1. Mu nkia mambu akaka bekuyivananga? Ekuma?

WANTU ayingi bekuyivananga muna mambu mena vo mamfunu muna zingu kiau. Mase besadilanga ntangwa, mavwa ye ngolo zau muna wete dia wan’au. Aleke ana bekalanga y’etima dia sunzula e nsi au muna nsaka za Olímpico, bevaulanga ntangwa yayingi mu toma kubama ekolo akundi au bekuyivananga muna nsaka. Yesu mpe wavanga mawonso mu kuma kia mambu makala mfunu kwa yandi. Kakala y’ekani dia vava mavwa ko yovo wuta wana. Wazola sadila ngolo zandi zawonso mu yikama Kintinu kia Nzambi. (Mat. 4:17; Luka 9:58) Alandi andi mpe bavanga mawonso muna yikama Kintinu kia Nzambi. Kintinu kia Nzambi i diambu diasunda o mfunu muna zingu kiau. Muna kuma kiaki, bayambula maka mambu kimana bayivana muna salu kia Kintinu. (Mat. 4:18-22; 19:27) Tufwete kiyuvula: ‘Nkia diambu disundidi o mfunu muna zingu kiame?’

2. (a) Mu nkia mambu mamfunu mana Akristu awonso akieleka bafwete kuyivana? (b) Mu nkia yaka salu akaka bekuyivananga?

² O kuyivana muna maka mambu mfunu kwina kw’Akristu awonso akieleka, avo tuzolele kala ye ngwizani ambote yo Yave. O kuyivana muna mambu mama divavanga vo twasadila e ntangwa ye ngolo zeto muna samba, tanga Nkand’a Nzambi, kala ye nsambila ya esi nzo, lungana muna tukutakanu yo samuna e nsangu zambote. * (Yos. 1:8; Mat. 28:19, 20; Ayib. 10:24, 25) Muna kuma kia ngolo tuvanganga ye muna nsambu za Yave, e salu kia samuna e nsangu zambote mu nungunuka kina, wantu ayingi bekwizanga ku “mongo a nzo a Yave.” (Yes. 2:2) Muna yikama e salu kia Kintinu, ayingi bekuyivananga mu sadila kuna Betele, tunga  Maseka ma Kintinu ye ma tukutakanu twampwena, kubika tukutakanu twa mvivu yovo sadisa awana bebwilwanga e sumbula. Kana una vo e salu yayi ke yau ko ivavwanga muna vuluzwa, mfunu yina muna yikama oma ma Kintinu.

3. (a) Nkia nsambu tuvwanga vava tukuyivananga mu kuma kia Kintinu? (b) Nkia yuvu tufwete kuyiyuvula?

³ O unu, diamfunu kikilu twavanga mawonso tulenda mu kuma kia Kintinu ke mu lumbu yavioka ko. Diakiese mu mona vo wantu ayingi bekuyivananga kuna mvevo mu sadila Yave. (Tanga Nkunga 54:6.) O kuyivana kuna mvevo kiese kiayingi dikututwasilanga ekolo tuvingilanga e ngiz’a Kintinu kia Nzambi. (Nsi. 16:15; Mav. 20:35) Kana una vo i wau, diamfunu yeto awonso twatoma kuyifimpa yo kuyiyuvula: Nga vena ye mambu tulenda vanga diaka mu kuma kia Kintinu? Aweyi tusadilanga e ntangwa, mavwa, ngolo ye ngangu zeto? Nkia mambu tufwete silanga sungididi vava tukuyivananga kuna mvevo? Yambula twabadika mbandu tulenda tanginina muna kuyivana kuna mvevo. Ediadi dikutusadisa mu kala ye kiese.

4. Nkia nluta babakanga Aneyisaele vava bavananga tukau?

⁴ Kuna Isaele yankulu, o nkangu wavananga tukau muna lolokwa masumu mau. O tukau mfunu twakala muna vwa edienga dia Yave. O tukau twakaka twasikidiswa muna nsiku kansi, twakaka twavaninwanga muna ntim’amvevo. (Fuka 23:37, 38) Tukau twawonso twamfutumuki twavanwanga nze tukau twamvevo kwa Yave. Kimosi muna nona kisonganga yimenga bakelelanga Yave, i vava kiasunzulwa e tempelo muna lumbu ya Solomo.—2 Tus. 7:4-6.

