María Isabel, dumbelele una vo nteleki avema kuna mbanza San Bernardo kuna Chile, América do Sul. Yandi kumosi ye mase mandi yo mpangi andi ankento esi kanda dia Mapuche. Yau awonso muna nzo au besalanga kwayingi kimana basikidisa nkutakani yampa muna ndinga Mapuche, iyikilwanga mpe vo Mapudungun.

Vava kiavewa luzayisu vo Luyindulu lwa lufwa lwa Kristu lukala mpe muna ndinga Mapudungun ye 2.000 ma mboka za Luyindulu za ndinga yayi zisinga kayaneswa, María wayindula dina kalenda vanga. Aweyi kalenda sadisila? Wasungamena nona ya mpangi zakaka z’aleke ana babaka nluta muna sila umbangi kw’akundi a sikola ye kw’alongi. Wamokena diambu diadi ye mase mandi. Bawizana vo María Isabel kayindula nkubika yambote kalenda sadila mu kay’e mboka kuna sikola. Nkia nkubika kayindula?

Entete, María walomba o nswa kwa mfumu za sikola kimana kalama mboka mosi vana mwelo anene wa sikola. Wavewa nswa kwa mfumu za sikola yo kunsanisina mu kuma kia ngindu zandi zambote. Lumbu kimosi mu mene, ekolo wana awonso a sikola bakutakeswa vana yanzala, mfumu a sikola wavana nkutu luzayisu mu kuma kia mboka yayi!

I bosi, María Isabel walomba o nswa wa kota muna maseka mawonso ma sikola. Vava kavewa nswa kw’alongi, wayantika yuvula muna konso eseka kakotanga kana vo vena ye wan’a sikola bena vo esi kanda dia Mapuche. Wavova vo: “Yabanza vo valenda soloka kaka tezo kia 10 yovo 15 dia wan’a sikola bena vo esi kanda dia Mapuche, kansi yamona vo ayingi kikilu bakala. Yakaya tezo kia 150 ma mboka.”

Nkento mosi wamona mboka yalamwa vana mwelo a sikola wayuvula kana nani kalenda mokena yandi mu kuma kia nkinzi wau. Wasivika kikilu vava bamfila kwa dumbelele kia mvu kumi. Kuna tusevo twawonso María Isabel wavova vo: “Edi kayindula vo mbuta kemokena yandi.” Vava kamvana e mboka yo kunsasila oma ma Luyindulu, María Isabel wanyuvula e fulu kezingilanga kimana yandi ye mase mandi benda kunkingula mu kunzayisa diaka mayingi mu kuma kia Kintinu kia Nzambi. Ekwe kiese bamona ateleki 20 bakala muna buka kia ndinga Mapudungun, vava bamona nkento ndioyu kumosi ye 26 dia akwa luzolo lwambote bena vo esi kanda dia Mapuche bayiza lungana muna Luyindulu. Owau, e buka kiakina kiakituka se nkutakani yampwena!

Kiakala vo u nleke yovo mbuta, nga olenda vanga e nkubika ya bokela akundi aku a sikola yovo a salu kimana beza lungana yeto muna Luyindulu, muna lukutakanu lwa mvivu yovo mu wá elongi dia nkangu awonso? Ekuma olembi vavulwila muna nkanda mieto mu zaya nsangu zilenda kuvana ngindu zambote mu mpila olenda kayila mboka yo kutwasila nluta? Vana ntandu, lomba mwand’avelela kwa Yave muna sambu kimana wasadisa mu kala ye unkabu wa sila umbangi mu kuma kiandi. (Luka 11:13) Avo ovangidi wo, ongeye mpe olenda sivika yo kasakeswa vava omona e nluta mia nkubika zambote wavanga za kay’e mboka.