma swaswana. Wavova vo: “Yamonanga vo nga mfwete zayisanga o lusansu lwa zingu kiame kwa konso muntu yawanananga yandi.” Muna kuma kia nswaswani yayi ya fu ya kisi nsi, wayantika vavuka ampangi muna nkutakani. Kansi vava katoma zaya ampangi, e ngindu zandi zasoba. Wavova vo: “Owau ikwikilanga vo kiakala nkia fulu tuzingilanga ova nza, yeto awonso twafwanana, mpila yavovela kaka yaswaswana. E diambu disundidi o mfunu i tonda wantu wauna bena.” Muna kuma kiaki, ke dina mfunu ko mu tezanesanga e nkutakani ina twatuka ye nkutakani yampa. Mviti a nzila mosi una ye nkumbu Anne-Lise wavova vo: “Oyindula mana yasisa ke kiau ko i kuma yasobela e nkutakani. Yasoba e nkutakani muna zaya mambu mampa.”

Akuluntu mpe bafwete venga e fu kia tezanesanga e nkutakani yampa ye ina batuka. Kele vo ampangi muna nkutakani yampa mu mpila yankaka bevangilanga e mambu, ediadi ke disongele ko vo, vilwa bevanganga. Diambote mu teka zaya e mpila wantu bevangilanga mambu muna zunga, i bosi osonga e ngindu zaku. (Kim. 3:1, 7b) Diamfunu muna longela mpangi zeto muna mbandu eto ambote ke kubakomekena ko batanginina e ngindu zeto.—2 Kor. 1:24.

3. Kuyambula salu ya kimwanda ko. (Fili. 1:27) Oyaluka mambu mayingi ye ntangwa yayingi divavanga. Muna kuma kiaki, diambote tuka kuna lubantiku twalungananga muna tukutakanu, avo dilendakana muna Seka dia Kintinu ke mu videoconferencia ko. Avo ampangi muna nkutakani yampa ke bekutumonanga ko muna Seka dia Kintinu, aweyi balenda kutusadisila? Mpangi ankento Lucinda yo wan’andi wole amakento kuna África do Sul, bayaluka muna mbanz’a kete yo kwenda zingila muna mbanz’a nene. Mpangi Lucinda wavova vo: “Akundi ame bankasakesa kimana yavanga ngolo mu vanga kikundi ye ampangi muna nkutakani yampa. Twasalanga kumosi muna salu kia umbangi yo lungananga muna tukutakanu. Twavana mpe e nzo eto kimana ampangi bavangilanga tukutakanu twa mpaika mu salu kia umbangi.”

‘Osalanga entwadi’ ye ampangi muna nkutakani ampa, dikukasakesa yo kasakesa mpe ankaka. Akuluntu muna nkutakani yampa ya mpangi Anne-Lise ona tutekele yika, bankasakesa kimana kavaikanga mu salu kia umbangi ye mpangi zawonso muna nkutakani. Nkia nluta diatwasa? Wavova vo: “Ke vavioka kolo ko, yabakula vo ovanga ediadi diansadisa mu mona vo yayina i nkutakani ame.” Avo ukivene mpe muna velelesa e Seka dia Kintinu, osonga vo e nkutakani yampa i nkutakani aku. Okuyivana emvimba mu salu yayi yawonso, disadisa ampangi muna nkutakani mu kulukilwa yaku mu nzaki. Ongeye mpe okuyimwena vo u mosi muna kanda diadi dia kimwanda.

4. Vanga yikundi yampa. (2 Kor. 6:11-13) Ovuanga wantu o mfunu i mpila yambote yavangila yikundi yo wantu ankaka. Muna kuma kiaki, mokenanga ye ampangi kimana watoma kubazaya, lwakanga mu ntangwa yambote muna Seka dia  Kintinu ye kukadingi muntu antete ko mu vaika kuna mfoko a lukutakanu. Vanga e ngolo muna zayidila e nkumbu a konso mpangi. Avo ozayididi e nkumbu za mpangi yo kala nkwa ngemba, difila akaka muna kufinama ye diasazu dikala muna vanga yau e kikundi.

Vana fulu kia tokana kana vo ampangi batomene kutambula, yambula vo ampangi batoma zaya e kiwuntu kiaku. Vanga dina kavova mpangi Lucinda: “Tuna ye ngwizani ambote ye ampangi kadi yeto twateka kubabokela ku nzo eto.”