5. Nkia nkubika kavanga Yave mu kuma ki’awana bakala ye mvwilu zakete?

⁵ Yave muna zola kwawonso wazaya wo vo wantu mvwilu zaswaswana bakala zau. Walombanga vo konso muntu kavana kina kalenda. O nsiku a Yave walombanga vo bavananga  yimenga ya bulu yo bungula e menga ma bulu vana ntoto. E yimenga yayi yakala se “kini kia mambu mambote mekwiza” muna Mwan’andi Yesu. (Ayib. 10:1-4) Kansi, Yave kabadisanga nsiku wau ko. Kasikil’owu, Yave watondanga yimenga ya mbwela vava muntu kalendanga vana yimenga ya nkombo ko yovo ngombe. Muna kuma kiaki, kana nkutu nsukami, wakalanga ye kiese kia vana kimenga kwa Yave. (Fuka 1:3, 10, 14; 5:7) Kana una vo e bulu yavewanga kimenga yaswaswana yakala, mambu mole malombwanga kwa konso ona wavananga tukau kuna mvevo.

6. Nkia mambu mole malombwanga kwa konso ona wavananga tukau? Ekuma diakadil’o mfunu mu lemvokela o nsiku wau?

⁶ Diantete, ona wavananga tukau kafwete vana kina kisundidi o wete. Yave wavovesa nkangu vo e bulu kikelwa se kimenga kifwete kala yo vimpi wambote kimana ‘kiatondakana.’ (Fuka 22:18, 20) Avo e bulu kiayela, e kimenga ke kiatondakananga ko kwa Yave. Diazole, ona wavananga lukau kafwete kala wavelela yo kondwa nsafu. Avo muntu kena wavelela ko, entete kafwete vana kimenga kia masumu kimana kavwa edienga dia Yave. I bosi, Yave ketonda e lukau lwandi lwa mvevo. (Fuka 5:5, 6, 15) E diambu diadi mfunu kikilu diakala. Yave wakanikina vo muntu avo odidi e bulu kia kimenga kia ungudi ekolo kena wafunzuka, kafwete vondwa. (Fuka 7:20, 21) Kuna diak’esambu, avo muntu wavananga lukau ngwizani ambote kena yau yo Yave, lukau lwandi mpe lwambote, o muntu ndioyo wakalanga ye ntona zambote ye kiese.—Tanga 1 Tusansu 29:9.

7, 8. (a) Nkia kiese bemonanga awana bekuyivananga kuna mvevo mu kuma kia Kintinu? (b) Nkia lekwa tuna yau tulenda vana kwa Yave?

⁷ O unu, mpangi zayingi bekuyivananga kuna mvevo muna salu kia Yave. Ediadi diyangidikanga Yave. O kuyivana muna sadisa mpangi zeto kiese dikututwasilanga. Mpangi mosi una muna salu kia tunga Maseka ma Kintinu yo sadisa awana bebwilwang’e sumbula wavova vo kena ye mvovo ko mu yika una kemonanga vava kesadisanga mpangi zandi. Wavova vo: “Vava imonanga e kiese ye luyangalalu lw’ampangi vava bevwandanga mun’Eseka diampa dia Kintinu yovo vava betambulanga lusadisu avo babwidilu sumbula, imonanga vo e salu ye ngolo yavangidi ke zankatu ko.”

⁸ E nkubik’a Yave o unu ivavanga konso elau mu yikama e salu kia Yave. Muna mvu  wa 1904, mpangi C. T Russell wavova vo yeto awonso tufwete vanganga mawonso muna sadila e ntangwa, ngangu, mavwa ye lekwa yakaka muna kembelela Yave. Kana una vo tuyambulanga maka mambu mu kuyivana kuna mvevo, nsambu zayingi tuvwanga. (2 Sam. 24:21-24) Nga tulenda sadila eyi tuna yau mu mpila yambote?

