Даниел 6:1—28
6 Дарий падыша өзүнө жардам бергенге бүт падышалыгы боюнча 120 кишини дубандардын башкы башкаруучусу* кылып дайындоону туура көрдү.+
2 Алардын үстүнөн 3 башчы койду, үчөөнүн бири Даниел эле;+ падыша эч кандай зыян тартпашы үчүн, тигилер+ ошол 3 башчыга бардыгын билдирип турушмак.
3 Даниел өзгөчө жөндөмдүүлүккө* ээ болгондуктан берки 2 башчы менен дубандардын башкы башкаруучуларынан айырмаланып турчу.+ Ошон үчүн падыша аны бүт падышалыктын үстүнөн коюуну ойлоп жүргөн.
4 Ошол убакта берки 2 башчы менен дубандардын башкы башкаруучулары Даниелди мамлекеттик иштерди туура эмес жүргүзүп жатат деп айыпташ үчүн кыйкым издей башташты. Бирок ал ишине кош көңүл карабаган, арамдыкка барбаган ишеничтүү адам болгондуктан, андан эч кандай кыйкым, арамдыкка жаткан эч нерсе таба алышкан жок.
5 Ошон үчүн: «Даниелден анын Кудайынын мыйзамына байланыштуу эле кыйкым таппасак,+ башка кыйкым таппайбыз»,— дешти.
6 Анан ошол 2 башчы менен дубандардын башкы башкаруучулары падышага тобу менен кирип барып: «Оо, Дарий падыша, түбөлүк жашаңыз!
7 Оо, падыша, 30 күндүн ичинде ким өзүңүздөн башка бирөөгө же кайсы бир кудайга өтүнүч менен кайрылса, арстандар жаткан орго ташталсын деп буйрук чыгарышыңыз үчүн, ошондой тыюу салышыңыз үчүн, падышалыктын бардык башчылары, дубандардын башкы башкаруучулары*, алардын жардамчылары, жогорку даражалуу ак сарай кызматчылары жана башкаруучулар өз ара кеңешишти.+
8 Эмесе, падыша, ошондой буйрук чыгарып, кол коюңуз,+ мадайлыктар менен персиялыктардын жокко чыгарылгыс мыйзамына ылайык, ал өзгөртүлбөсүн»,+— дешти.
9 Ошентип, Дарий падыша буйрукка кол койду.
10 Даниел болсо буйрукка кол коюлганын билер замат үйүнө барды. Анын үстүнкү бөлмөсүндөгү Иерусалим тарапты караган терезелери ачык болчу.+ Ал мурдагыдай эле күнүнө 3 жолу чөгөлөп, Кудайынан тиленип, аны даңктай берди.
11 Бир күнү баягы кишилер тобу менен кирип барып, Даниелдин өз Кудайынан тиленип, ырайым кылышын сурап жалынып жатканын көрүштү.
12 Анан алар падышага келип, чыгарган буйругун эсине салып: «Оо, падыша, сиз 30 күндүн ичинде ким өзүңүздөн башка бирөөгө же кайсы бир кудайга өтүнүч менен кайрылса, арстандар жаткан орго ташталсын деген буйрукка кол койбодуңуз беле»,— дешти. Падыша: «Ооба. Мадайлыктар менен персиялыктардын жокко чыгарылгыс мыйзамына ылайык, ал өзгөртүлбөйт»,+— деди.
13 Ошол замат алар падышага: «Оо, падыша, жүйүт туткундарынын бири Даниел+ сизди да, кол койгон буйругуңузду да тоготпой, күнүнө 3 жолу Кудайынан тиленип жатат»,+— дешти.
14 Падыша муну укканда катуу кейиди. Ал Даниелди аман алып калыштын жолун издеп, күн батканча куткарып калганга аябай аракет кылды.
15 Акыры, баягы кишилер тобу менен кирип келип: «Оо, падыша, мадайлыктар менен персиялыктардын мыйзамы боюнча, падышанын чыгарган бир да буйругу, салган тыюусу өзгөртүлбөй турганын унутпаңыз»,+— дешти.
16 Ошондо, падышанын буйругу боюнча, Даниелди алып келип, арстандар жаткан орго ташташты.+ Падыша болсо Даниелге: «Өзүң кызмат кылып келаткан Кудайың сени куткарып алат»,— деди.
17 Анан таш алып келип, ордун оозун жаап коюшту. Даниелге чыгарылган өкүм өзгөртүлбөшү үчүн, падыша ташты өзүнүн да, төрөлөрүнүн да мөөр шакеги менен бекитти.
18 Анан падыша ак сарайына кетти. Ал түнү бою орозо кармады, такыр көңүл ачкысы келген жок*, уйкусу да качты.
19 Эртеси таң заарда ордунан турду да, шашкан бойдон арстандар жаткан орго жөнөдү.
20 Орго жакындаганда аянычтуу үн менен Даниелди чакырып: «Даниел, тирүү Кудайдын кызматчысы, өзүң кызмат кылып келаткан Кудайың сени арстандардан куткара алдыбы?» — деди.
21 Даниел ошол замат падышага: «Оо, падыша, түбөлүк жашаңыз!
22 Кудайым периштесин жиберип, арстандардын оозун жаап койгондуктан,+ алар мага тийген жок.+ Себеби Кудайдын алдында эч кандай айыбым жок. Падыша, сиздин да алдыңызда эч кандай жамандык кылган жокмун»,— деп жооп берди.
23 Ошондо падыша аябай сүйүнүп, Даниелди ордон алып чыкканга буйрук берди. Даниелди ордон алып чыгышты. Ал Кудайына таянгандыктан, эч жери эч нерсе болбоптур.+
24 Анан, падышанын буйругу боюнча, Даниелге жалаа жапкан кишилерди алып келип, балдары, аялдары менен кошо орго ыргытышты. Алар ордун түбүнө түшүп-түшө электе эле, арстандар чапчып алып, сөөктөрүн бычыратып салышты.+
25 Анан Дарий падыша жер жүзүндө жашаган бардык элдерге, улуттарга, ар кандай тилдерде сүйлөгөндөргө мындай деп жазды:+ «Тынчтыгыңар арта берсин!
26 Мен мындай буйрук берем: падышалыгымдын бүт аймагында жашагандар Даниелдин Кудайын кастарлап, андан коркушсун.+ Анткени ал — тирүү Кудай, ал түбөлүккө бар болот. Анын падышалыгы кыйрагыс, башкаруусу* түбөлүктүү.+
27 Ал сактайт,+ куткарат, асман менен жерде керемет-жышаандарды көрсөтөт.+ Ал Даниелди арстандардын азуусунан* сактап калды».
28 Ошентип, Дарийдин+ да, Персия падышасы Корештин+ да бийлигинин тушунда Даниел бейкапар, жакшы жашады.
Шилтемелер
^ Сөзмө-сөз: «рухка».
^ Сөзмө-сөз: «сатраптары».
^ Же балким: «анын алдына ыр-күү аткаргандар чакыртылган жок».
^ Же: «эгедерлиги».
^ Же: «чеңгелинен».
