Kimvwama Kitukanga kwa Nzambi

NGA Nzambi okuvwamisa kele vo osikidi ye kwikizi muna yandi? Olenda kwandi kuvwamisa, kansi ke mpila kimvwama kina oyindulanga ko. Badika e nona kia Maria wa ngudi a Yesu. Mbasi Ngambiele wamoneka kwa yandi yo kumvovesa vo, “edieng’omwenwa” kwa Nzambi, ye wamvovesa mpe vo owuta Mwan’a Nzambi. (Luka 1:​28, 30-​32) Kana una vo i wau, Maria kakala mvwama ko. Vava Maria kavana lukau kunima luwutuku lwa Yesu, wavana ‘mbwela zole, yovo nsweswe eyembe zole’ zina vo i lukau bavananga asukami kwa Yave.​—⁠Luka 2:24; Fuka 12:⁠8.

Nga Maria kakala ye nsambu za Nzambi ko wau vo nsukami kakala? Ve kikilu, kadi vava kayenda kingula Elisabete wa yitu kiandi, Elisabete ‘wazala yo mwand’avelela; yo bokela mu nding’angolo oku vo, osambwilu [Maria] vana vena akento awonsono, isambwilu mpe mbongo a vumu kiaku.’ (Luka 1:​41, 42) Maria wavewa elau dia kituka se ngudi a Mwan’anzolwa a Nzambi ova ntoto.

O Yesu mpe kakala mvwama ko. Kawutuka kaka muna zunga kia usukami ko yo sanswa kwa mase ma sukami, kansi nsukami mpe kakala muna zingu kiandi kiawonso ova ntoto. Lumbu kimosi wavovesa muntu wazola kituka se nlongoki andi vo: “Amfwenge bena ye nduzu, e nuni z’ezulu zina ye leko; kansi o Mwan’a muntu ken’oku kafil’o ntu ko.” (Luka 9:​57, 58) Kansi kadi, dina kavanga o Yesu Kristu mu kwiza ova ntoto, diaziula e nzila kwa alongoki andi mu kala ye kimvwama kisundidi. Paulu wa ntumwa wasoneka vo: ‘Kana una vo wakala mvwama, muna diambu dieno i kasukamena, oyeno muna sukami wandi nwavwama.’ (2 Korinto 8:⁠9) O Yesu nkia mpila kimvwama kavana kwa alongoki  andi? Nkia mpila kimvwama tulenda vwa o unu?

Nkia Mpila Kimvwama?

Nkumbu miayingi e kimvwama kifwasanga lukwikilu lwa muntu, kadi o mvwama olenda bunda e vuvu muna mavwa mandi vana fulu kia bunda e vuvu kwa Nzambi. Yesu wavova vo: “Kuna kwa mpasi z’akwa mavwa bakota muna kintinu kia Nzambi.” (Maku 10:​23) Ozevo, e kimvwama kavana Yesu kwa alongoki andi ke mavwa ko.

Kieleka, ndonga muna Akristu a tandu kiantete asukami bakala. Vava mvanguki mosi wa kingutukila kalomba nzimbu, Petelo wamvutula vo: “E palata yo wolo ke wina yame ko; owu ngina wau i ikuvana. Muna nkumbu a Yesu Kristu wa Nazarete aka, diata.”​—⁠Mavangu 3:⁠6.

E mvovo mia Yakobo misonganga mpe vo e nkutakani y’Akristu ya wantu asukami. Wasoneka vo: “Se nuwe, abunzi ame azolwa; nga ke wau ko, ovo o Nzambi wasol’asukami muna yayi ya nza bavwamina muna lukwikilu, yo vwila kintinu kina kasil’awana banzolele o nsilu e?” (Yakobo 2:⁠5) Paulu wa ntumwa wavova mpe vo ke ven’engi “akwa ngangu za nitu ko,” yovo “akwa ngolo” yovo ‘akwa tunda ko,’ babokelwa mu kala muna nkutakani ya Akristu.​—⁠1 Korinto 1:⁠26.

