Inga. Bibila kwa Nzambi kiatuka ona ‘ofiaulwisanga awana bakendalele e ntima.’ Kanele vo Bibila ke nkanda wa mawuku ma kimbevo kia ntu ko, kisadisanga wantu ayingi bakala ye ngindu za kukivonda. E malongi mamfunu mena mo malenda mpe kusadisa.

•  Nkia malongi mamfunu Bibila kivananga?

•  Nga Bibila kivovelanga wantu ana bazola fwa?

•  Nkia sono ya Bibila ilenda kusadisa mu venga ngindu za kukivonda?

•  Adieyi ovanga avo nkundi aku uvovese vo, “Nzolele fwa kwame”?

•  Nga yabakama kala ngindu za kukivonda?

• ● Zayisa kwa akaka una omonanga.

   Bibila kivovanga vo: “Nkundi akieleka ozolanga e ntangwa zawonso, i mpangi wawutuka mu kuma kia ntangw’ampasi.”—Ngana 17:17.

   Ediadi disongele vo: Vava tunuananga ye ngindu zambi, lusadisu lwa wantu ankaka tuvuanga o mfunu.

   Avo kuzayisi kwa akaka ko una omonanga, vekala ye ntangwa kulenda diaka zizidila ngindu zazi zambi ko. Kansi, avo ozayisi kwa nkundi aku una omonanga, e ngindu zazi zambi zilenda kuluka ye dikusadisa mu soba mpila omwenanga e diambu diadi.

   Teza sadila longi edi: Mokena yo muntu o unu, dilenda kala yitu yovo nkundi ona otoma bundanga e vuvu. a Olenda mpe soneka muna nkanda una omonanga.

• ● Vava lusadisu kwa madotolo.

   Bibila kivovanga vo: “Awana bena yo vimpi ke bevuanga ngang’a mawuku mfunu ko, kansi ambevo bekumvuanga o mfunu.”—Matai 9:12.

   Ediadi disongele vo: Avo tuyelele, tufwete vava lusadisu lwa madotolo.

   Okala ye ngindu za kudivonda, dilenda songa vo muntu kimbevo kia ntu kena kiau. Wauna ke tumwenanga nsoni ko avo tuyelele muna nitu, ke tufwete mpe mwena diambu diadi nsoni ko. E kimbevo kia ntu, kilenda mpe wukwa.

   Teza sadila longi edi: Vanga mawonso muna vava lusadisu lwa dotolo diambote.

• ● Sungamena dio vo Nzambi mfunu kekuvuanga.

   Bibila kivovanga vo: “Nga ke ntietie tanu ko zitekwanga muna mbiya zole? Kansi, ke mosi nkutu ko muna yau ovilakanua kwa Nzambi. . . . Ke numoni wonga ko; oyeno nusundidi ntietie zayingi.”—Luka 12:6, 7.

   Ediadi disongele vo: Mfunu una kwa Nzambi.

   Olenda yindula vo ke vena muntu ko okuvuanga o mfunu, kansi zaya wo vo Nzambi omonanga e mpasi zaku zawonso. Okuvuanga o mfunu kana nkutu vo kuzolele diaka zinga ko. E sono kia Nkunga 51:17 kivovanga vo: “O ntima wa budika yo kosomoka, e Nzambi, kubembola wo ko.” Nzambi ozolele vo wakala moyo kadi otoma kuzolanga.

   Teza sadila longi edi: Vava zaya mambu muna Bibila mesonganga vo Nzambi okuzolanga. Muna bonga e nona, tanga nkanda Finama Yave muna kapu kia 24.

• ● Samba kwa Nzambi.

   Bibila kivovanga vo: ‘Yekekanga kwa yandi [Nzambi], mawonso mekutokanesanga kadi mfunu kekuvuanga.’—1 Petelo 5:7.

   Ediadi disongele vo: Nzambi ozolele vo wanzayisa una omonanga ye mambu mawonso mekutokanesanga.

   Nzambi olenda kuvana luvuvamu ye ngolo muna kwamanana zizidila konso mpasi. (Filipi 4:6, 7, 13) Eyayi i mpila Nzambi kesadisilanga awana besambanga kwa yandi ye nsi a ntima mawonso.—Nkunga 55:22.

   Teza sadila longi edi: O unu, samba kwa Nzambi. Sadila nkumbu andi, Yave yo kunzayisa mawonso omonanga. (Nkunga 83:18) Unlomba kimana kasadisa mu kwamanana nuana ye ngindu zazi.

• ● Yindulanga e vuvu kia Bibila mu kuma kia kusentu.

   Bibila kivovanga vo: “E vuvu kiaki tuna kiau kina nze mbwa a nzaza a mioyo mieto, kia ludi ye kiasikila.”—Ayibere 6:19, mvovo vana yand’a lukaya.

   Ediadi disongele vo: Ezak’e ntangwa olenda mona vo una kiambote, kansi e ntangwa zankaka kuna kiambote ko, nze wauna e nzaza itungianisinuanga kwa tembwa kia ngolo. Kansi, e vuvu kina muna Bibila kilenda kusadisa mu vuvika e ngindu.

   E vuvu kiaki ke ndozi ankatu ko. Kitukanga muna nsilu wa Nzambi wafokola mawonso mekututwasilanga e mpasi.—Lusengomono 21:4.

   Teza sadila longi edi: Tanga longi dia 5 muna finkanda Nsangu Zambote Zitukidi kwa Nzambi, muna zaya mambu mankaka mu kuma kia vuvu Bibila kivananga.

