Kintinu kia Nzambi i luyalu lwakieleka lwasikidiswa kwa Yave wa Nzambi. Muna Nkand’a Nzambi kiyikilwanga mpe vo “kintinu ki’ezulu” kadi kiyala tuka kun’ezulu. (Maku 1:14, 15; Matai 4:17) Mambu mayingi ma kintinu kia Nzambi betela mena ye tuyalu twa wantu. Kansi Kintinu kia Nzambi kisundidi muna mawonso.

•   Ayadi. Nzambi wasola Yesu Kristu se Ntinu a Kintinu yo kumvan’e wisa kisundidi ayadi a nza. (Matai 28:18) Yesu mu wete kaka kesadilanga e wisa kiandi. Wateka dio songa vo nkwa nkenda; i Mfidi ofwene bundwa e vuvu. (Matai 4:23; Maku 1:40, 41; 6:31-34; Luka 7:11-17) Muna lutumu lwa Nzambi, Yesu osolanga wantu a zula yawonso keyala yau kun’ezulu yo ‘kubakitula se atinu, beyala nza yawonso.’—Lusengomono 5:9, 10.

•   Kolo kizingila. Nswaswani ye tuyalu twa wantu tufokokanga, Kintinu kia Nzambi “ke kibangalakeswa ko.”—Daniele 2:44.

•   Nkangu. Konso muntu ovanganga mana Nzambi kevavanga olenda kota muna Kintinu kia Nzambi, lembi tala luvila yovo fulu kawutukila.—Mavangu 10:34, 35.

•   Nsiku. Mayingi mevavwanga muna Kintinu kia Nzambi ke sima kaka mavungu mambi ko. Nsiku mia Nzambi mitoma songanga vo awana bekota muna Kintinu kia Nzambi bafwete kala e nkal’ambote. Kasikil’owu, muna Nkand’a Nzambi tutanganga vo: “Zola Yave wa Nzambi aku yamuna nsi a ntim’aku yawonso, yo muna fulumwinu kiaku kiawonso, yo muna nyindu aku wawonso. I wau wuwu o nkanikinu anene, wantete mpe. Una wezole ufwananini, i wau wuwu, Zola nkw’aku, konso un’okuzolela.” (Matai 22:37-39) O zola muna Nzambi y’akw’au, kufilanga awana bekota muna Kintinu kia Nzambi mu vavanga wete dia akaka.

•   Nkubika ya Longa Wantu. Wau vo Kintinu kia Nzambi kivwidi nsiku bafwete lemvokelang’o nkangu, kivwidi mpe nkubika ilonganga nsiku miami kwa nkangu.—Yesaya 48:17, 18.

•   Kani Kilungisa. Kintinu kia Nzambi ke kibunduna nkangu ko muna vwamisa awana beyala. Kansi, kilungisa luzolo lwa Nzambi kumosi mpe yo nsilu wa sia vo awana bezolanga Nzambi bezinga yakwele mvu muna paradiso ova ntoto.—Yesaya 35:1, 5, 6; Matai 6:10; Lusengomono 21:1-4.