Wanzole wa Paulu Kuna kwa Esi Korinto 4:1-18
4 Dianu vo, muna kuma kia uselo wau twavewa mun’owu wa nkenda twafwilwa, ke tuvutukidi manima ko.
2 Kansi tuyambwidi mambu mansoni, mevangilwanga kuna nsweki, ke tukangalelanga mu umpuki ko ngatu bendomona diambu dia Nzambi;+ kansi wau tusengomonanga e ludi, vana ndose a Nzambi tukitukidi se mbandu ambote kwa ntona za wantu awonso.+
3 Avo e nsangu zambote tusamunanga zifukilu, zifukilu vana vena awana bena muna nzil’a lufwasu,
4 vana bena o nzambi a tandu* kiaki+ wavonda meso ma ntima mia mindembi-kwikila,+ kimana o ntemo a nsangu zambote za nkembo a Kristu, ona wina vo i fwaniswa kia Nzambi,+ walembi kubatemena.+
5 Kadi ke tusamunanga muna diambu dia yeto kibeni ko. Kansi, tusamunanga muna diambu dia Yesu Kristu nze Mfumu ye mpila twakitukila ntaudi zeno muna diambu dia Yesu.
6 Kadi Nzambi wavova vo: “Yambula muna tombe mwatemena ntemo,”+ yandi otemenanga muna ntima mieto kimana twabatemesa+ yo nkembo a zayi wa Nzambi vana ndose a Kristu.
7 Kansi, oyeto tuna yo lusalu lwalu+ muna yinzu yatûma,+ kimana ulolo wa nkuma wakala wa Nzambi, ke wa yeto kibeni ko.+
8 Tumweswanga e mpasi muna mpila zawonso, kansi ke yamu tezo kia lembi nikuka ko; tuyangamene ntima, kansi ke tudimbwidi e vuvu ko;+
9 tubangikwanga, kansi Nzambi katuyambwidi ko;+ tubwiswanga, kansi ke tufwasilu ko.+
10 Ntangwa zawonso tuzizidilanga muna nitu zeto e mpasi za lufwa zina Yesu kamona,+ kimana o moyo a Yesu wasengomokena mu nitu zeto.
11 Kadi oyeto wau tuna o moyo tuwanananga ye vonza kia lufwa+ muna diambu dia Yesu, kimana o moyo a Yesu wasengomokena muna nitu zeto zifwanga.
12 Kana una vo oyeto tuwanananga ye vonza kia lufwa, kansi i moyo kwa yeno.
13 Wau tuna yo mwanda wau umosi wa lukwikilu, wauna wasonama vo: “Nkwikidi, i dianu mpovele”;+ oyeto mpe tukwikidi i dianu tuvovele,
14 tuzeye wo vo Ndiona wafula Yesu okutufula mpe yo Yesu, okutusunzula kumosi yo yeno.+
15 Kadi mawonso mama i muna wete dieno, kimana o ulolo wa nsambu za Nzambi zawokela diaka mu kuma kia matondo ma ndonga muna nkembo a Nzambi.+
16 Dianu vo, ke tuvutukidi manima ko, kanele vo e nitu zeto zivuidi yoya, e kiwuntu kieto kia kati kivangululwanga lumbu ke lumbu.
17 Kana una vo e mpasi zeto za kolo kiakete ye zavevoka, nkembo ampwena kikilu zikututwasila, nkembo a mvu ya mvu;+
18 wau tulembele sia meso muna lekwa imonekanga, kansi muna ina ilembi monekanga kaka.+ Kadi e lekwa imonekanga ya kolo kiandwelo kaka, kansi ina ilembi monekanga ya mvu ya mvu.
Mvovo vana yand'a lukaya
^ Tala Nsas’a Mvovo.
