Finama Nzambi

Vava Nzambi Kelolokanga Muntu, nga Ovilakananga Esumu Diandi?

E MVUTU zankufi i zazi: Elo. Yave osianga nsilu kw’awana kesonganga edienga vo: “Yambulwila ngyambulwila bi wau, o masumu mau kiyindula mo diaka ko.” (Yeremiya 31:​34) Muna mvovo miami, Yave osonganga vo vava kelolokanga masumu m’awana bevilukang’o ntima, ke yindulanga mo diaka ko. Nga diadi disongele vo o Mvangi a nsema ke sungamenanga mo diaka ko? E mvovo mia Yezekele misonganga aweyi Nzambi kelolokelanga yo vilakana.​—Tanga Yezekele 18:​19-22.

Yave wasadila Yezekele wa ngunza muna samuna nsangu za lufundisu kwa nkangu wa nkolami wa Yuda ye Yerusaleme. Nkangu wabembola nsambil’a Yave yo zadisa mavangu ma nsoki muna nsi au. O Yave wasakula vo e Yerusaleme ifwaswa kwa esi Babele. Kansi, kumosi ye nsangu za lufundisu, Yave wabavana mpe e vuvu. Diavavanga vo konso muntu kavanga e nsola, konso muntu wadi fundiswa muna mavangu mandi.​—Tini kia 19-20.

Adieyi tuvova kele vo muntu oyambwidi esumu yo vanga edi diambote? Yave wavova vo: “O kimpumbulu ovo oviluka muna masumu mana kavolele, yo lunda mîna miame miawonso, yo vang’oma ma ndungidi yo unsongi, kala kekala una, kefwa ko.” (Tini kia 21) Elo, avo muntu oyambwidi mavangu masumu yo viluk’o ntima, Yave okunlolokanga.​—Nkunga 86:5.

Adieyi tuvova mu kuma kia masumu kavola? Yave wavova vo: “O makuzuka mawonso mana kakuzukidi ke meyindulwa muna yandi ko: muna unsongi kavangidi i kekadila una.” (Tini kia 22) Ng’omwene? Ndiona ovilukidi o ntima, “mana kakuzukidi ke meyindulwa muna yandi ko.” Adieyi tulenda longoka muna mvovo miami?

Muna Nkand’a Nzambi, o mvovo wa Kiyibere wasekolwa vo “yindula,” mayingi usonganga, ke mu sungamena kaka mana mavioka ko. Nkanda mosi uvovanga vo: “O mvovo wau nkumbu miayingi mavangu uyikanga.” I kuma vo, o “yindula,” dilenda songa vo, “vang’e diambu.” Ozevo, vava Yave kavova vo masumu ma muntu osumukini ke “meyindulwa muna yandi ko,” edi kazola vova vo kevanga diambu ko kwa muntu ndioyo mu kuma kia masumu mandi muna kumfundisa yovo kuntumba. *

E mvovo mia Yezekele 18:​21, 22 misonganga mu nkia tezo Nzambi kelolokelanga masumu. Vava Yave kelolokanga masumu meto, keyindulanga mo diaka ko y’ekani dia kututumba. Kansi, otubanga masumu m’awana bevilukang’o ntima kuna nim’andi. (Yesaya 38:​17) Dina nze yandi ovunzwini masumu ma wantu.​—Mavangu 3:19

Wau vo tu asumuki, nkenda za Nzambi tuvwidi o mfunu. Vana ntandu, nkumbu miayingi tusumukanga. (Roma 3:​23) Kansi, Yave ozolele twazaya vo, avo tuvilukidi kikilu o ntima okutuloloka. Vava Nzambi kekutulolokanga, ovilakananga, keyindulanga diaka masumu meto ko y’ekani dia kutufundisa yovo kututumba. E mvovo miami, mialufiaulwisu kikilu. Nga nkenda za Nzambi ke zikufilanga ko muna kumfinama?

[Mvovo Vana Yand’a]