“NUTAMBULANGA MUNTU YO NKWANDI”

Akaka balenda mona wonga mu kota muna Seka dia Kintinu diazala ye wantu ana ke bazeye ko. Muna kuma kiaki, aweyi olenda sadisila wantu ampa ana bekwizanga muna seka dia Kintinu mu kulukilwa e nkutakani yampa? Paulu wa ntumwa wavova vo tufwete ‘tambulanga muntu yo nkwandi wauna Kristu katutambulwila.’ (Roma 15:7) Muna tanginina Yesu, akuluntu balenda sadisa wantu ampa muna nkutakani mu mona vo batomene tambulwa. (Tala e babu, “ Aweyi Olenda Sobela e Nkutakani una Ufwene?”) Mpangi zawonso muna nkutakani, kiakala wan’akete, balenda sadisa wantu ampa mu mona vo batomene tambulwa.

Muna songa kwa akaka vo tutomene kubatambula, divavanga vo twasonga e fu kia zola nzenza yo kubasadisa tuka muna kinitu ye muna kimwanda. Kasikil’owu, mpangi mosi ankento wasadisa mpangi ankaka ankento ona walwaka muna nkutakani. Wansadisa mu zaya mbanza yawonso ye mpila yabakila makalu ma ndonga. Mpangi ona wakala se muntu ampa muna nkutakani, watoma sivika mu dina mpangi ankento kavanga, ediadi diansadisa mu toma kulukilwa e nkutakani yampa.

LAU DIAMBOTE MUNA NUNGUNUKA

E mwan’a nuni kuna lubantiku wonga kekalanga wau mu sisa nzialu yo yantika tilumuka. Kansi avo okabukidi yo tilumuka, olendanga kwenda kwanda. Diau dimosi mpe, avo osobele nkutakani yampa, ofwete sunda konso diambu dilenda kumwesa wonga  ye dilenda kukakidila mu tilumuka, i sia vo, nungunuka muna salu kiaku kwa Yave. Mpangi Nicolas yo Céline ana tutekele yika, bavova vo: “O soba e nkutakani i mpila yambote ya longokela. Muna lenda kulukilwa fulu yampa ye mpangi zaswaswana, diavava vo twayima fu yampa.” Mpangi Jean-Charles ona tutekele yika wavova una yandi ye esi nzo andi bavuila e nluta: “Mu nkutakani eto yampa, wan’eto batoma zikuka muna kimwanda yo kumika ngwizani yau yo Yave. Ke vavioka ngonde zayingi ko, mwan’eto ankento wayantika vewa yiyekwa muna lukutakanu lwa kati kwa lumingu. O mwan’eto ayakala wakituka se nteleki walembi vubwa.”

Adieyi tuvova kele vo ozolele yaluka kuna zunga kuvuilu ateleki ayingi o mfunu, kansi vena ye mambu mekukakidilanga? Olenda sadila tuludiku tuna mu longi diadi muna nkutakani aku. Muna mpila yayi, omona nze ngeye osobele nkutakani ankaka. Ozevo, bunda e vuvu kwa Yave, ukivananga emvimba muna salu ya nkutakani yo vanga e ngolo kimana wasalanga ye mpangi zawonso muna salu kia umbangi. Vanganga yikundi yampa yo kumika yikundi yankulu. Olenda sadisa mpe wantu ampa yovo ana bavuidi o lusadisu o mfunu tuka muna kinitu ye muna kimwanda. Ovanga ediadi, dikusadisa mu kumika kimwanda kiaku, kadi o zola i fu kiswaswanesanga Akristu akieleka. (Yoa. 13:35) Kala ye ziku vo “Nzambi tukau twa mpila yayi keyangalelanga.”—Ayib. 13:16.

Mpangi zayingi balenda kulukilwa vava basoba e nkutakani, kanele vo bawanana ye mpasi. Muna diadi, ngeye mpe lenda olenda. Mpangi Anne-Lise wavova vo: “O soba e nkutakani, diansadisa mu vanga yikundi yampa.” Mpangi Kazumi okwikilanga vo osoba e nkutakani diansadisa mu tambula lusadisu lwa Yave ke mu mvu miavioka ko. Adieyi tuvova mu kuma kia mpangi Jules? Wavova vo: “Ampangi ana yavanga yau kikundi bansadisa mu mona vo e yayi i nkutakani ame. Owau imonanga vo i mosi muna nkutakani yayi yampa ye diampasi dikala mu soba diaka nkutakani yankaka.”