Zasoneka Luka 6:1-49
6 Vava kaviokelenge muna mpatu za masa muna lumbu kia vundu, alongoki andi badokwen’e ntu mia masa,+ bavinzidi mio, badidi.+
2 Vava bamwene wo, akaka muna Afarisi bavovele vo: “Ekuma nuvangilanga e diambu dina vo ke diansongi ko mu Lumbu kia Vundu?”+
3 Kansi, Yesu ubavutwidi vo: “Nga ke nuatanga dio ko dina Davidi kavanga vava kafwa e nzala kumosi ye awana bakala yandi e?+
4 Vava kakota muna nzo a Nzambi yo tambula e mbolo za lutambiku, wadia zo yo vana mpe kw’awana bakala yandi, kana una vo ke diavaninua nswa kwa muntu ko mu dia zo, kansi anganga kaka?”+
5 I bosi, ubavovese vo: “O Mwan’a muntu i Mfumu a Lumbu kia Vundu.”+
6 Muna lumbu kiankaka kia vundu,+ okotele muna sambilu, oyantikidi longa. Mukedi muntu una yo koko kwalunene kwayuminina.*+
7 Asoneki ye Afarisi batungunuini Yesu mu zaya kana vo owuka muna Lumbu kia Vundu, kimana basolola dina bekumfundila.
8 Kansi wau kazaya makani mau,+ ovovese nkwa koko kwayuminina* vo: “Telama, wiza ova kati.” Otelamene, wele vana kati.
9 I bosi Yesu ubavovese vo: “Diambu ikunuyuvula, Nga diansongi mu vanga o wete yovo mbi mu Lumbu kia Vundu, vuluza moyo yovo fwasa wo?”+
10 Vava katadidi yau awonso, ovovese o muntu vo: “Lambula o koko kwaku.” Oyandi ovangidi wo, o koko kwandi kusasukidi.
11 Kansi, oyau bafungidi kikilu makasi, bayantikidi vovaziana dina balenda vanga kwa Yesu.
12 Lumbu kimosi muna lumbu yoyo, Yesu wele vana mongo kimana kasamba,+ osambidi kwa Nzambi fuku wawonso.+
13 Vava kuma kwakia, obokele alongoki andi, osolele 12 vana bena, ubayikidi vo antumwa:+
14 Simone, ona kavana mpe nkumbu a Petelo yo Andere wa mpangi andi, Yakobo, Yoane, Filipo,+ Batolomai,
15 Matai, Toma,+ Yakobo wa mwan’a Alefayo, Simone ona oyikilwanga vo “nkwa vema,”
16 Yuda wa mwan’a Yakobo yo Yuda wa musi Kereote, ona wakituka se nyekodi.
17 Okulumukini yau, otelamene vana ndimba, vakedi ndong’ayingi ye alongoki andi yo nkangu wayingi watuka muna Yuda yawonso ye muna Yerusaleme, ye muna nlambu a mbu a Turo ye Sidone, ana bayiza wá yo wukwa yimbevo yau.
18 Kana nkutu awana babangikwanga kwa mianda mia usafu bawukilu.
19 E ndonga yawonso ivavidi kunsimba kadi ngolo zavaikanga muna yandi+ yo wuka yau awonso.
20 Otadidi kuna kwa alongoki andi, ovovele vo:
“Kiese kwa yeno asukami, kadi e Kintinu kia Nzambi i kieno.+
21 “Kiese kwa yeno nufwanga e nzala owau, kadi nuyukuta.+
“Kiese kwa yeno nudilanga owau, kadi nuseva.+
22 “Nukala ye kiese konso ntangwa o wantu bekunumenga,+ kunubembola,+ kunuveza yo yivisa e nkumbu zeno nze yimpumbulu muna diambu dia Mwan’a muntu.
23 Numona kiese yo yangalala muna lumbu kiakina, kadi o nsendo eno wanene kuna zulu, i wau mpe bavanga mase mau kuna kwa angunza.+
24 “Tâtu kwa yeno mvuama,+ kadi nutambwidi kala lufiaulwisu lweno.+
25 “Tâtu kwa yeno nuyukwiti owau, kadi nzala nufwa.
“Tâtu kwa yeno nusevanga owau, kadi nukendalala yo dila.+
26 “Tâtu kwa yeno, avo nusanisinua kwa wantu awonso,+ kadi i wau mpe mase mau bavanga kuna kwa ngunza zaluvunu.
