Nzambi wavana kwa wantu e lau dia mokena yandi muna sambu yo kunzayisa una bemonanga. Davidi wa ngunza wasamba vo: “E ngeye Owanga e sambu, o wantu a mpila zawonso kwa ngeye bekwiza.” (Nkunga 65:2) Kansi, aweyi tulenda vangila e sambu kimana Nzambi katuwá yo vua e nsambu zandi?

E sambu yaku ikuvananga e lau dia ziula o ntima aku kwa Nzambi muna kunzayisa una omonanga. (Nkunga 62:8) O Mpungu-ngolo oyangalalanga vava okumvovesanga mana mena muna ntima aku.

Kana una vo Nzambi ovuidi mazina mayingi, nkumbu mosi kaka kena yau. Wavova vo: “Mono i Yave. Eyayi i nkumbu ame.” (Yesaya 42:8) Muna Sono Yavauka, e nkumbu Yave mu tezo kia fulu 7.000 yasonama. Ngunza zayingi zasadilanga e nkumbu a Nzambi vava basambanga kwa yandi. Abarayama wavova vo: “Dodokolo, e Yave, . . . ungiambula yavova diaka [kwa ngeye].” (Tuku 18:30) Oyeto mpe tufwete sadilanga e nkumbu a Nzambi, i sia vo, Yave vava tusambanga.

Kiakala nkia ndinga tuvovanga, Nzambi olenda bakula e ngindu ye ntokani zeto. E Diambu diandi dikutusikidisanga vo: “Nzambi ke sianga mpambula ko, kansi muna zula yawonso, ndiona okumvumina yo vanga mambu mansongi otondwa kwa yandi.”—Mavangu 10:34, 35.

Kansi muna sambulwa kwa Nzambi, mayingi diaka tufwete vanga ke samba kaka ko. Malongi malende mevovela mana tufwete vanga.