• ● Vanga diambu dina otoma yangalelanga.

   Bibila kivovanga vo: “Ntim’a kiese i nlongo miambote.”—Ngana 17:22.

   Ediadi disongele vo: Vanga mambu mana tuzolanga, dilenda kutusadisa mu kala ye ngindu zasikila yo venga lukendalalu lwasaka.

   Teza sadila longi edi: Vanga diambu dina otoma zolanga. Muna bonga e nona, olenda wá miziki mina oyangalelanga, tanga mambu malenda kukasakesa yovo sala salu oyangalelanga. E kiese kiaku mpe kiwokela avo osadidi ntangw’aku mu sadisa akaka, kana nkutu muna mambu makete.—Mavangu 20:35.

• ● Toma lunga-lunganga mavimpi maku.

   Bibila kivovanga vo: “O nana e nitu nluta wandwelo ditwasanga.”—1 Timoteo 4:8.

   Ediadi disongele vo: O nana e nitu, leka tulu twambote yo dia madia mambote disadisanga mu kala yo mavimpi mambote.

   Teza sadila longi edi: Diatanga ye nzaki zawonso kana nkutu mu miniti 15 kaka.

• ● Sungamena wo vo e ngindu zaku ye mambu ma zingu kiaku malenda soba.

   Bibila kivovanga vo: “Ke nuzeye wo ko una ukala e zingu kieno o mbazi.”—Yakobo 4:14.

   Ediadi disongele vo: E mambu mekutokanesanga, kana nkutu mana oyindulanga vo kulenda mo singika ko, vioka kwandi mevioka.

   Kana nkutu nkia mambu mampasi onuananga mau o unu, zaya wo vo mbazi mambu mama malenda soba. Muna kuma kiaki, vanga mawonso olenda mu zizidila mo. (2 Korinto 4:8) E mambu mampasi onuananga mau o unu malenda singama kuna sentwala, kansi avo ukivondele kulenda mo diaka singika ko.

   Teza sadila longi edi: Tanga tusansu twa wantu beyikwanga muna Bibila ana bakendalala yo zola nkutu vo bafwa kwau ye omona una mambu ma zingu kiau matomena kuna kwalanda. Nkuma miayingi muna mpila ina nkutu ke bayindulanga ko. Yambula twavovela yaka nona.

 Elo. Bibila kiyikanga wantu ana bazola vo bafwa kwau. Nzambi kabatumba ko, kansi wabasadisa. Olenda vanga diau dimosi kwa ngeye.

Eliya

•  ● Nani kakala? Eliya ngunza ye nkwa unkabu kakala. Kansi vakala ye ntangwa kakendalala. Muna Yakobo 5:17 tutanganga vo: “Eliya muntu kakala nze yeto.”

•  ● Ekuma kamwena vo diambote kafwa kwandi? Kadi wanuananga ye diambu diamfila mu yindula vo yandi mosi kaka kakala, wamonanga wonga yo banza nkutu vo kakala kwandi mfunu ko. Muna kuma kiaki, wadodokela vo: “E Yave, katula moyo ame.”—1 Ntinu 19:4.

•  ● Nki kiansadisa? Eliya waziula ntim’andi yo zayisa kwa Nzambi mawonso kamonanga. Aweyi Nzambi kankasakesela? Yave wansonga vo watokananga muna wete diandi yo kunsonga nkum’andi wampwena. Wansonga mpe vo mfunu kakala kwa yandi. Vana ntandu, Nzambi wamvana nsadisi ambote ona watoma longwa.

•  ▸ Tanga lusansu lwa Eliya: 1 Ntinu19:2-18.

Yobi

•  ● Nani kakala? Mfumu a nzo ye mvuama kakala. Wasambilanga Nzambi aludi ye kwikizi kiawonso.

•  ● Ekuma kamwena vo diambote kafwa kwandi? E zingu kia Yobi kiasoba vana vau. Mambu mayingi mampasi mambwila. Wavidisa mavua mandi mawonso. Wan’andi awonso bafwila muna sumbula ye wayela kimbevo kiangolo. I bosi, akundi andi aluvunu bamvovesa vo yandi wakala ye foti muna mambu mawonso mampasi mambwila. Muna kuma kiaki, Yobi wavova vo: “Mbengene moyo ame; kizolele zinga diaka ko.”—Yobi 7:16.

•  ● Nki kiansadisa? Yobi wasamba kwa Nzambi yo mokena ye akwandi. (Yobi 10:1-3) Wakasakeswa kwa nkundi andi Eleyu ona wakala nkwa ngemba ye wansadisa mu kala ye ngindu zasikila muna mambu mambwila. Vana ntandu, Yobi watambulwila lusadisu ye longi dia Nzambi.

•  ▸ Tanga lusansu lwa Yobi: Job 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Nani kakala? Mose mfidi a nkangu a Isaele kakala ye ngunz’a kwikizi.

•  ● Ekuma kamwena vo diambote kafwa kwandi? Mose salu kiayingi kakala kiau. Nkumbu miayingi katiangunuanga kwa nkangu, ediadi dianyoyesanga. Muna kuma kiaki wavovesa Nzambi vo: “Dodokolo, umponda owau.”—Ntalu 11:11, 15.

•  ● Nki kiansadisa? Mose wazayisa kwa Nzambi mawonso kamonanga. Nzambi wasadisa Mose muna vevola e salu kiandi, ediadi diansadisa mu kulula ntokani.

•  ▸ Tanga lusansu lwa Mose: Ntalu 11:4-6, 10-17.