9. Adieyi tulongokele muna Luka 10:2-4 mu kuma kia sadila e ntangwa?

⁹ Ntangw’eto. Ntangwa ye ngolo zayingi divavanga muna sekola yo nieteka e nkanda mieto, tunga Maseka ma Kintinu ye ma tukutakanu twampwena, kubika tukutakanu twa mvivu, sadisa awana bebwilwanga sumbula ye salu yakaka. Ola 24 kaka tuna zau konso lumbu. Yesu watuvana nkanikinu ulenda kutusadisa mu sadila e ntangw’eto mu mpila yambote. Vava Yesu kafila alongoki andi muna salu kia samuna nsangu zambote, wabavovesa vo “omu nzila yeno ke nukayisa muntu.” (Luka 10:2-4 ) Ekuma Yesu kavanina luludiku lwalu? Muna lumbu ya Yesu, vava wantu bakayisanga akw’au, ke bavumbamanga kaka ko yovo vanaziana mbote a moko. Kansi, babimbananga nkumbu miayingi yo fukama nkutu va ntoto. E mambu mama mawonso ntangwa yayingi madianga. Yesu kavova ko vo alongoki andi bakala akwa ntima miambâdi. Wabasadisa mu bakula vo ke bakala ye ntangwa yayingi ko. Muna kuma kiaki, diavavanga vo basadila e ntangw’au mu mpila yambote yo vanga mana masunda o mfunu. (Ef. 5:16) Nga tulenda lemvokela o nkanikinu wau kimana twakala ye ntangwa yafwana muna yikama e salu kia Kintinu?

10, 11. (a) Tukau tweto mu kuma kia salu kisalwanga mu nza yawonso, aweyi tusadilwanga? (b) Nkia nkanikinu una muna 1 Kor. 16:1, 2 ulenda kutusadisa?

¹⁰ Nzimbu zeto. Nzimbu zayingi zivwilu mfunu mu yikama e salu kia Kintinu mu nza yawonso. Konso mvu, mafunda ye mafunda ma nzimbu za dólar zisadilwanga mu yikama e salu kia akengi a zunga, aviti a nzila a espesiale ye misionario. Tuka muna mvu wa 1999, vioka 24.500 ma Maseka ma Kintinu matungilu kala muna nsi zina vo mpangi zeto ke bena ye mavwa mayingi ko. Kana una vo i wau, Maseka 6.400 ma Kintinu mavwilu diaka mfunu. Konso ngonde, 100.000.000 za yinkanda-nkanda Eyingidilu ye Despertai! yinietekwanga. E salu yayi yawonso ivangilwanga muna tukau tweno twamvevo nuvananga.

¹¹ Paulu wa ntumwa okutuvananga nkanikinu tufwete landa vava tuvananga tukau. (Tanga 1 Korinto 16:1, 2.) Wakasakesa mpangi zandi kuna Korinto mu lembi vingilanga e nsuk’a lumingu muna zaya e nzimbu basidi zau, kansi bafwete bakanga nzengo kuna lubantiku lwa lumingu mu zaya e nzimbu bevana. Nze muna tandu kiantete, mpangi bevanganga nkubika mu vana kina balenda. (Luka 21:1-4; Mav. 4:32-35) Yave oyangalelanga e fu kia vanina kuna mvevo besonganga o nkangu andi.

12, 13. Adieyi dilenda fila akaka mu lembi sadila ngolo ye ngangu zau? Aweyi Yave kekubasadisila?

¹² Ngolo ye ngangu zeto. Yave oyikamanga e ngolo ye ngangu tusadilanga muna salu kia Kintinu. Osianga nsilu wa kutusadisa avo tuyoyele. (Yes. 40:29-31) Nga tumonanga vo ke tuna ye ngangu zafwana ko muna yikama e salu kia Kintinu? Nga tuyindulanga vo vena ye akaka batusundidi? Sungamena vo, Yave olenda kudikila e ngangu zeto nze una kavanga kwa Besalele ye Oliabe.—Luv. 31:1-6; tala fwaniswa kuna lubantiku.

¹³ Yave okutukasakesanga mu vana kina tulenda yo lembi vutuka manima. (Nga. 3:27) Vava tempelo yatungululwanga, Yave wavovesa Ayuda kuna Yerusaleme mu toma yindula mu kuma kia mana  bavanganga muna yikama e salu. (Kan. 1:2-5) Bafwa e diya ye ke basianga e salu kia Yave va fulu kiantete ko muna zingu kiau. Tufwete kuyiyuvula: Nga o vanga luzolo lwa Yave diau disundidi o mfunu muna zingu kieto ke mu konso lekwa ko? Tulenda fimpa e zingu kieto yo vanga e nkubika mu mpila tulenda vangila diaka mayingi muna yikama Kintinu kia Nzambi mu lumbu yayi yambaninu.

