Периштелер адамдарга караганда бир топ күчтүү (2 Петир 2:11). Алар асманда, башкача айтканда, рухий чөйрөдө жашашат. Ал чөйрө көзгө көрүнгөн ааламдан алда канча жогору турат (1 Падышалар 8:27; Жакан 6:38). Алар рухтар деп да аталышат (1 Падышалар 22:21, шилт.; Забур 18:10).

Периштелер кантип пайда болгон?

 Кудай периштелерди Иса аркылуу жараткан. Иса Ыйык Китепте «бардык жаратылгандардын туңгучу» деп айтылат. Кудай бардык нерсени жаратып жатканда Исаны кандайча колдонгону тууралуу Ыйык Китепте: «Асмандагы жана жердеги калган нерселердин баары, көзгө көрүнгөн жана көрүнбөгөн нерселер, [анын ичинде периштелер] ал [Иса] аркылуу жаратылган»,— деп айтылат (Колосалыктар 1:13—17). Периштелер үй-бүлө курушпайт жана балалуу болушпайт (Марк 12:25). Демек, Ыйык Китепте Кудайдын уулдары деп аталган периштелердин ар бири өз-өзүнчө жаратылган (Аюп 1:6).

 Периштелер жер пайда боло электе эле жаратылган. Кудай жерди жаратканда, периштелер «салтанаттуу үн салган» (Аюп 38:4—7).

Канча периште бар?

 Ыйык Китепте периштелердин так саны айтылбаса да, алардын абдан көп экенин билүүгө болот. Мисалы, элчи Жакан аян аркылуу периштелердин миң-миңдеп саналарын көргөн (Аян 5:11).

Ар бир периштенин ысмы жана өзүнө мүнөздүү кулк-мүнөзү барбы?

 Ооба. Ыйык Китепте эки периштенин ысмы жазылат. Алар — Микеил жана Жебирейил (Даниел 12:1; Лука 1:26) a. Кээ бир периштелер аты бар экенин айтышса да, бирок аты ким экенин айтышкан эмес (Башталыш 32:29; Бийлер 13:17, 18).

 Периштелердин өзүнө гана мүнөздүү кулк-мүнөзү бар. Алар бири-бири менен пикирлеше алышат (1 Корунттуктар 13:1). Ой жүгүртүү жөндөмүнө ээ жана Кудайды даңктаган сөздөрдү айтышат (Лука 2:13, 14). Шайтан Ибилис Кудайга каршы чыкканда, периштелердин айрымдары анын тарабына ооп кетишкен. Мындан алардын тандоо эркиндигине ээ экени жана жаман менен жакшыны айырмалай билери көрүнүп турат (Матай 25:41; 2 Петир 2:4).

Периштелердин ээлеген абалы ар кандайбы?

Ооба. Периштелердин арасынан күчү, бийлиги жагынан эң жогору турганы — башкы периште Микеил (Жүйүт 9; Аян 12:7). Сераптар — Жахабанын тактысынын тегеректеп турган жогорку даражалуу периштелер (Ышая 6:2, 6). Керуптар — ар кандай өзгөчө тапшырмаларды аткарган башка жогорку даражалуу периштелер. Маселен, Адам ата менен Обо эне Эйден багынан куулуп чыгарылганда, керуптар Эйден багынын кире беришин кайтарышчу (Башталыш 3:23, 24).

Периштелер адамдарга жардам беришеби?

 Ооба. Кудай бүгүнкү күндө периштелер аркылуу адамдарга жардам берет.

•   Кудай периштелер аркылуу кызматчыларын Падышалык жөнүндөгү жакшы кабар айтууда жетектейт (Аян 14:6, 7). Ушундай жетекчиликтин аркасында кабар айткандар да, жакшы кабар уккандар да пайда алышат (Элчилер 8:26, 27).

•   Периштелер Кудайдын кызматчыларынын жыйналышын жаман адамдардын терс таасиринен коргоп турушат (Матай 13:49).

•   Периштелер Кудайга ишенимдүү болгон кишилерди жетектеп, коргоп турушат (Забур 34:7; 91:10, 11; Еврейлер 1:7, 14).

•   Жакында периштелер Иса Машаяк менен бирге жамандыкты жок кылып, адамзатты азап-кайгыдан арылтыш үчүн Кудайдын душмандары менен согушушат (2 Тесалоникалыктар 1:6—8).

Ар бирибиздин өз периштебиз барбы?

 Периштелер Кудайдын кызматчыларынын рухий коопсуздугуна кам көрүшсө да, бул Кудай ар бир кызматчысына бирден периште дайындап койгон дегенди билдирбейт b (Матай 18:10). Периштелер Кудайдын кызматчыларын ар бир сыноодон же кыйынчылыктан коргой бербейт. Ыйык Китепте Кудайдын адамга кыйынчылыкты көтөрүп кеткенге акылмандык, күч берип, «жагдайдан чыгуунун жолун көрсөтөрү» айтылат (1 Корунттуктар 10:12, 13; Жакып 1:2—5).

Периштелерге байланыштуу жаңылыш түшүнүктөр

 Жаңылыш түшүнүк. Жардам сурап периштелерден тиленсек болот.

 Чындык. Кудайдан тиленүү — сыйынуубуздун бир бөлүгү. Сыйынуубузга Кудай гана татыктуу (Аян 19:10). Иса Машаяк аркылуу Кудайга гана кайрылабыз (Жакан 14:6).