Yindula vo ngeye yo nkaz’aku nutantane. Ongeye ovovele muna ntim’aku vo, ‘Kinkulomba ndoloki ko, ke mono ko mvavidi mo.’

Kana una vo kuzolele lomba ndoloki ko, zaya dio vo e ntantani zakinu. Obakwidi kwaku vo ofwete lomba e ndoloki, kansi kulendele vova ko vo “undoloka.”

Lulendo. Yakala dimosi nkumbu andi Charles, a wavova vo, “Nkumbu miayingi kilendanga lomba ndoloki ko, kadi avo mvangidi wo, o zitu wame ukuluka.” Lulendo lulenda kufila mu yindula vo kuvangidi kwaku diambi ko.

Ngindu zaku. Olenda yindula vo diambote mu lomba e ndoloki kele vo ngeye ovavidi nkwaku o mambu. Nkento mosi nkumbu andi Jill, wavova vo: “Avo nzeye vo mono mvavidi o mambu, ke dikalanga mpasi ko mu lomba e ndoloki.” Kansi avo yeto awole mambu mambi tuvovele, diampasi dikalanga kwa mono mu lomba e ndoloki. “Kimonanga mfunu wa lomba ndoloki ko avo yeto awole mbi tuvangidi.”

Olenda kuyilungisa avo omwene vo nkaz’aku yandi una ye ngielele yawonso. Yakala dimosi nkumbu andi Joseph, wavova vo: “Avo una ye ziku vo kuvangidi kwaku diambi ko, kulomba ndoloki ko mu songa vo ke ngeye ko ovavidi mo.”

Mpila wasansukila. Nanga wasansukila mu nzo ina o wantu ke balombanga ndoloki ko. Avo i wau, kuzeye tambulwila e ngielele ko. Wau kina vo muna kileke kwalongwa dio ko, i dianu omwenanga vo diampasi mu lomba e ndoloki muna kimbuta.

Uyisia vana fulu kia nkaz’aku. Yindula e kiese wamona vava walombwa e ndoloki kwa muntu. Ekuma olembi wo vangila muna yangidika nkaz’aku? Kana nkutu omwene vo kuvangidi kwaku mbi ko, olenda lomba e ndoloki mu kuma kia mpasi zina o nkaz’aku kamwene omu ntima. O lomba e ndoloki dilenda fokola e mpasi za nkaz’aku.—Nkanikinu wa Nkand’a Nzambi: Luka 6:31.

Tanina longo lwaku. Kuyindula ko vo avo olombele ndoloki okitukidi se zowa. Vanga wo muna tanina longo lwaku. Muna Ngana 18:19 tutanganga vo: “O baka mpangi wasumukwa, e mpasi ke mu bak’evata diangolo ko.” Dilenda kala diampasi mu vutulwisa luvuvamu kele vo yeno awole nuvavanga kuyilungisa. Kansi o lomba e ndoloki dikululanga e ntantani. O vanga wo dina nze ngeye osianga longo lwaku vana fulu kiantete.—Nkanikinu wa Nkand’a Nzambi: Filipi 2:3.

Lomba e ndoloki kuna sazu kiawonso. Dialudi vo, diampasi dikalanga mu lomba e ndoloki avo ke tuna ye ngielele ko. Kansi ke disongele ko vo ofwete songa fu yambi wau vo nkaz’aku una ye ngielele. Ozevo, lomba-lomba e ndoloki, kuyindula ko vo e ntangwa avo iviokele e diambu se diafokoka kwandi. Avo yakala olombele ndoloki, dilenda sadisa mpe o nkento kalomba e ndoloki. Avo luna ye fu kia lomba e ndoloki, ke dikala diaka mpasi ko kwa yeno.—Nkanikinu wa Nkand’a Nzambi: Matai 5:25.

Lomba ndoloki ye nsi a ntima. Ovava kuyilungisa ke diau dimosi ko yo lomba e ndoloki. Nanga olenda lomba e ndoloki kuna luvezo lwawonso, “undoloka kwame,” kansi ke wau ko ulombelwanga e ndoloki! Tambulwila e ngielele aku, lomba e ndoloki kwa nkaz’aku, kuvavi kuyilungisa ko.

Tambulwila o vilwa. Kuna lulembamu lwawonso zaya wo vo vilwa ovanga. Yeto awonso, vilwa tuvanganga. Kana nkutu oyindwidi vo kuna kwaku ye ngielele ko, vena kaka ye fidiambu ovangidi yovo ovovele dikudikidi e ntantani. Muna Nkand’a Nzambi tutanganga vo: “On’ovita muna mfundu, vika sia vo nlungi; kansi o nkw’andi olueke, untongonwene.” (Ngana 18:17) Otambulwila o vilwa waku dilenda kusadisa mu lomba e ndoloki kuna sazu kiawonso.