Kawena washila mpaka ko, misamu mî mianguri mia ndongosolo za Bibila mikurishi luzolo lwaku kwe Yehova. Kâ fweni tatamana mu kurisa luzolo lwango. (1 Piere 2:2) Mu ba na tsivuvu tsia baka luzingu lwa mankululu, fweni tatamana mu pusana kwe Nzàmbi mu ndila ya ndongokolo’aku ya Bibila.​—Tanga Za 17:3; Yude 21.

Nzayulu’aku ya Nzàmbi mboyikwekuri tsiminu tsiaku mpe ni ngolo tsikweyikame. Tsiminu tsiango mbo tsikusarisa wayangirika Nzàmbi. (Bahebre 11:1, 6) Mpe mbo tsikutuma mu vilula mutima’aku mpe mu sa nsobolo zo zilenda tomesa luzingu lwaku.​—Tanga Bisalu 3:19.

Mu nge bene, mbozolo wata mio milongokele kwe bampwanaku. Beto bansoni nsangu za mbote zatuzoloko mu tà. Mbo tatamana mu longoka Bibila mbo zaba kabwe lenda zonzela tsiminu tsiaku mu Yehova na mu nsangu za mbote kwe bakaka.​—Tanga Bisi-Rome 10:13-15.

Bantu babingi kwe badiku peleko kwe bishi kanda diawu babatikilaka mu zonzila nsangu za mbote. Zonzila mu mayela. Ha mbuka ya batela ti nkwikulu zawu zabungungu zena, bazonzila ntsilulu za Nzàmbi. Kujimbakanadi mpe ti bifu biaku biabibote shimba kwingi bishimba mitima miawu yoka mio mibatela.​—Tanga 2 Timote 2:24, 25.

Longoka kwa Zu dia Nzàmbi Bibila mbo kukubakisa mu tomo zaba Nzàmbi bubote. Nsukunu ni ye ti ngwisani’aku na Yehova mbo yitomo kula. Twata ti mbo mona ti ni yandi kuvwiri ntsiana mwishi kanda diandi.​—Tanga 2 Bisi-Korente 6:18.

Ngwisani’aku na Nzàmbi mbo yikula wamana tatamana mu longoka Bibila. (Bahebre 5:13, 14) Lomba kwe Mbangi ya Yehova moshi kalongoka naku Bibila mu ndila ya buku Ngano Bibila nti ditulongesaka? Mbokwe tatamane bô mu longoka Bibila, luzíngu lwaku mpe ni sungama lukwesungame.​—Tanga Mikunga 1:1-3; 73:27, 28.

Nsangu za mbote kwe Yehova zitukiri, Nzàmbi ya nsayi. Wamana bandakana bantu bandi, mbo pusana kwe yandi. (Bahebre 10:24, 25) Wamana tatamana mu sarila ngolo mu muyangirika mbo baka luzingu lwa ngula lwawu, luzingu lwa ntangu zazansoni. Tsieleka, pusana kwe Nzàmbi ni diambu diyokele mfunu dilenda yirika mu luzingu lwaku.​—Tanga 1 Timote 1:11; 6:19.