Kimbevo kia Kinsona mu Wokela Kaka Kina—E Bibila Adieyi Kivovanga?
O lufimpu lwavangamene mu nza yawonso lusonganga vo vana vena wantu ya mosi kimbevo kia kinsona keyelanga. a
“E diambu dia kuyivambula mu kuma kia mambu mampasi, dilenda bwila wantu a ntela zawonso ye muna fulu yawonso.”—Chido Mpemba, copresidente da Comissão de Conexão Social da Organização Mundial da Saúde.
Nswaswani ye ngindu za wantu ayingi, e kinsona kilenda bakama kwa konso muntu, tuka ambuta, aleke, awana bena yo vimpi wambote , awana bena ye zingu kiambote ye awana basompa. Kuyivambula mu kuma kia mambu mampasi ye kinsona, dilenda twasila muntu mfwilu muna nitu ye ngindu.
O dotodolo dia lupasu, Vivek Murthy kuna Estados Unidos wavova vo: “E kinsona mpasi zayingi kitwasanga, ke yindula kaka mambu mambi ko. O mfwilu kebakanga o muntu mu kuma kia vavuka akaka miafwanana ye mfwilu kebakanga o muntu onuanga 15 sigarete muna lumbu kimosi.”
E Bibila adieyi kivovanga?
O Mvangi eto kazolele ko vo twavavukanga akaka. I kani dia Nzambi vo wantu bakalanga ye kikundi kiambote ye kiakiese ye akaka.
Nkanikinu wa Bibila: “Nzambi ovovele vo: “Ke diambote ko kwa yakala kakwamanana kala yandi mosi.”—Tuku 2:18.
Nzambi ozolele vo twakala ye ngwizani ambote yo yandi. Osianga nsilu vo avo tuvangidi e ngolo muna kumfinama, yandi mpe okutufinama.—Yakobo 4:8.
Nkanikinu wa Bibila: “Kiese kwa awana bazeye vo mambu ma Nzambi bavuidi o mfunu, kadi e Kintinu kia zulu i kiau.”—Matai 5:3.
Nzambi ozolele vo twakalanga entwadi ye akaka vava tukunsambilanga. Vava tuvanganga ediadi, dikutusadisanga mu kala ye kiese.
Nkanikinu wa Bibila: “Yambula twayinduziananga kimana twasikamesa o zola ye mavangu mambote kwa muntu yo nkwandi, ke tuyambula kutakana ko, . . . kansi tukasakesanga muntu yo nkwandi.”—Ayibere 10:24, 25.
Muna zaya mambu mayingi mesonganga e kuma tufwete vengela e kinsona, tanga e longi “Solidão num mundo interligado.”
a O Estado Global das Conexões Sociais, por Meta e Gallup, 2023.