14, 15. (a) E nona ya mpangi zeto ana ke bena ye mavwa mayingi ko, aweyi ikasakesele? (b) Adieyi difwete kala i kani dieto?

¹⁴ Wantu ayingi bezingilanga mu fulu ina vo e zingu kiampasi yo usukami. E nkubik’eto ivanganga e nkubika muna sadisa e mpangi bezingilanga muna nsi zazi. (2 Kor. 8:14) Kansi, kana nkutu mpangi zeto ana ke bena ye mavwa mayingi ko beyangalelanga elau dia vanina kuna mvevo. Vava asukami bevananga kuna mvevo awonso, ediadi diyangidikanga Yave. —2 Kor. 9:7.

¹⁵ Muna nsi mosi ya usukami ya África, mpangi zakaka bevatanga mpatu yo teka e mbongo bebakanga yo sadila e nzimbu zau mu yikama e salu kia Kintinu. Muna nsi yayi, mwakala ye nkubika ya tunga Eseka dia Kintinu. Ampangi bazola yikama e salu kiaki. Kansi, nsungi a kuna mbongo yakala. Wau vo bazola yikama e salu kiaki, muna mwini bavananga e moko muna salu kia tunga Eseka dia Kintinu, muna nkokela bayendanga kuna e mbongo. Ekwe e fu kia kuyivana kuna mvevo basonga! Ediadi dikutusungamesanga ampangi kuna Makedonia muna tandu kiantete. ‘Usukami wayingi’ bakala wau, kansi bavovesa Paulu vo kayambula bavana nzimbu kwa mpangi zau. (2 Kor. 8:1-4) Yambula yeto mpe twavananga kina tulenda muna songa vo tuvutulanga matondo kwa Yave mu kuma kia ­nsambu kekutuvananga.—Tanga Nsiku 16:17.

16. Aweyi tulenda kadila ye ziku vo tukau tweto tutondakana kwa Yave?

¹⁶ Vava tukuyivananga kuna mvevo, tufwete kebanga mu lembi bembola e mambu masundidi o mfunu, nze esi nzo zeto. Nze una bavanganga Aneyisaele kuna nz’ankulu, tufwete kalanga ye ziku vo tukau tweto tutondakana kwa Nzambi. Adieyi dilenda fila Yave mu lembi tonda tukau tweto? Tufwete sungamena vo esi nzo zeto ye ngwizani eto yo Yave i mambu masundidi o mfunu muna zingu kieto. Tulenda kala y’elau dia yikama e salu kia tunga Maseka ma Kintinu, sadisa awana bebwilwanga sumbula yovo yikama Kintinu muna mpila yakaka. Kansi, e salu yayi ke yitondakana ko avo ke tulunga-lunganga nsatu za mwanda za esi nzo zeto ko yovo nsatu zau za nitu. Ke tulendi vana kwa Yave ko kina ke tuna kiau ko. (Tanga 2 Korinto 8:12.) Vana ntandu, tufwete kwamanana siamisa e ngwizani eto yo Yave kimana twalembi vidisa edienga diandi. (1 Kor. 9:26, 27) Kala ye ziku vo avo tuzingila e ngwizani ye nkanikinu mia Nkand’a Nzambi, tukau tweto tukututwasila kiese kiayingi yo ‘tondakana’ kwa Yave.

17, 18. Aweyi tumonanga mu kuma ki’awana bekuyivananga kuna mvevo mu kuma kia Kintinu? Adieyi yeto awonso tufwete yindula?

¹⁷ Ayingi muna mpangi zeto besadilanga ntangwa, ngolo ye mavwa mau muna yikama e salu kia Kintinu. (Fili. 2:17) Tufwete songanga luyangalalu kw’awana bekuyivananga kuna mvevo. Akento yo wan’a mpangi bevitang’o ntu muna salu kia Kintinu, besanisinwanga mpe muna fu besonganga kia kuyivana kuna mvevo.

¹⁸ Ngolo zayingi divavanga mu yikama e salu kia Kintinu. Yambula yeto awonso twasambanga yo toma yindula una tulenda kuyivanina muna yikama e Kintinu. Avo tuvanga wo, tuvwa nsambu zayingi owau ye “muna tandu kikwiza.”—Maku 10:28-30.