E nkunga i lukau lwambote lwatuka kwa Yave. E nkunga milenda simba e ntima mieto, milenda kututwasila kiese ye nkenda yo kutukasakesa. Ediadi ditoma monekanga muna nkunga mia TV ya Mbangi za Yave. Edi disundidi o mfunu, e nkunga miami milenda kutufinamesa yo Yave.

 Tuka muna mvu wa 2014, vioka 70 lwa nkunga mivaikiso kala muna TV ya Mbangi za Yave. Miayingi muna nkunga miami misekwelo kala mu vioka 500 za ndinga. Nanga wakiyuvula kala: ‘Aki nani bekubikanga e nkunga miami ye aweyi mikubikilwanga?’

 E nkunga mivaikiswanga muna TV ya Mbangi za Yave mikubikwanga kwa buka kia ampangi ana betalanga e diambu dia nkunga muna departamento ya Audio/Video, isadilanga muna lutumu lwa Buka kia Alongi kia Selo Yambuta. Mpangi 13 zamakala ye z’akento besadilanga mu buka kiaki. Akaka muna yau akubiki a nkunga, akaka akwa umbangu wa nkunga ye akaka moko kaka bevananga muna mambu mankaka. Vana ntandu, e Buka kia Alongi kivananga o nswa kwa ampangi ana bekuyivananga kuna mvevo mu yikama e salu kiaki tuka muna nzo zau. Akaka muna mpangi zazi a kubiki a nkunga, asiki a miziki ye ayimbidi. Mpangi zazi kuna lulembamu lwawonso besadilanga ngangu zau lembi vava tunda dia yau kibeni.

 E nkunga mia TV ya Mbangi za Yave aweyi mikubikilwanga? Entete, e Buka kia Alongi besolanga e sono kia Nkand’a Nzambi kikala se nto a nkunga ye zú diandi. I bosi, e buka kia ampangi ana betalanga e diambu dia nkunga, besola o nkubiki a nkunga ye nsoneki. Kuna kulanda, bebandula e nkunga muna zú diantete. E Buka kia Alongi befimpa o nkunga ubandwilu muna zú diantete yo vana tuludiku twankaka. I bosi, e buka kia ampangi ana betalanga e diambu dia nkunga besingika mawonso mavwilu o mfunu yo bandula wo muna zú dia nsuka. E nkunga miami mu fulu yaswaswana mibandulwilwanga, tuka muna mavula ye muna fulu yankaka ya bandulwila e nkunga.

 Muna kubika yo bandula e nkunga mia TV ya Mbangi za Yave, e mpangi zeto programa za mpila mu mpila za computador besadilanga. Divavanga mpe vo basadila salanganu yankaka ya miziki, nze misturadora de som, amplificador, auto-falantes ye microfone. Konso microfone ilenda fwa 100 yovo 1000 dia nzimbu za dolare. Muna mvu wa 2020, 116,000 ma nzimbu za dolare twasadila muna sumba e salanganu ya bandulwila e nkunga.

 Nkia ngolo zivangwanga muna lembi fwasa e nzimbu zayingi? Vana fulu kiakala ye buka yampwena ya miziki ku Betele, mpangi zayingi bevananga lusadisu mu salu kiaki tuka muna zinzo zau. Kuna diak’e sambu, vana fulu kia vanga orquestra yampwena, mpangi zeto bekubikanga yo vaikisa nkunga muna computador.

 E mpangi zeto betoma yangalalanga e nkunga mia TV ya Mbangi za Yave. O Tara ona okalanga kuna Alemanha wavova vo: “E nkunga miami mikunsadisanga mu vuvika o ntima vava ikalanga ye ntokani. Vava iwanga e nkunga miami muna nding’ame ya kingutukila, imonanga nze Yave umbimbakene.” O mpangi Dmitry kuna Casaquistão wavova vo: “Vava ilandanga e nkunga miami kitokananga ko kana vo ngwizani mina ye nkanikinu mia Nkand’a Nzambi. Edi disundidi o mfunu, e nkunga miami mikunsadisanga mu sia sungididi mu mambu ma mwanda.”

 Delia kuna África do Sul wasonga una kemonanga vava kewanga e nkunga mia TV ya Mbangi za Yave: “E nkunga miami lukwikilu lwame mikumikanga. Vava ikendalalanga yovo lwakilwa e diambu diampasi, ntangwa zawonso vesolokanga e nkunga una betela ye diambu diodio. Nkumbu miayingi, e zú diankatu dia nkunga miami dikunsadisanga mu vuvika o ntima.”

 Kuna kw’akaka vena ye nkunga mia TV ya Mbangi za Yave mina betoma yangalalanga. Lerato okalanga mpe kuna África do Sul wavova vo: “O nkunga ‘E Nz’ampa Tumwene yo mu Meso’ ye ‘Logo vai chegar’ mikunsadisanga mu mona nze mono kina mu lumbu kina yitambula o mama muna lufuluku. Konso ntangwa iwanga e nkunga miami, imonanga nze yandi okwizanga e ntinu muna kumbimbakana.”

 Umosi muna nkunga mia TV ya Mbangi za Yave, wasadisa e dumbelele kimosi kuna Sri Lanka. Wavova vo: “O nlongi ame a ciência wayantika kumveza vana meso ma akwame muna kalasi wau vo i Mbangi a Yave. Yabakama kwa wonga, kiamona ko e diambu yafwana vova. Vava yalwaka kuna nzo, o mama wankasakesa kimana yawunikina o nkunga ‘O estudo me faz bem.’ O nkunga wau wansadisa mu zaya o mfunu wa vavululanga mambu yo kala wakubama muna vana e mvutu kwa konso muntu. Muna lumbu kialanda, yamokena ye nlongi ame. Watoma winikina ye wavova vo yansadisa mu bakula mana bekwikilanga Mbangi za Yave. Ivutulanga matondo kwa nkubik’a Yave ikutukubikilanga e nkunga miami mia lukasakeso.”

 Akweyi kutukanga e nzimbu zisadilwanga mu vaikisa e nkunga miami? Muna nkayilu mivewanga mu kuma kia salu kieto kia nz’amvimba ye miayingi muna nkayilu miami mu nzil’eto donate.mt1130.com mivaninuanga. Tunuvutwidi matondo mu kuma kia nkayilu mieno nuvaninanga kuna mvevo.