Nzambi Okuvuanga o Mfunu
BIBILA kivuidi tuludiku tusundidi o mfunu kadi kwa Nzambi kiatuka. Dialudi vo ke nkand’a mawuku ko, kansi kilenda kutusadisa mu zizidila ntokani, ngindu zabendomoka ye mpasi zankaka.
Vana ntandu, Bibila kikutusianga nsilu vo Yave wa Nzambi, a wa Mvangi eto otoma bakulanga e ngindu ye ntokani zeto ke mu muntu ankaka ko. Wakubama kena muna kutusadisa mu zizidila konso mpasi tunuananga zau. Kasikil’owu, tala e sono yole yalufiaulwisu:
“Yave ofinamene awana bawudika e ntima; ovuluzanga awana bakendalala.”—NKUNGA 34:18.
“Kadi omono Yave wa Nzambi aku, nsimbinini o koko kwaku kwalunene, mono i Ndiona okuvovesanga vo: ‘Kumoni wonga ko. Ikusadisa.’”—YESAYA 41:13.
Aweyi Yave kekutusadisilanga mu zizidila o ntelamw’a moyo? Nze una tumona muna malongi melanda, Yave osonganga kikilu vo okutuvuanga o mfunu ye okutusadisanga mu mpila zayingi.
a Yave i nkumbu a Nzambi.—Nkunga 83:18.
