E ntokani zasaka zitukanga mu nza yayi yazala ye mambu mampasi zilenda kutuyoyesa muna ngindu ye muna nitu. Muna kuma kiaki, wantu ayingi bedimbulanga e vuvu. Mu nkia mpila?

• Akaka nkutu ke bezolanga diaka yindula ko una mambu mekala muna lumbu ikwiza.

• Akaka bekuyivananga mu nua malavu mayingi mankolwa ye fomo zangolo kimana bavilakana e mpasi zau.

• Vo i akaka bemonanga vo diambote bafwa kwau. Kadi bevovanga vo, o fwa kusundidi o wete ke mu kala moyo ko.

• Emaka mambu onuanganga mau o unu, ma kolo kiandwelo kwandi, malenda toma muna ntangwa kwavingidingi ko.

• Kana nkutu vo mambu ke matomene ko, vena ye mambu olenda vanga malenda kusadisa mu zizidila.

• E Bibila kikutusianga nsilu vo mambu mawonso mampasi tuwanananga mau, fokoka mefokoka.

Bibila kivovanga vo: “I kuma vo, ke nutokani ko mu kuma kia mbazi, kadi e lumbu kia mbazi kikala ye ntokani zandi. Konso lumbu kina ye ntokani zandi.”—Matai 6:34.

Kutokanena oma ma mbazi ko. Kuyambula ko vo e ntokani za lumbu kilanda zafila mu lembi vanga mambu ofwete vanga o unu.

Otokanena o mambu mena vo nanga ke mevangama kwandi ko, dilenda wokesa e ntokani zaku yo kufila mu dimbula e vuvu.

Ntozi a nkunga wasamba kwa Nzambi vo: “E diambu diaku i mwinda wa tambi yame, yo ntemo a nzila zame.” (Nkunga 119:105) Tala una e Bibila kina vo i Diambu dia Nzambi kinina e ngwizani ye diambu diadi:

Muna tombe kia fuku kina e bú, o mwinda ulenda kutusadisa mu zaya vana tufwete diata. Diau dimosi mpe, e Bibila kivuidi tuludiku twangangu tulenda kutusadisa mu zaya dina tufwete vanga muna ntangw’ampasi.

O ntemo mpe ulenda temesa e nzila tukangalelanga yo mona kuna tukwendanga. Diau dimosi mpe, e Bibila kikutusadisanga mu zaya vo kuna sentu mambu toma metoma.