Vava yakala yo nkento bezitisanga muntu yo nkwandi, besongaziananga e ngemba kana nkutu vava bekalanga ye ngindu zaswaswana muna diambu dimosi. O nkanda, Dez Lições para Transformar seu Casamento, uvovanga mu kuma kia akazi ana bezitisanga muntu yo nkwandi vo: “Akazi awaya ke besiandamanga kaka muna ngindu zau ko . . . Kansi, bemokenanga mu kuma kia ngindu zau zaswaswana yo winikina muntu yo nkwandi kuna luzitu lwawonso. I bosi, bebakanga e nzengo zimosi ezi zitwasa nluta kwa yau awole.”

DINA BIBILA KIVOVANGA: “O zola . . . ke kuvavanga wete wa yandi kibeni ko.”—1 Korinto 13:4, 5.

“O zitisa o nkento ame disongele vo kumvua o mfunu lembi vanga diambu dilenda kunlweka ngatu fwasa o longo lweto.”—Micah.

Muna longo avo mukondelo o luzitu, e moko ya akazi ilenda kituka nze makumbu, luvezo yovo nkutu mafingu. Mun’owu wa afimpi a mambu ma longo, e mambu mama mena se sinsu kisonganga vo o longo lulenda fwa.

“Oyikila nkento aku mu mvovo miambi yovo mia malevo, dilenda kumfila mu kuyimwena vo kena mfunu ko, yambula kubunda e vuvu yo fwasa e ngwizani ambote muna longo lweno.”—Brian.

UKIYUVULA

Mu kolo kia lumingu lumosi, sia e sungididi muna mana ovovanga yo vanga. I bosi, ukiyuvula:

• ‘Nkumbu kwa ntumbidi o nkaz’ame? Nkumbu kwa insanisini?’

• ‘Mu nkia mpila nsongele luzitu kwa yakala yovo nkento ame?’

MOKENA YO NKAZ’AKU

• Nkia mvovo ye mavangu malenda fila konso muntu mu yeno mu mona vo otoma zitiswanga?

• Nkia mvovo ye mavangu malenda fila konso muntu mu yeno mu mona vo ke zitiswanga ko?

LUSADISU

• Soneka mambu tatu mana yakala yovo nkento aku kalenda vanga kimana wamona vo otoma zitiswanga. Konso muntu mu yeno kafwete soneka e mambu mandi yo vana mo kwa nkwandi. I bosi, nusia e ngolo za sadila mana konso muntu kalombele.

• Soneka mambu mana oyangalelanga kwa yakala yovo kwa nkento aku. I bosi, nusanisina yo vovesa kwa muntu yo nkwandi una numonanga mu kuma kia fu yayi yambote.

“O zitisa yakala diame disongele vo songa muna mavangu vo mfunu kena kwa mono ye nzolele vo kakala ye kiese. Ke divavanga kwandi ko vo wavanga diambu diampwena. Ezak’e ntangwa ovanga mambu makete-kete lumbu ke lumbu, dilenda songa vo o muntu mfunu kikilu kena kwa yeto.”—Megan.

Vana ntandu a mawonso, edi disundidi o mfunu ke vava zaya ko kana vo ongeye ozitiswanga kansi i zaya kana vo o yakala yovo nkento aku omonanga vo otoma zitiswanga.

DINA BIBILA KIVOVANGA: “Nuvuata walakazi, nkenda, lusakalalu, lulembamu yo luzindalalu.”—Kolosai 3:12.