Kuna vata dia Riga, mbanz’a Letônia yawutukila. Mono yo mpangi ame ankento, ngudi eto watusansa. Kana una vo ngudi ame nkwa dibundu dia Katolika kakala, mu lumbu ya nkinzi kaka twayendanga ku nzo a nzambi. Yakwikilanga muna Mpungu-ngolo, kansi vava yakala nleke mambu mayingi mampukumunanga.

Ekolo yanungunukanga, ngudi ame wabakula vo ndekwa za bangula lekwa yakala zau yo vangulula yo diaka. Ozevo, watokananga muna kunsisa mono mosi mu nzo kadi lekwa yayingi yakala mo. Muna kuma kiaki, wansumbila nkela yasakanena yakala ye salanganu ya tungila nzo. Yatoma yangalelanga e salanganu yayina kadi yabangulanga, yo vangulula yo diaka. Ekolo yasakanenanga salanganu yayina, yayima luzolo lwa nata e tuku-tuku. Ngudi ame wansonekesa muna nsaka za lundumuka ye tuku-tuku zayikilwanga vo Zelta Mopēds. Yakota muna nsaka za nata mvelo, i bosi yakota muna nsaka za lundumuka ye tuku-tuku.

Wau vo nlongoki ambote yakala, ke kolo ko yatoma zayakana muna nsaka zazi za vonza. Nkumbu tatu yasunda e nsaka zazi kuna Letônia ye nkumbu miole yasunda kuna zunga kia Estados Bálticos.

Vava yavwa etunda muna salu kiame, Evija wa makangu mame (ona wakituka nkaz’ame), wasolola nkand’a Mbangi za Yave yo sonekena e vula diau muna lomba longi dia Nkand’a Nzambi. Ke kolo ko, Mbangi zole za Yave bayiza kunkingula yo yantika longoka yandi Nkand’a Nzambi. Kana una vo yamona kiese, kansi muna ntangwa yayina kiavwanga mambu ma mwanda mfunu ko.

Kuna kwalanda, e Mbangi za Yave bandomba yalongoka Nkand’a Nzambi kumosi yo Evija. Yatambulwila yo  yangalela mana yawá. O nsilu wa paradiso va ntoto, i diambu diatoma simba o ntim’ame. Muna bonga e nona, bansonga sono kia Nkunga 37:10, 11, kivovanga vo: ‘Finkolo-kolo kaka, o kimpumbulu, ofwaswa. Kan’otomene tala vana fulu kiandi, ke kala diaka ko. Alembami bevwa nza, beyangalela muna mawete mayingi.’ E sono kiaki kiatoma kungiangidika.

Luzolo lwame muna mambu ma mwanda lwakwamanana wokela. Yabakula vo mabundu mayingi mevunanga. Kansi, malongi ma Nkand’a Nzambi mansivikisa kikilu kadi matoma kiá ye ma ziku.

Ekolo yakwamanana longoka Nkand’a Nzambi yabakula vo Yave ovwanga mioyo mia wantu o mfunu. (Nkunga 36:9) Muna kuma kiaki, kiazola diaka sia zingu kiame mu vonza ko. Kansi, yavava sadila zingu kiame muna vana nkembo kwa Yave. Muna kuma kiaki, etunda, nkembo ye kiese kia nsaka za nata tuku-tuku ke zakala diaka mfunu ko kwa mono.

Muna mvu wa 1996, yayenda kuna lukutakanu lwa mvivu lwa nsi zayingi lwa Mbangi za Yave kuna mbanz’a Tallinn, Estônia, yakala lukufi ye yanzala kiavangilwanga e nsaka za tuku-tuku. Muna lukutakanu lwaluna, yamona wantu a nsi zayingi bakala entwadi kuna luvuvamu. Muna bonga e nona, vava Mbangi mosi a Yave kavidisa nkutu andi, yayindula vo ke mona yo diaka ko. Ke kolo ko, mpangi mosi ankento wasolola yo, i bosi wamvana yo, ke mwavila kana nkutu kima kimosi ko. Yasivika kibeni! Yabakula vo Mbangi za Yave ngwizani bezingilanga ye nsiku mia nkal’ambote mia Nkand’a Nzambi. Evija yo mono twakwamanana nungunuka muna mwanda yo vubwa muna mvu wa 1997.

Mu kuma kia nsaka za nata tuku-tuku yo sia zingu kiau mu vonza, akaka muna akundi ame bafwa. Mun’elongi diame dia Nkand’a Nzambi, yabakula vo mbebe ngina yau kwa Yave wa Mvani a moyo. Ka lukatikisu ko vo, umbakuzi wau wavuluza moyo ame.

Mu mvu yá, mono yo Evija twasala salu kia ntangwa ke ntangwa kuna vula dia Mbangi za Yave kuna Riga. Owau, tuna ye kiese kia sansa mwan’eto Alise yo kunsadisa kimana kakumika zola kwandi muna Yave. Ngina mpe y’elau dia sala lumbu kimosi muna lumingu muna vangulula e lekwa ifwanga kuna suku dia sekolwela. Diakiese mu sadila ndekwa yalongoka muna kileke. Elo, ikwamanananga bangula e lekwa yo vangulula yo diaka.

Muna lusadisu lwa mana yalongoka mu Nkand’a Nzambi, ngina ye kiese kia sila Nzambi aludi e kimbangi kumosi y’esi nzo ame. Kieleka, o nsilu wa paradiso va ntoto wasoba kikilu zingu kiame!