Wau vo kimvwama kavana Yesu kwa alongoki andi ke kiakinitu ko, ozevo nkia mpila kimvwama kabavana? Muna nkanda kasonekena e nkutakani ya Smurena, Yesu wavova vo: “Nzeye zo e mpasi zaku, yo sukama kwaku kansi kadi u mvwama.” (Lusengomono 2:​8, 9) Kana una vo Akristu kuna Smurena asukami bakala, bakala ye mavwa masundidi ke mu palata ye wolo ko. Mvwama bakala mu kuma kia lukwikilu lwau ye ziku kiau kuna kwa Nzambi. Lukwikilu má kiantalu kadi, ‘ke awonso ko bena ye lukwikilu.’ (2 Tesalonika  3:⁠2) Awana bakondelo lukwikilu, asukami vana meso ma Nzambi.​—⁠Lusengomono 3:​17, 18.

Kimvwama Kilenda Tuka Muna Lukwikilu

O lukwikilu nkia mpila lwinina lwantalu? Awana bena ye lukwikilu muna Nzambi bebakanga e nluta mia vwa “umvwama wa walakazi wandi yo mvuku yo nlandu.” (Roma 2:⁠4) Bevwanga mpe e nluta wa ‘yambulwilwa makuzuka’ mau mu kuma kia lukwikilu lwau muna kimenga kia Yesu. (Efeso 1:⁠7) Vana ntandu, bevwanga e ngangu zina e “diambu dia Kristu” divananga kw’awana bena ye lukwikilu. (Kolosai 3:​16) Vava besambanga kwa Nzambi ye lukwikilu, “o luvuvamu lua Nzambi, luna luviokele nyindu wawonso,” luyingilanga ntima ye makani mau yo kubatwasila e kiese.​—⁠Filipi 4:⁠7.

Vana ntandu a nluta miami miawonso, awana bena ye lukwikilu muna Nzambi ye muna Mwan’andi Yesu Kristu, bena ye vuvu kiasikila kia vwa moyo a mvu ya mvu. Tutomene zaya e mvovo mia Yesu vo: “Muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.” (Yoane 3:​16) E vuvu kiaki kikumikwanga vava o muntu kevwanga o zayi wa Se yo Mwana, kadi Yesu wavova mpe vo: “I wau wuwu o moyo a mvu ya mvu, bazaya ngeye vo i Nzambi aludi, yo Yesu Kristu mpe ona watuma.”​—⁠Yoane 17:⁠3.

Kana una vo e nsambu tuvwanga kwa Nzambi za kimwanda, kansi tuvwanga mpe nsambu za kinitu. Badika e nona kia Dalídio kuna Brasil. Una kayantikidi longoka ludi ko, nduvu a malavu kakala. Evangu diadi diafwasanga zingu kia nzo andi. Vana ntandu, kasadilanga nzimbu zandi mu mpila yambote ko. I bosi, wayantika longoka Nkand’a Nzambi ye Mbangi za Yave, e zingu kiandi kiasoba emvimba.

Mana Dalídio kalongoka mamfila mu yambula e fu yandi yambi. Wanungunuka kikilu muna mwanda yamu tezo kia vova vo, “yakala ye fu kia kwenda nwina malavu mu bare ye bare. Kansi owau nkwenda samunanga nsangu zambote mu nzo ye nzo.” Wakituka se selo kia ntangwa ke ntangwa kia Nzambi. Elongi dia Nkand’a Nzambi ke diansadisa kaka mu tomesa mavimpi mandi ko kansi mu sadila mpe nzimbu zandi mu mpila yambote. Dalídio wavova vo: “E nzimbu yafwasanga mu nua malavu, owau nsadilanga zo mu sadisa awana bena muna mpasi yovo sumba e lekwa ina nzolele.” Walenda mpe akundi ambote kadi ovanganga kikundi y’awana bezolanga Nzambi. Owau Dalídio una ye luvuvamu muna ntima ye kiese kina kateka kala kiau ko una kayantikidi longoka ko.

