Biyuvu bia bitangi
Yezu bu kabatika Ndia ya Mfumu, milongoki 70 mi katambika mu kwe samuna mu bilumbu biayôka ngano ntia kûma mieri? Ngano miamuyambirika?
Ka twena na nsatu ko ya banza ti mu ntangu Yezu yi kabatika Ndia ya Mfumu, mpe milongoki 70 bu mialembo kwa bâ, ka wuta zolo tâ ko ti Yezu keria batambulaka ko mpe bamuyambirika. Yezu wazolo kwa mu bâ na ntumwa zandi mu ntangu yîna.
Bantumwa 12 na milongoki 70 babansoni, milongoki mia Yezu kwa mieri. Ha kati dia milongoki miandi miamingi, Yezu watoko sola babakala 12, bakatâ nkumbu bantumwa. (Like 6:12-16) Ku Ngalile keri bu ‘kavukasa ba kumi na bole mpe wabatambika mu kwe samuna nsangu za Timfumu tia Nzambi na mu wasisa bimbevo.’ (Like 9:1-6) Ha namina, ku Yude, Yezu “wavutu sola milongoki 70 mpe wabatambika bole-bole.” (Like 9:51; 10:1, NWT) Buna, Yezu milongoki mieri nandi mu bizunga bia swaswana bieri samunaka mu nkumbu’andi.
Bayuda bayizi bâ milongoki mia Yezu, Pake beri kembelaka mivu miamiansoni, kampe na makanda mawu. (Ndu. 12:6-11, 17-20) Mu bungu ti ntangu yi kaketi fwa yayizi bâ penepene, Yezu na bantumwa bandi bayenda ku Yerusaleme. Kâ, ka lomba ko kwe milongoki miandi miamiansoni mia ku Yude, mia ku Ngalile na mia ku Pere mu kwiza ngatu bakembela Pake ha timosi. Mu ntangu yîna, kampe Yezu wazolo kwa mu bâ na bantumwa. Wabatêla: “Pake yi nkatika waya na weyi yo mu dia ha timosi na beno ntete na mona mpasi.”—Like 22:15, NWT.
Musamu wa mbote wasati kasila bo. Ntangu fioti kwa Yezu mbo kaketi fwa ntiana ‘mwana timeme wa Nzambi wu katulaka masamu ma mutoto nsi.’ (Za 1:29) Musamu wo ku Yerusaleme waketi yôkela, yeri mbuka yi beri haninaka mikayulu kwe Nzambi tûka ntama. Lufwa lwa Yezu mbo lwaketi nata nkûlulu yayinene yôka yo yamoneka mu nzila ya mwana timeme tia dia bala ba Israele mu mpimpa yi baduka ku Ezipte. (1 Kor. 5:7, 8) Mu nzila ya mukayulu wa Yezu bantumwa 12 mbo baketi bâ bandu dia timvuka tia Bakristo. (Efz. 2:20-22) Musamu wa mbote wena mu zaba ti mumvuka wa santu wa Yerusaleme matari ‘12 wena, mu fondasio’andi mwa tsonama nkumbu za 12 za bantumwa 12 za Mwana Timeme.’ (Nza. 21:10-14) Diangana, bantumwa ba kwikama tisalu tia mfunu baketi sala mu ndugananu ya kani dia Nzambi. Buna tubakuri mu bungu dia nti Yezu kazolo mu bâ nawu tintwari mu ntangu ya Pake ya mansukina na mu bungu dia misamu mia landa ha manima: Ndia ya Mfumu.
Milongoki 70 na miakaka ka miabâ ku ndia yo ko na Yezu. Kâ, milongoki miamiansoni mia kwikama mbo miaketi baka ndandu mu Ndia ya Mfumu ya batika Yezu. Bô babansoni baketi kwizi bâ Bakristo ba tumbu ha manima mbo baketi kota mu luwawanu lwa Timfumu lwa zonzela Yezu kwe batumwa mpimpa yîna.—Like 22:29, 30.
