Janet wavova vo: “Ke vavioka kolo kiayingi ko vava se diame kafwa, nkaz’ame wanzayisa vo nkento akaka kakala yandi. Lembi kunkanina, wakutika e mvuatu miandi yo kunsisa yo wana wole.” Janet wabaka e salu, kansi e nzimbu kafutwanga ke zafwananga ko muna lunga-lunga e nzo. Mpasi zayingi kanuana zau, ke za nzimbu kaka ko. Wakudikila mpe vo: “Yatokananga kwayingi kadi e mbebe yawonso ya nzo mu ntu ame yasala. Yakitumbanga wau vo kialendanga vana wan’ame ko yawonso bavuanga o mfunu nze una mase mankaka bavanganga. Yamu wau ikukiyuvulanga kana adieyi bevovanga wantu mu kuma kiame yo wan’ame. Nga bekukiyuvulanga kana vo yavanga mawonso kimana longo lwame lwa lembi fwa?”

E sambu kiasadisa Janet mu kala yo nyindu asikila yo tatidila e ngwizani andi yo Nzambi. “Mu fuku itoma monanga kinsona, ngindu zame kwandá kikilu zikwendanga. O samba yo tanga Nkand’a Nzambi dikunsadisanga mu baka o tulu. E sono kia Filipi 4:6, 7 i kiau itoma yangalelanga, kivovanga vo: ‘Ke nutelamenwa uma moyo ko; kansi muna mambu mawonso, muna sambu yo ludodokelo yo matondo, e ndomba zeno, mbula zazayiswa kwa Nzambi. O luvuvamu lua Nzambi, luna luviokele nyindu wawonso, luyingila ntima mieno, yo makani meno.’ Lumbu yayingi yasambanga fuku amvimba, ediadi diansadisa mu vua luvuvamu lwa Yave.”

E mvovo mia Yesu muna Longi diandi vana Mongo mu kuma kia samba milenda mpe sadilwa muna diambu ditadidi tokana. Wavova vo: “O S’eno ozeye eki nukondelo, una ke nwanlombele ko.” (Matai 6:8) Tufwete sambanga kwa Nzambi. O samba i mpila yantete tulenda ‘finamena Nzambi.’  Nkia nluta dilenda twasa? “Oyandi mpe okunufinama.”—Yakobo 4:8.

O samba nluta miayingi kukututwasilanga, ke vuvika kaka ngindu ko vava tusonganga ntokani zeto. Yave ona “owanga sambu,” ovanganga mpe diambu muna wete di’awonso bekuntombanga kuna lukwikilu. (Nkunga 65:2) E kiaki i kuma Yesu kavovesela alongoki andi vo ‘basambanga lembi yoya.’ (Luka 18:1) Tufwete lombanga luludiku yo lusadisu kwa Nzambi, yo kala ye vuvu vo osenda lukwikilu lweto. Ke tufwete katikisanga ko vo Yave una yo luzolo yo nkuma wa kutusadisa. Avo ‘tukwaminin’o samba’ mu mpila yayi tusonga vo lukwikilu lwasikila tuna lwau.—1 Tesalonika 5:17.

Nki kikilu i lukwikilu? O kala yo lukwikilu divavanga vo ‘twatoma zaya’ Nzambi nze muntu kieleka. (Yoane 17:3) Muna toma zaya Nzambi tufwete longokanga ngindu zandi muna Bibila. Ediadi dikutusadisa mu zaya vo Yave utuzeye ye una yo luzolo lwa kutusadisa. Mayingi mevavuanga mu kala yo lukwikilu lwasikila, ke vua kaka zayi wa Nzambi ko. Divavanga mpe vo twakala ye kikundi kiambote yo Nzambi. Nze una divangamanga kwa yeto wantu, e kikundi yo Nzambi ke kivangamenanga vana vau ko. O lukwikilu lweto lukwamanana ‘wokela’ avo tulongokele mayingi mu kuma kia Nzambi, ‘vanga mana mekunyangidikanga’ yo yindula una kekutusadisilanga. (2 Korinto 10:15; Yoane 8:29) I diau diasadisa Janet mu sunda e ntokani zandi.

Janet wavova vo: “E diambu diasunda kunsadisa mu kala yo lukwikilu lwasikila i mona lusadisu lwa Yave muna mawonso yavanganga. E maka mambu ke twazayanga ko una twadi mo sundila. Kansi muna kwamanana samba, Yave watusadisa muna sunda mo. Vava ikuntondanga, isungamenanga mawonso kavanga muna wete diame. Yave okunsadisanga muna ntangwa ifwene. Wampana akundi akieleka, akala ye akento bena vo Akristu a kwikizi. Bekalanga bakubama muna kunsadisa, besonganga mpe mbandu ambote kwa wan’ame.” *

“Owau, ntoma bakulanga e kuma o Yave kavovela muna sono kia Malaki 2:16 vo: ‘Sindika nkento (yovo vonda o longo) i nsaulanga.’ O vonda longo mpasi zayingi ditwasanga musungula kwa nkazi okondel’e kuma. Mvu miayingi miviokele kala tuka yakala diame kangiambulwila, kansi yamu wau yakinu mona kinsona. Vava imonanga kinsona, ivavanga vanga konso diambu mu sadisa akaka. Ediadi ditoma kunsadisanga mpe.” Muna lembi tokana kwayingi, Janet osadilanga nkanikinu wa Nkand’a Nzambi walembi kuyivaula ye akaka. *—Ngana 18:1.

Janet wavova vo: “O zaya vo Nzambi ‘Se dia wan’ansona ye nzengi a nkanu w’akento afwilwa akala,’ ditoma kumfiaulwisanga. Kesinga kungiambula ko nze una nkaz’ame kavanga.” (Nkunga 68:5) Janet ozeye wo vo Nzambi ke kututontanga muna “bi ko.” Nzambi ovananga ngangu ‘kw’awonso’ kuna mvevo yo “ulolo wa nkuma” kimana twalenda zizidila e ntokani zeto.—Yakobo 1:5, 13; 2 Korinto 4:7.

Adieyi tulenda vanga avo tutokananga kwayingi mu kuma kia zingu kieto kina mu vonza?