NTU A DIAMBU WA FUKWA | NGA E SAMBU KILENDA TWASA NLUTA?
Nga Vena yo Muntu Owanga e Sambu?
Akaka beyindulanga vo awana besambanga ntangwa ankatu befwasanga, kadi ka vena kwandi muntu ko okubawanga. Akaka besambanga bemonanga vo e sambu yau ke ivaninwanga mvutu ko. Muntu mosi olembi kwikilanga mu Nzambi wayima ngindu zabendomoka mu kuma kia Nzambi, wasamba kwa yandi vo: “Umpovesa kana nkutu diambu dimosi!” Kansi, wavova vo Nzambi “kamputula diambu ko.”
Kansi, Nkand’a Nzambi ukutuzayisanga vo vena yo Nzambi ona owanga e sambu. Nkand’a Nzambi uvovanga mu kuma kia wantu vo: “O [Nzambi] okumweses’edienga muna nding’a kazu kiaku; ova kewa, vutula kekuvutula.” (Yesaya 30:19) E sono kiakaka kia Nkand’a Nzambi kivovanga vo: “E sambu ki’asongi i kemwena wete.”—Ngana 15:8.
Yesu wasamba kwa Se diandi yo ‘wakana’ kwa yandi.—Ayibere 5:7
Mu Nkand’a Nzambi muna ye nona ya wantu basamba yo wakana kwa Nzambi. Sono kimosi kivovanga vo Yesu ‘wadodokela . . . kwa ndion’olenda kumvuluza . . . ye wawakana.’ (Ayibere 5:7) E nona yakaka, ina muna Daniele 9:21 ye 2 Tusansu 7:1.
Ekuma akaka bemwenanga vo Nzambi kevananga mvutu za sambu yau ko? Muna wakana, tufwete samba kaka kwa Yave * wa Nzambi ke kwa nzambi zankaka ko ngatu kwa akulu eto. Nzambi ovavanga mpe vo twalomba mana mena ngwizani ye “luzolo lwandi.” Nzambi osianga o nsilu vo “wa kekutuwá” avo tuvangidi wo. (1 Yoane 5:14) Avo tuzolele vo e sambu yeto yawakana, tufwete zaya Nzambi ona oyikwanga mu Nkand’a Nzambi yo luzolo lwandi.
Wantu ayingi bekwikilanga vo Nzambi okubawanga yo vana e mvutu za sambu yau. Isaac wa musi Quênia wavova vo: “Yalomba lusadisu muna sambu mu bakula e Diambu dia Nzambi. Ke vavioka ntangwa ayingi ko, muntu mosi wamfinama yo kumpana lusadisu yavuanga o mfunu.” Hilda kuna Filipinas wakala yo luzolo lwa yambula nua fomo. Wavanga mawonso mu yambula e fu kiaki kansi kalenda ko, i bosi o nkaz’andi wamvovesa vo: “Nga ke diambote ko wasamba kwa Nzambi mu lomba lusadisu?” Wasadila luludiku lwa nkaz’andi, i bosi wavova vo: “Yasivika kikilu mu mona una Nzambi kansadisila. Luzolo lwame lwa nua fomo lwayantika kuluka malembe-malembe. I bosi, yayambula e fu kiaki.”
Nga Nzambi una kikilu yo luzolo lwa kusadisa mu ntokani zaku ezi zina ngwizani ye luzolo lwandi?
^ tini. 6 Yave i nkumbu a Nzambi nze una yasengomonwa mu Nkand’a Nzambi.
