Kwa Tito 1:1-16
1 Paulu, wa ntaudi a Nzambi ye ntumw’a Yesu Kristu, mun’owu wa lukwikilu lwa awana basolwa kwa Nzambi yo zayi wasikila wa ludi, una ngwizani yo vumi wa Nzambi,
2 muna vuvu kia moyo a mvu ya mvu,+ una kasia o nsilu tuka kuna nz’ankulu, o Nzambi ona kalendi vuna ko;+
3 kansi muna ntangw’andi, wazayisa e diambu diandi muna nsangu zina yayekekwa+ mun’owu wa lutumu lwa Nzambi wa Mvuluzi eto;
4 kuna kwa Tito, wa mwan’ame kikilu mun’owu wa lukwikilu tuna lwau e ntwadi:
Yambula wakala ye nsambu ye luvuvamu lutuka kwa Nzambi wa Se yo Kristu Yesu wa Mvuluzi eto.
5 Yasisa koko Kerete kimana wasingika mambu matekama yo tumbika akuluntu muna konso mbanza, wauna yakanikina:
6 o nkuluntu kafwete kala ye mfundu ko, yakala dia nkento mosi, una yo wana minkwikizi ana bakondelo mfundu a mavangu ma usafu* yovo ukolami.+
7 Wau vo ntaudi a Nzambi, o nkengi kafwete kala ye mfundu ko, ke nkwa kuyitundidika ko,+ ke funganga makasi mu nzaki ko,+ ke nduvu a malavu ko, ke nuananga ko, ke nkwa loko dia vava nluta mu mpila yambi ko,
8 kansi nzodi a nzenza,+ nzodi a mawete, nlungaladi,*+ nkwa unsongi, nkwa ziku,+ nkwa volo,+
9 otatidilanga e diambu diakwikizi* muna malongi mandi,+ kimana kakala wafwana mu kasakesa* muna longi diavimpi*+ yo tumba+ akwa mpaka.
10 Kadi akolami ayingi bena, bemokenenanga mambu makondwa o mfunu, avunginiki, musungula awana betatidilanga e fu kia zengwa.+
11 Diambote wantu awaya bakakwa e nua, e kuma kadi bebendomonanga nzo za mvimba muna longa mambu ke bafwete longa ko kimana bavua nluta mialembi songa.
12 Mosi muna yau, i ngunz’au, wavova vo: “Esi Kerete akwa luvunu, bulu yansisi, miolo miazola o dia.”
13 O umbangi wau waludi. Muna kuma kiaki, kwamanana kubatumba, kimana bakala yo vimpi muna lukwikilu,
14 balembi tambanga o matu muna savu ya Ayuda ye nkanikinu mia wantu ana babembola e ludi.
15 Kuna kwa awana bavelela, e lekwa yawonso yavelela;+ kansi kuna kw’awana bafunzuka yo kondwa lukwikilu, ke vena lekwa kiavelela ko, kadi e ngindu zau ye ntona zau zafunzuka.+
16 Bekuyisananga vo bazeye Nzambi, kansi muna mavangu mau nkalu bekumvaninanga,+ e kuma kadi bangemi, akolami yo lembi fwana muna konso salu kiambote.
Mvovo vana yand'a lukaya
^ Yovo “ma umpumbulu.”
^ Yovo “nkwa umbakuzi.”
^ Yovo “nsangu za ziku.”
^ Yovo “wondelela.”
^ Yovo “diambote; diamfunu.”
