Lumbu kimosi, Yesu walonganga kuna Yerusaleme mu kuma kia Yave wa S’andi yo senzeka mavangu mambi ma afidi a nsambila za luvunu. (Yoane 8:12-30) Mana kalonga, mesonganga o mfunu wafimpa mana melongwanga o unu mu kuma kia Nzambi. Yesu wavova vo: ‘Ovo nukala muna diambu diame, nu alongoki ame kieleka, nuzay’e ludi, e ludi kikunuvevola.’—Yoane 8:31, 32.

‘Nukala muna diambu diame.’ Muna mvovo miami, Yesu wasonga o mfunu wafimpa malongi ma dibundu mu zaya kana vo ‘maludi.’ Vava owanga diambu mu kuma kia Nzambi, ukiyuvula: ‘Nga diambu diadi ngwizani dina yo Nkand’a Nzambi ye mana Yesu kalonga?’ Tanginina awana bawá malongi ma Paulu yo ‘fimpa e sono lumbu yawonso, mu zaya kana vo mana balongwa maludi.’—Mavangu 17:11.

Marco, Rosa yo Raymonde ana bayikilu kala mun’elongi diantete, bafimpa lukwikilu lwau muna longoka Nkand’a Nzambi ye Mbangi za Yave. Adieyi balongoka?

Marco: “O mpangi watulonganga Nkand’a Nzambi, wasadilanga Nkand’a Nzambi muna vana mvutu za yuvu yeto. O zola kweto muna Yave kwayantika wokela, e ngwizani yo nkaz’ame mpe yakumama.”

Rosa: “Kuna lubantiku, yabanzanga vo mana masonama muna Nkand’a Nzambi, ngindu za wantu ana betezanga sasila una kena o Nzambi. Kansi, malembe-malembe Nkand’a Nzambi wayantika vana mvutu za yuvu yame. Owau ikwikilanga vo Yave una. Ndenda kumbunda e vuvu.”

Raymonde: “Yasamba kwa Nzambi kansadisa muna kunzaya. Ke kolo ko, omono yo nkaz’ame twayantika longoka Nkand’a Nzambi. Twalongoka eludi mu kuma kia Yave. Twayangalala kikilu mu zaya e mpila Nzambi kena.”

Nkand’a Nzambi ke usengomonanga kaka luvunu lulongwanga mu kuma kia Nzambi ko, kansi usonganga mpe eludi mu kuma kia fu yambote ya Nzambi. E ludi kiaki kina muna Diambu diandi diavumunwinwa ye kikutusadisanga mu ‘zay’oma twavaninwa kuna mvevo kwa Nzambi.’ (1 Korinto 2:12) Ekuma olembi fimpila Nkand’a Nzambi mu zaya nani Nzambi, adieyi i kani diandi ye dina kesinga vanga muna wete dieto? Zaya mvutu za yuvu yayi muna nzil’eto ya internete, www.mt1130.com, vana vasonama: “Malongi ma Nkand’a Nzambi > Mvutu za Yuvu ya Nkand’a Nzambi.” Olenda mpe lomba elongi dia Nkand’a Nzambi muna nzila yayi yovo kwa mosi muna Mbangi za Yave. Avo ovangidi wo, omona vo ke diampasi ko mu zola Nzambi.