Ntu A Diambu Wa Fukwa
Aki Nani i Mbangi za Yave?
“Se kolo yazaya Mike, oyandi Mbangi a Yave. Kansi, yatokananga mu kuma kia dibundu diandi. Yakiyuvulanga: Nani i Yave? Ekuma Mbangi za Yave ke bekembelelanga lumbu ya nkinzi ko? Nkia mpila dibundu diadi kayikotesa?”—Becky, Califórnia, Estados Unidos
“Vava akaka muna belo kieto bayantika longoka Nkand’a Nzambi ye Mbangi za Yave, yakiyuvula: ‘E nkumbu Mbangi za Yave, nkia nsasa ina? Aweyi dibundu dilenda kadila ye nkumbu ya mpila yayi?’”—Zenon, Ontário, Canadá.
“Mono yo nkaz’ame twayindulanga vo Mbangi za Yave batukingulanga muna kututumba wau twalembi kwendanga ku nzo a nzambi. Twakiyuvulanga, avo mabundu matomene zayakana ke melendanga lungisa nsatu zeto ko, aweyi dibundu diadi diampa dilenda wo vangila?”—Kent, Washington, Estados Unidos
“Muna vova e ludi, kiazayanga ko nkia mambu bakwikilanga e Mbangi za Yave.”—Cecilie, Esbjerg, Dinamarca.
Nanga wamona kala e Mbangi za Yave vava besilanga umbangi muna nzo ke nzo, vana fulu ya ndonga, vava bekayanga e nkanda misasilanga Nkand’a Nzambi yo longa wantu e Diambu dia Nzambi. Nanga mosi muna yau wavene o nkanda wau. Kansi, olenda kukiyuvula kana aki nani i Mbangi za Yave. Nanga e ngindu zaku zafwanana ye za wantu bayikilu ova ntandu.
Avo diambu dikutokanesanga yovo yuvu una yau mu kuma kia Mbangi za Yave, akweyi olenda sololwela e mvutu? Aweyi olenda zayila mana e Mbangi za Yave bekwikilanga? Akweyi kutukanga e nzimbu besadilanga e salu yau? Ekuma bekingulwilanga o wantu mu nzo zau? Ekuma bemokenenanga yo wantu vana fulu ya ndonga?
Cecilie ona oyikilu kala wavova vo: “Mambu mayingi yatanga mu kuma kia Mbangi za Yave muna internete. Mayingi mpe mambi yawá mu kuma kiau. Muna kuma kiaki, ngindu zabendomoka yakala zau mu kuma kia Mbangi za Yave.” Kuna kwalanda, Cecilie wamokena ye Mbangi za Yave yo baka e mvutu zakieleka za yuvu yandi.
Nga ozolele baka e mvutu zakieleka za yuvu yaku mu kuma kia Mbangi za Yave? Tukasakese wamokena ye Mbangi za Yave ana bevaikisanga Eyingidilu diadi. (Ngana 14:15) Malongi malende mekusadisa mu zaya kana vo tu aki nani, mana tukwikilanga ye salu tusalanga.
