Muna vova e ludi, yeto awonso mu zunga kiviokelanga “tembwa kiangolo” tuzingilanga. Yesu wayikila kio vo “mpasi zayingi.” (Matai 24:21) E mpasi zazi ke tulendi zo venga ko. Kansi tulenda vanga diambu muna kuyitanina. Adieyi tulenda vanga?

Muna Longi diandi vana Mongo, Yesu Kristu wavana lulukisu olu: ‘Ozevo, nuvavanga ntete Kintinu [kia Nzambi] ye unsongi wandi.’ (Matai 6:33) Aweyi tulenda wo vangila?

Vavanga ntete Kintinu kia Nzambi. Ediadi disongele vo tufwete badikilanga e Kintinu kia Nzambi se diambu disundidi o mfunu muna mambu mawonso. (Matai 6:25, 32, 33) Ekuma tufwete badikilanga Kintinu kia Nzambi mu mpila yayi? Kadi wantu ke balendi fokola e mpasi ko ova nza. Kintinu kia Nzambi kaka kilenda fokola e mpasi zawonso benuananga zau o wantu.

Vava unsongi wandi. Tufwete sianga e ngolo muna zingila e ngwizani ye nsiku ye nkanikinu miansongi mia Nzambi. Ekuma? E kuma kadi, avo tubakidi nzengo yeto kibeni muna edi diambote ye edi diambi, mfwilu kaka dikututwasila. (Ngana 16:25) Kuna diaka e sambu, avo tuzingidi e ngwizani ye nkanikinu mia Nzambi, yeto kibeni tuvua e nluta. Edi disundidi o mfunu, tuyangidika Nzambi.—Yesaya 48:17, 18.

Nuvavanga ntete Kintinu kia Nzambi ye unsongi wandi. Yesu walukisa vo akaka befwa e diya muna yindulanga vo o kala ye nzimbu zayingi dilenda kubasadisa mu kala yo  lutaninu. Akaka mu kuma kia ntokani zasaka za zingu, ke bekalanga ye ntangwa ko ya vava e Kintinu kia Nzambi.—Matai 6:19-21, 25-32.

Kansi, Yesu wasia nsilu vo awana beyikamanga e Kintinu kia Nzambi bevua ina bavuidi o mfunu owau ye nsambu kuna ntwala.—Matai 6:33.

Kana una vo alongoki a Yesu kuna tandu kiantete basianga e Kintinu ye unsongi wa Nzambi va fulu kiantete, ke bamona e mfoko a mpasi zawonso ko za nza muna lumbu yau. Kansi, bataninua. Mu nkia mpila?

Bazingilanga e ngwizani ye nkanikinu miansongi mia Nzambi. Ediadi diabatanina mu lembi mona e mpasi zamonanga awana ke balandanga nsiku mia Nzambi ko. Bakala ye vuvu kiasikila vo Kintinu kia Nzambi kikubasadisa mu zizidila ulolo wa mpasi. Nzambi wabavana “ulolo wa nkuma” mu zizidila e mpasi banuananga zau.—2 Korinto 4:7-9.

Akristu a tandu kiantete balemvokelanga o nkanikinu wa Yesu wa vava ntete e Kintinu. Basamuna e nsangu zambote muna nza yawonso ya tandu kiau. (Kolosai 1:23) Nga vena yo wantu besalanga e salu kiaki o unu?

Yingeta! Mbangi za Yave bazeye wo vo ke kolo ko e Kintinu kia Nzambi kifokola e tandu kiaki. Muna kuma kiaki, bevanganga mawonso muna lemvokela e mvovo emi mia Yesu: “E nsangu zazi zambote za Kintinu zisamunua mu nza yawonso muna umbangi kwa zula yawonso, i bosi e mbaninu ikwiza.”—Matai 24:14.

Aweyi otambulwila e nsangu zambote? Tukasakese watanginina nkangu a mbanz’a Beroya kuna Makedonia ya tandu kiantete. Vava bawá e nsangu zambote za Kintinu kasamunanga o Paulu, “batambulwila e diambu kuna mvevo wa ntima.” ‘Batoma fimpanga e Sono lumbu yawonso’ muna zaya e ziku kia mana bawá, i bosi bakituka Akristu.—Mavangu 17:11, 12.

Ongeye mpe olenda vanga diau dimosi. Muna vavanga ntete e Kintinu kia Nzambi ye unsongi wandi, osolola e tininu tuka owau ye okala mu luvuvamu ye ngemba kuna sentu.