Ke kolo ko Yesu kavutukidi e longi diandi mu kuma kia sambu. Kansi ke diambu diadi kaka ko kevovelanga muna salu kia umbangi. Vava kavanga e sivi muna Ngalili, wantu bavova vo Yesu muna nkuma wa mfumu a nkuya kevaikisilanga nkuya. Owau muna Yuda o wantu bavovele wo diaka.

Vava Yesu kavaikisi nkuya wakitula muntu mosi se baba, o nkangu usivikidi. Kansi atantu andi ke bayangalele ko. Bavovele diaka o mfundu a luvunu, oku vo: “Muna Belezebube wa mfumu a nkuya, i kevaikisilang’e nkuya.” (Luka 11:15) Akaka bazolele zaya kana Yesu nani kena, banlombele kavanga e nsisu kituka kuna zulu.

O Yesu wau kabakwidi vo tonta bazolele kuntonta, ubavene mvutu wauna kavanina e mvutu kwa atantu andi kuna Ngalili. Ovovele vo, konso kintinu kivambanene ke kisikila ko, “avo Satana wiyivambwidi, e kintinu kiandi aweyi kisikidila? I bosi, Yesu ovovele vo: Kansi, avo muna nlembo a Nzambi ivaikisilang’e nkuya, ozevo e Kintinu kia Nzambi kinuluakidi kikilu.”—Luka 11:18-20.

Muna vovela “lembo a Nzambi,” nanga disungamese o nkangu dina diavangama kuna Isaele. O wantu kuna lûmbu lwa Faro bamona Mose wavanga e sivi, bavova vo: ‘Owau i nlembo a Nzambi.’ Kieleka, ‘e babu yole ya umbangi, babu ya matadi, yasonekwa kwa nlembo a Nzambi.’ (Luvaiku 8:19; 31:18) Diau dimosi mpe, o “nlembo a Nzamb,i” i sia vo, mwand’avelela yovo ngolo za Nzambi, i zau zisadisanga Yesu mu vaikisa nkuya yo wuka mbevo. E Kintinu kia Nzambi kilwakidi atantu awaya, kadi Yesu wa Ntinu a Kintinu kia Nzambi ovanganga masivi mama, una yau vamosi.

O nkuma una Yesu kevaikisilanga e nkuya, i ziku kisonganga vo Yesu osundidi Satana muna nkuma, dina nze nkwa ngolo osundidi kesa osimbidi nkele yo langidila lûmbu lwa mfumu andi. Yesu ovutukidi diaka e kingana kia mianda miambi miavaika kwa muntu mosi. Avo muntu ndioyo kakotese mambu mambote ko muna ngindu zandi, o mwanda wowo uvutuka kumosi ye mianda nsambwadi miankaka, e kadilu kiansuka kia muntu ndioyo kivioka kiantete o bi. (Matai 12:22, 25-29, 43-45) I diau diabwila zula kia Isaele.

Ekolo Yesu kevovanga, nkento mosi okazidi vo: “Kiansambu e vumu kina kiànata ye ntulu zina wayema!” Akento a Ayuda bakala ye vuvu kiakala ngudi a ngunza, musungula Masia. Dianu vo, o nkento ndioyo nanga oyindwidi vo Maria nkwa nsambu wau kina vo yandi i ngudi a nlongi ndioyo. Kansi, Yesu osembele nkento ndioyo ye osongele diambu ditwasanga kiese kiasikila, ovovele vo: “Ke wau ko, akwa nsambu ana bewanga e diambu dia Nzambi yo lunda dio!” (Luka 11:27, 28) Yesu kasidi vova ko vo Maria kafwete tundidikwa. Kwa wantu awonso, yakala yovo nkento, e kiese kiasikila kikwizanga muna sadila Nzambi ye kwikizi kiawonso, kansi ke mukala yitu kia nengandi ko yovo mu kuma kia mambu mana tuvanganga muna zingu.

Nze una Yesu kavanga muna Ngalili, otumbidi o nkangu wau balombele vo kabasonga e sinsu kituka kuna zulu. Yesu ovovele vo ke besongwa kana sinsu kimosi ko, nanga “sinsu kia Yona kaka.” Yona wakala se sinsu wau kakala lumbu tatu muna vumu kia mbizi, wau kasakula yo unkabu yo sadisa esi Ninive baviluka o ntima. Yesu ovovele vo: “Kansi tala, oyu osundidi Yona una vava.” (Luka 11:29-32) O Yesu osundidi mpe Solomo wa nkwa ngangu ona wakingulwa kwa ntinu ankento a Seba.

Yesu ovovele diaka vo: “Ke vena muntu ko okwika mini, kasia kio vana fulu kiaswekama, ngatu kuna nsi a mbangu, kansi vana fulu kiazanguka kaka.” (Luka 11:33) Nanga edi kazolele vova vo, o longa yo vanga masivi vana meso ma nkangu wau dina nze muntu oswekele ntemo a mini. Kadi o meso mau ke mena mona ko, ke babakwidi o mfunu a salu kia Yesu ko.

Yesu nkuya mosi kaka kavaikisi, owukidi mpe baba dimosi. E sivi diadi difwete fila nkangu mu kembelela Nzambi yo zayisa mavangu ma Yave kwa wantu akaka. Dianu vo, Yesu olukisi atantu andi muna mvovo emi: “Lungalala kimana o ntemo wina omo ngeye walembi kala se tombe. E nitu aku yawonso avo itemokene, kondwa ndambu a tombe, yawonso itemoka nze una mini kikuvaninanga o ntemo.”—Luka 11:35, 36.