Yezu nsangu za tidzunu keri samunaka. Kâ, lumbu timosi, watêla ntumwa zandi ti: ‘Ka lubanzandi ti tidzunu naneti ha mutoto nsi; ka tidzunu’â ko naneti, kâ mbele ya muzingu. Diangana, bu nayiziri mu kwizi hambasa [mwana wa bakala] na tata’andi; mwana wa mukento na nguri’andi, buko na buko bwandi.’ (Mat. 10:34, 35) Ngano Yezu bwe keri zolo tâka?

Yezu keri’â dingaka ko mu hambasa makanda, kâ wazaba ti ndongosolo zandi mbo zaketi hambasa makanda makaka. Buna, bô bazololo mu bâ milongoki mia Kristo, mpe bazololo mu batusu, bafweti zaba misamu mi lendi nata nzengolo’awu. Tala ti nkwamusu za mulumi’awu, mukazi’awu peleko za bantu bakaka mu kanda batelamanaka, kampe musamu wa mpasi wena kwe bawu mu tatamana mu bâ ba kwikama mu ndongosolo za Kristo.

Bibila mbo ditindisaka Bakristo mu ‘bâ mu tidzunu na bantu babansoni.’ (Rom. 12:18) Kâ, ndongosolo za Yezu zilendi bâ ntiana ‘mbele ya muzingu’ mu makanda makaka. Musamu wo mbo wutulaka mu ntangu muntu wumosi wa kanda wutambulaka ndongosolo za Yezu, mpe bakaka bu bakalaka zo peleko bu batelamanaka zo. Mu ntangu yo, bantu ba kanda​—bô babâka nzo yimosi—​mbo bakwizi bâka mbeni za wô ta longoka matieleka.​—Mat. 10:36.

Ntangu zakaka Milongoki mia Kristo mibâka nzo yimosi na bantu ba kanda bê mu mabundu makaka, mbo babwabanaka na misamu mikotesaka luzolo lwawu mu Yehova na Yezu mu ntontolo. Mu tifwani, bantu ba kanda balembo sarilaka Yehova balendi ba tuma mu kembela malaki ma mabundu. Bu babâka mu ntontolo, nani bafweti tâ nsayi? Yezu watâ ti: ‘Wô zolo tata’andi peleko mama’andi buyôkele na meno, ka kumfwanane’â ko.’ (Mat. 10:37) Wa matieleka, Yezu keri’â tâka ko ti ngatu milongoki miandi miamufwanakana, bafweti bâ na luzolo lwa fioti mu bibuti biawu. Kâ, mbo keri ba longesaka bwe bazabila tima tiyôkele mfunu mu luzingu lwawu. Tala ti bantu ba kanda dieto balembo sarilaka Yehova batelamane ngolo zeto mu mu sarila, mbo tutatamana mu ba zolo, kâ mbo tubambuka ti ni luzolo lweto mu Nzambi lufweti yôka ngolo.

Ntembe kâni, nkwamusu za kanda zilendi bâ nguria mpasi mu korela. Kâ, milongoki mia Kristo mbo mibambukaka misamu mi katâ: ‘Wô lembo bonga poto diandi dia matimuna mu kundanda, ka kumfwanakane’â ko.’ (Mat. 10:38) Wuzololo tâ, Bakristo mbo babongelaka nkwamusu za makanda mawu ntiana mpasi zi tambulaka milongoki mia Kristo mu korela. Kâ mpe, tivuvu tibâka nawu ti ndiatulu’awu ya mbote mbo yituma bantu ba makanda mawu balembolo Mbangi za Yehova mu soba na mu longoka Bibila.​—1 Pi. 3:1, 2.