E nona kia Renato, i nona kiakaka kia muntu wavwamisa zingu kiandi muna kala ye lukwikilu muna Yave wa Nzambi. Kele vo omwene luse lwandi lwakiese, kulendi wo kwikila ko vo mpasi kamona muna zingu kiandi. Vava kawutuka, o ngudi andi wambembola. Wansia muna nkutu yo kunsisa kuna nsi a kunda muna nzila. Ye nkumba wandi walembi zengwa wanwananga muna nkutu yo mana kuyilweka. Akento wole baviokela muna nzila yayina yo mona e nkutu yanikukanga kuna nsi a kunda. Edi babanza vo muntu osisidi mo e mbumba. Kansi, vava bazaya wo vo ke mbumba ko kansi nsedia una mo, bankatula vana vau yo kunanta kuna lupitalu.

Mosi muna akento awaya, Mbangi a Yave, wavovesa diambu diadi kwa Rita una mpe vo Mbangi a Yave. O Rita wana ayingi kasulula, mwana mosi kaka ankento kasala yandi.  Mwan’eyakala kavavanga, ikuma watambula nsedia ndioyo muna kunsansa nze mwan’andi.

Tuka kinsedia kiandi o Rita wazayisa Renato vo ke yandi ko wanwuta. Kansi, wansansa nze mwan’andi ye kunlonga e ludi. Vava kakula, wawokesa etima diandi muna Nkand’a Nzambi. Wavutulanga mpe matondo mu mpil’esivi kavuluzilwa. Meso mandi mezalanga ye mansanga ntangwa zawonso ketanganga e mvovo mia Davidi vo: ‘O s’ame yo ngw’ame ovo bangyambula, o Yave wankonkolola.’​—⁠Nkunga 27:⁠10.

Muna songa luyangalalu lwandi mu mawonso kamvanga Yave, o Renato wavubwa muna mvu wa 2002, yo kota muna salu kia Kikristu kia ntangwa ke ntangwa muna mvu walanda. Yamu wau, kazeye mase mandi ko, ye kena nkutu ye vuvu kia kubazaya ko. Kansi, Renato ozeye wo vo lukau lusundidi o mfunu kavwa i zaya yo kala ye lukwikilu muna Yave wa Se dianzodi.

Nanga i luzolo lwaku mpe lwa kala ye ngwizani ambote yo Nzambi eyi ilenda vwamisa e zingu kiaku. Awonso, amvwama ye asukami bena ye lau dia kala ye ngwizani ambote yo Yave wa Nzambi ye Yesu Kristu. Nanga kukala mvwama muna kinitu ko, kansi okala ye luvuvamu lwa ntima ye kiese ke kilendi sumbwa ko mu nzimbu zawonso za nza yayi. Kieleka, e mvovo mina muna Ngana 10:22 miaziku kikilu: “O lusambulu lua Yave luvwamisanga: Ketensekanga ko mpasi ko.”

Yave wa Nzambi ovwanga kieleka o mfunu awana bekuntombanga. Muna Yesaya 48:18 tutanganga vo: “Ekwe, kele vo wawunikina nkanikinu miame! o luvuvamu luaku luadi kala nze nzadi, o unsongi waku nze mavuku ma kalunga.” Nzambi osianga nsilu vo awana bekuntombanga y’ekani diasikila besambulwa kwayingi: “O nsendo a lulembamu, yo vumi wa Yave, umvwama yo zitu yo moyo.”​—⁠Ngana 22:⁠4.

[Mvovo mia Sina muna lukay lwa 13]

Kana una vo asukami bakala, esi nzo a Yesu ova ntoto basambulwa kikilu kwa Nzambi

[Mafoto zina muna lukaya lwa 14]

Lukwikilu muna Nzambi lutwasanga luvuvamu ye kiese