Aweyi Yesu Kakala Muna Mpwa?

WINIKINA MU

Mvutu za Bibila

Ke vena muntu ko otomene zaya una wakala e mpw’a Yesu, kadi Bibila ke kivovelanga diambu diadi ko. Ediadi disonganga vo e diambu ditadidi mpw’andi ke dina kibeni mfunu ko. Kansi, Bibila kisonganga e mpila muntu Yesu kakala.

Mpwa: Wau vo Yesu Nyuda kakala disongele vo wakala ye fu ya nkangu a ngudi andi. (Ayibere 7:14) Nanga kakala waswaswana ko ye akaka, kadi vava katuka kuna Ngalili yo kwenda kuna Yerusaleme muna kinsweki, ke muntu ko wanzayidila. (Yoane 7:10, 11) E mpw’a Yesu ke yakala yaswaswana ko kana nkutu vana kati kwa alongoki andi. I dianu Yuda wa musi Kereote kavanina nsisu kwa wantu ana bayenda kanga Yesu.—Matai 26:47-49.
Nsuki: Nanga Yesu kakala ye nsuki zandá ko, kadi Bibila kivovanga vo: “Dia nsoni kwa yakala mu kala ye nsuki zandá.”—1 Korinto 11:14.
Nzevo: Yesu wakala ye nzevo. Walandanga Nsiku wa Ayuda wasimanga wana makala mu ‘zenga nzevo zau.’ (Levitiku 19:27; Ngalatia 4:4) Vana ntandu, Bibila kivovelanga nzevo za Yesu muna ungunza uyikanga e mpasi kadi mweswa.—Yesaya 50:6.
Nitu: Yesu nitu yakumama kakala yau, kadi vava kasalanga e salu kia umbangi, wakangalanga kia malu kilometa zayingi. (Matai 9:35) Mu nkumbu miole, wayenda muna tempelo yo kindula meza ma wantu batekanga e lekwa muna tempelo. Nkumbu wankaka, wabaka nzwangi yo yinga e bulu yatekwanga muna tempelo. (Luka 19:45, 46; Yoane 2:14, 15) Nkanda mosi wa enciclopédia uvovanga vo: “Mambu mawonso masonama muna Nsangu Zambote, mesonganga vo Yesu ngolo ye mavimpi mambote kakala mau.”—Volume IV, lukaya lwa 884.
Ndose: Yesu wasonganga nkenda ye ngemba, ediadi diamonekanga vana ndose andi. (Matai 11:28, 29) Wantu a mpila zawonso bayendanga kwa yandi muna fiaulwiswa yo baka lusadisu. (Luka 5:12, 13; 7:37, 38) Kana nkutu yingiana-ngiana bazolanga kala vana ndambu andi.—Matai 19:13-15; Maku 9:35-37.

Ngindu zabendomoka mu kuma kia mpw’a Yesu

Ngindu zabendomoka: Akaka bekwikilanga vo Yesu wafwanana ye esi Africa kadi nkand’a Lusengomono utezanesanga nsuki zandi ye mika miampembe ye malu mandi nze ‘nsongo uveleleso.’—Lusengomono 1:14, 15.

Ludi: Nkand’a Lusengomono “sinsu” uyikanga. (Lusengomono 1:1) Vava nkanda wau uvovelanga nsuki ye malu ma Yesu, ke uyikanga mpw’andi ko vava kakala ova ntoto. Kansi, uvovelanga e fu Yesu kadi kala yau kuna nim’a lufuluku lwandi. Muna Lusengomono 1:14, Bibila kivovanga vo, o “ntu [a Yesu] ye nsuki zandi zampembe nze mika miampembe ye mvul’ampembe.” Ediadi disonganga e se kia nsuki zandi kansi ke mpil’a nsuki zandi ko. Disunzulanga ngangu za Yesu wauna muntu ona wina ye nsuki za mpembe kekadilanga ye ngangu.—Lusengomono 3:14.

Malu ma Yesu mena nze “nsongo ambote ukezimanga wau uveleleso vana fulu dia tiya.” (Lusengomono 1:15) E ndose andi iyikilwanga mpe “nze ntangwa olezimanga muna ngolo zandi.” (Lusengomono 1:16) Ke vena nkangu ko una ye mpw’a mpila yayi, e diadi disongele vo e mona-meso kiaki i sinsu kisonganga vo vava Yesu kafuluka wayenda zingila muna “ntemo ulembi finamwa,” i sia vo ke vena muntu ko olenda kumona.—1 Timoteo 6:16.

Ngindu zabendomoka: Yesu muntu watovoka kakala.

Ludi: Yesu nkwa nkuma kakala ye nkwa unkabu. Muna bonga e nona, vava wantu bayenda kunkanga, kuna unkabu wawonso wakisunzula. (Yoane 18:4-8) Yesu ngolo mpe kakala zau, kadi e salu kia kimvadi a nti kasalanga kivavanga vo muntu kakala ye ngolo.—Maku 6:3.

Ozevo, ekuma Yesu kavavila lusadisu mu nata e nti andi ampasi? Ekuma kafwila vitila wantu wole bakala vana ndambu andi? (Luka 23:26; Yoane 19:31-33) Vitila Yesu kavondwa, wayoya kakala. Waviokesa fuku wamvimba lembi leka mu kuma kia mambu mantokanesanga. (Luka 22:42-44) Muna fuku wauna, wamweswa mpasi kwa Ayuda ye muna mene wawandwa kwa esi Roma. (Matai 26:67, 68; Yoane 19:1-3) Mawonso mama, mafila Yesu mu fwa mu nzaki.

Ngindu zabendomoka: Yesu nkwa lukendalalu kakala, kakalanga wayanza ko.

Ludi:Yesu watanginina e fu ya Se diadi dia zulu mu mpila yalunga. Bibila kiyikilanga Yave vo: “Nzambi a kiese.” (1 Timoteo 1:11; Yoane 14:9) Yesu walonga akaka una balenda kadila ye kiese. (Matai 5:3-9; Luka 11:28) Ediadi disongele vo Yesu nkwa kiese kakala, diamonekanga muna mpw’andi.