27 “Kansi, mpovele kwa yeno nuwanga vo: Nukwamanana zola e mbeni zeno, nuvanga mawete kwa awana bekunumenganga,+
28 nusambula awana bekunusibanga yo samba mu kuma kia awana bekunutiangunanga.+
29 Ndiona okuwanda vana bundi dimosi, untambika diankaka; ndiona obonga kinkutu kiaku, unyambulwila mpe e yunga kiaku.+
30 Konso ona okulomba, umvana,+ ona obonga lekwa yaku, kunlombi yo ko.
31 “Konso una nuzolele vo wantu banuvanga, i una mpe nuvanga kwa yau.+
32 “Avo nuzolele kaka awana bekunuzolanga, nkia nluta dina kwa yeno? Kadi, kana nkutu asumuki bezolanga awana bekubazolanga.+
33 Avo nuvanga mawete kwa awana bekunuvanganga mawete, nkia nluta dina kwa yeno? Kadi, kana nkutu asumuki diau dimosi bevanganga.
34 Avo nusompekele* kwa awana nuzeye vo bekunuvutulwila, nkia nluta dina kwa yeno?+ Kana nkutu asumuki besompekanga akw’au asumuki yo tambula kaka kina basompekele.
35 Kansi tu, nuzolanga atantu eno, yo kubavanga mawete, nusompekanga yo lembi vingila vo banuvutulwila diaka;+ ozevo o nsendo eno wayingi ukala ye nukala wan’a Mpungu-nene, kadi oyandi nkwa ngemba kuna kwa ntokozi ye kwa wantu ambi.+
36 Nukwamanana songa e nkenda, nze Se dieno una vo nkwa nkenda.+
37 “Vana ntandu, nuyambula fundisa kimana nualembi fundiswa;+ nuyambula yelesa kimana nualembi yeleswa. Nulolokanga,* ozevo nulolokwa.*+
38 Nukayanga, ozevo o wantu bekunukayila.+ Nuvaninua muna mfokola zeno e nzongo ambote, waniemenenua, wabandilwa, yo siwa mabetomona. Kadi muna nzongo una nuzongela i nuzongelwa mpe.”
39 I bosi, ubatelele kingana vo: “Nga o mpofo olenda kwandi fila nkwandi mpofo e? Yau awole, nga ke bebwa muna wulu ko e?+
40 O nlongoki kasundidi nlongi andi ko, kansi konso ona otomene longwa, okala nze nlongi andi.
41 Ozevo, aweyi omwenene titi kina muna disu dia mpangi aku, kansi kumwene mwangu una mu disu diaku ko?+
42 Aweyi olenda vovesela mpangi aku vo: ‘E mpangi, yambula yakatula e titi kina mu disu diaku,’ ekolo ngeye kibeni kumwene o mwangu una mu disu diaku ko e? Mpuki! Teka katula o mwangu una mu disu diaku, i bosi, otoma mona una olenda katulwila e titi kina muna disu dia mpangi aku.
43 “Kadi o nti ambote ke uyimanga mbongo ambi ko, ngatu nti ambi wayima mbongo ambote.+
44 Kadi konso nti uzayilwanga muna mbongo andi.+ Muna bong’e nona, wantu ke bevelanga bundu ya nsanda muna nsende ko, ngatu vela uva muna nti a nsende.
45 O muntu ambote muna lusalu lwambote lwa ntim’andi i kevaikisilanga oma mambote, kansi o muntu ambi muna lusalu lwandi lwambi i kevaikisilanga oma mambi; kadi o nu’andi uvovanga mana mazele muna ntima.+
46 “Ekuma nukungikilanga vo: ‘e Mfumu, e Mfumu,’ kansi mana ivovanga ke nuvanganga mo ko?+
47 Konso ona okwiza kwa mono yo wá mambu mame, yo vanga mo, ikunusong’owu kena:+
48 Ofwanane yo muntu una vo muna tunga e nzo, otimini yamuna sina, okubidi e nkubilwa vana nsenzele. Vava e kizalu kizidi, e nkukwila iwandamene muna nzo yayina, kansi ke ilendele yo nikuna ko, kadi yatoma tungwa.+
49 Kansi, konso ona owidi mo yo lembi vanga diambu,+ una nze muntu otungidi nzo vana ntoto lembi kuba e nkubilwa. E nkukwila iwandamene muna nzo, vana vau ibwidi yo kosomoka.”
Mvovo vana yand'a lukaya
^ Yovo “kwakonzama.”
^ Yovo “kwakonzama.”
^ I sia vo, lembi vingila nluta.
^ Yovo “nuyambulwilwa.”
^ Yovo “Nuyambulwilanga.”
