E Selo Yambuta i buka kiandwelo kia Akristu azikuka betwadisanga Mbangi za Yave mu nza yawonso. E salu kiau mu kunku yole kina:

•   Yau bevitanga o ntu muna kubika nkanda misasilanga Bibila, malongi ma tukutakanu ye sikola za Mbangi za Yave.—Luka 12:42.

•   Yau bediatisanga e salu kia Mbangi za Yave kia samuna e nsangu zambote mu nza yawonso yo lunga-lunga e nzimbu za nkayilu.

 E Selo Yambuta betoma landanga mbandu basisa “antumwa ye akuluntu kuna Yerusaleme” muna tandu kiantete, ana babakanga e nzengo muna mambu mamfunu muna wete dia nkutakani yawonso ya Kikristu. (Mavangu 15:2) Nze akala awana akwa kwikizi, e buka kia Selo Yambuta ke yau ko i mfumu za dibundu dieto. Wau bazeye wo vo Yave wa Nzambi watumbika Yesu Kristu se Ntu a nkutakani, muna mambu mawonso bevavilanga luludiku muna Bibila.—1 Korinto 11:3; Efeso 5:23.

 Awaya i mpangi bena muna buka kia Selo Yambuta: David Splane, Gage Fleegle, Geoffrey Jackson, Gerrit Lösch, Jeffrey Winder, Kenneth Cook Jr., Mark Sanderson, Samuel Herd yo Stephen Lett. Yau awonso besadilanga kuna vula dieto diasina kuna Warwick, Nova York, Estados Unidos.

 E Selo Yambuta buka sambanu ya salu basikidisa kimana konso buka kiatalanga maka mambu ma salu kieto. Mosi muna yau yovo nzole besadilanga muna konso buka kia salu.

•   Buka kia Afidi: E buka kiaki i kiau kitalanga mambu matadidi tuyalu, vana lusadisu kwa awana bebwilwanga e sumbula, Mbangi za Yave ana bebangikwanga mu kuma kia lukwikilu lwau ye mambu mankaka mebwilanga Mbangi za Yave kuna kinsalukisa.

•   Buka Kitalanga Asadi: E buka kiaki i kiau kitalanga mambu mawonso ma mpangi za Betele.

•   Buka kia Amwangi: E buka kiaki i kiau kitalanga e salu kia vaikisa nkanda misasilanga e Bibila yo twika mio muna fulu yankaka, salu kia tunga e fulu ya nsambila, mavula ma Betele ye mavula ma salu kia nsekola.

•   Buka kia Salu: E buka kiaki i kiau kitalanga e salu kia samuna e “nsangu zambote za Kintinu.”—Matai 24:14.

•   Buka kia Alongi: E buka kiaki i kiau kikubikanga malongi ma tukutakanu, malongi ma sikola ye programa za audio ye video.

•   Buka kia Asoneki: E Buka kiaki i kiau kikubikanga nkanda minietekwanga, malongi mevaikiswanga muna nzil’eto ya internete ye salu kia nsekola.

 Vana ntandu a salu ina besalanga muna buka yayi, e Selo Yambuta bekutakananga konso lumingu muna fimpa e nsatu za dibundu diawonso. Muna tukutakanu twatu, e Selo Yambuta beviluziolanga mana mevovanga e Bibila yo yambula vo mwand’avelel’a Nzambi wabafila. Ngolo mpe bevanganga kimana yau awonso bakala kumosi vava bebakanga e nzengo.—Mavangu 15:25.

 Akristu ana betoma bundwanga e vuvu yau besadisanga e buka ya salu ya Selo Yambuta. (1 Korinto 4:2) Bavuidi ngangu zayingi ye batomene zaya e salu kia vita o ntu muna buka ina besadilanga. Konso lumingu bekalanga muna tukutakanu twa buka yayi. Kana una vo ke yau ko bebakanga e nzengo, asadisi besonganga ngindu zambote yo zayisa e nsangu za mambu mamfunu kwa Selo Yambuta. Bevanganga mpe mawonso muna sadila e nzengo za buka yau yo vava zaya e nluta mia nzengo zozo. Asadisi besolwanga mpe kwa Selo Yambuta mu kwenda kingula mpangi zeto mu fulu yaswaswana mu nza yawonso, kala se mpovi muna tukutakanu twamfunu nze lukutakanu lwa konso mvu ye lukutakanu lwa mpaninu mapoloma kwa wan’a kalasi kia Ngiladi.