Ezak’e ntangwa, awana besatululanga e lekwa yankulu, besololanga e lekwa isonganga e ziku vo wantu beyikwanga muna Nkand’a Nzambi bazinga kikilu. Kasikil’owu, muna mvu wa 2011 akwa ngangu kuna Isaele bamwang’e nsangu mu kuma kia lekwa basolola kisonganga e ziku vo muntu mosi oyikwanga muna Nkand’a Nzambi kazinga kikilu. Basolola nkela mosi yatoma viengeswa ya tezo kia 2.000 ma mvu, yasiwanga visi ya muntu afwa avo nsuni miandi miwolele.

Muna nkela yayi mwasonama vo: “Mireyame wa mwan’ankento a Yesua wa mwana Kayafa, ngang’a Mazeya kuna Bete inri.” O Ngang’ambuta wa Nyuda ona wabangika Yesu yo kumvondesa i Kayafa. (Yoa. 11: 48- 50) Flávio Josefo wa nsoneki a lusansu wanyikila vo “Yosefe, ona wayikilwanga mpe vo Kayafa.” E nkela yayi nanga ya mosi muna yitu yandi. Wau vo e masono makala muna nkela ina bateka solola mebadikilwanga vo ma ngang’ambuta ona wakiyikilanga vo “Yehosef bar Caiapha” yovo Yosefe wa mwan’a Kayafa, * nanga Mireyame yitu kia Kayafa kakala.

Nze una usonganga e nsangu za Autoridade Israelense de Antiguidades (IAA), e mivi bayiya nkel’a Mireyame vava babangula ziami kimosi kiankulu. O lufimpu lwa lekwa yayi ye masono makala mo lusonganga e ziku vo nkela yayi yankulu kikilu.

E nkel’a Mireyame ikutuzayisanga mpe diambu dimosi diampa. Iyikanga Mazeya, nkumbu a buka kiansuka muna buka 24 ya nganga basadilanga muna tempelo kuna Yerusaleme. (1 Tus. 24:18) E nsangu za Autoridade Israelense de Antiguidades, (IAA) zisonganga vo, e masono makala muna nkela yayi mesonganga vo “ekanda dia Kayafa mu buka kia Mazeya diakala.”

E masono mama meyikanga mpe Bete ʹInri. E mvovo miami nanga mina ye nsasa zole. Buka kia Autoridade Israelense de Antiguidades, (IAA) kiavova vo: “Eyi yantete nanga isonganga vo e Bete ʹInri i nkumbu a kanda dimosi di’anganga, i sia vo, wan’a Ime. (Ezera 2:36, 37; Nekemiya 7:39-42) Akaka muna wan’au mu buka kia Mazeya bakala.” E nsasa “yazole isonganga [vo Bete ʹInri] nanga i fulu kiazingilanga Mireyame yovo kiazingilanga ekanda diandi diawonso.” Diakala dialudi yovo ve, e nkel’a Mireyame isonganga e ziku vo Nkand’a Nzambi wantu akieleka uyikanga, ana bakala ye makanda makieleka.