1. Ngano bwe mwinaka matieleka?

 KANDA dia Yehova matieleka me mu Zu dia Nzambi dizoloko. Timinu tieto ni mo tisikamane. (Rom. 10:17) Tayizi kwikila ti Yehova watûla timvuka tia Bakristo ntiana “kunzi na nsikamanu ya matieleka.” (1 Tim. 3:​15, NWT) Mpe, mu mutima wawansoni tutumamanaka “bô batutwarisaka” bu babangulaka matieleka ma Bibila mpe bu bahanaka lutwalusu lutubakisaka mu sarila luzolo lwa Nzambi.—Ebr. 13:17.

2. Tintwari na Zaki 5:​19, nti bilendi tu tûrila bu tumana longoka matieleka?

² Kâ, bu tumana tambulaka matieleka, mpe bu tutambulaka ti tufweti landa lutwalusu lwa organizasio ya Nzambi, tulendi kwizi hengama kwa mpe. (Tanga Zaki 5:19.) Satana tomono zolo ti tabika mu kwikila mu Bibila peleko mu lutwalusu lu tubakaka lwa organizasio ya Nzambi.—Efz. 4:14.

3. Mu bungu dia nti tufweti tumamana matieleka na kwikama kwakwansoni? (Bisi-Efeze 6:​13, 14)

³ Tanga Bisi-Efeze 6:​13, 14. Ntamana Satana mbo kasarila bungungu bwa ngolo mu wubakasa makanda mamansoni ngatu matelamana Yehova. (Nza. 16:​13, 14) Tulendi kekolo mpe ti Satana katomo sarila ngolo mu wubakasa kanda dia Yehova. (Nza. 12:9) Buna mfunu wena ti talongoka mu sa luswaswanu ha kati dia matieleka na bungungu, mpe tatumamana matieleka. (Rom. 6:17; 1 Pi. 1:22) Mvukulu’eto mu mpasi ziyôkele, mu musamu wo yisikamane!

4. Nti tutaluzula mu timoko ti?

 ⁴ Mu timoko ti mbo tutaluzula bifu biole bie mfunu, bilendi tu bakisa mu zaba matieleka matûkaka mu Bibila na mu tambula lutwalusu lwa organizasio ya Nzambi. Ha manima, mbo tutaluzula misamu mitatu mi tufweti landa ngatu tatatamana mu simbirila matieleka.

BIFU BIE MFUNU MU ZABA MATIELEKA

5. Bwe bunkuta bwa Yehova bulendi tu bakisila mu zaba matieleka?

⁵ Bunkuta bwa Yehova. Bâ na bunkuta bwa Yehova wuzololo tâ ti Yandi tutomono zolo, mpe kani kabwe ka tuyirika misamu milembo mu tâ nsayi ko. Timina die neto dia longoka luswaswanu lwe ha kati dia mbote na mbi, ha kati dia matieleka na bungungu, ngatu Yehova katutambula. (Bin. 2:​3-6; Ebr. 5:14) Kani kabwe, ka tubikandi ti bunkuta bweto bwa bantu bwayôka luzolo lweto mu Yehova, mu bungu ti bio bitâka bantu nsayi, ka bivulu’â tâka Yehova nsayi ko.

6. Bwe bunkuta bwa bantu bwatuma mfumu za 10 za bala ba Israele mu sobesa matieleka?

⁶ Tala ti bunkuta bweto bwa bantu buyôkele bunkuta bweto bwa Nzambi, tulendi kwizi hengama na matieleka. Tabongeno tifwani tia mfumu za makanda 12 zaye tala nsi ya kanisina Yehova kwe bala ba Israele. Mu bantu baye tala hata dio, ba 10 mu bawu babâ na bunkuta bwa Bisi-Kana, mpe bunkuta bwawu bwayôka ngolo luzolo lwawu mu Yehova. Bawu batâ kwe bala ba Israele bakaka: “Ka tulenda ko mu nwanisa bantu bo, mu bungu ti bawu bayôkele ngolo na beto.” (Lut. 13:​27-31, NWT) Tamana sikamana mu misamu milendi mona bantu, Bisi-Kana bayôka bala ba Israele mu ngolo. Kâ tamana tâ ti bala ba Israele ka babâ na lenda dia nunga mbeni zawu ko, musamu wo ka wena wa delakana ko kwe Yehova. Wafwanana ti bantu bo ba  10 batûla mutima mu mio mieri ba lombaka Yehova. Wafwanana mpe ti badimbitila mu mio mia yirika Yehova mu bungu dia bawu mu ntama. Buna mbo baketi bakula ti ngolo za Bisi-Kana ka zeri’â tima ko bu baketi za fwanakasa na ngolo za Yehova, Yandi we Nkwa-Ngolo-Zazansoni. Kâ Yoswa na Kalebe ba swaswana beri na bantu balembo bâ ba kwikama; bawu bazolo ti Yehova kabatambula. Bawu batâ kwe kanda dia Israele: ‘Tala ti Yehova mweni nsayi mu beto, mbo katunata kô nsi ko, mbo katuhana yo mpe.’—Lut. 14:​6-9.

7. Bwe lendi yikila ngolo bunkuta bwaku bwa Yehova? (Tala mpe tifwani.)

⁷ Mu yika ngolo bunkuta bweto bwa Yehova tufweti sarila ngolo mu mu yangirika mu nzengolo zazansoni zi tubongaka. (Mik. 16:8) Bu takwe tangi binsamu bia Bibila tiyula: ‘Tala ti musamu ni wo nabwabana na wo, ntia nzengolo naketi bonga?’ Mu tifwani, banza’eti ti mfumu za 10 za kanda dia Israele ta wirikila bu beri hanaka rapore’awu ya mbi. Ngano rapore’awu waketi kwikila, mpe bunkuta bwa bantu mbo bwaketi ku baka, peleko luzolo lwaku mu Yehova na nsatu’aku ya mu yangirika mbo biaketi bâ ngolo yôka bunkuta bwaku? Kanda diadiansoni dia bala ba Israele ka diatambula matieleka meri tâka Yoswa na Kalebe ko. Buna bahombesa bweso bwa kota ku Mutoto wa Kani.—Lut. 14:​10, 22, 23.

8. Ntia tifu tufweti sarila ngolo mu kurisa, mpe mu bungu dia nti?

⁸ Kuluka. Yehova matieleka kazabikisaka kwe bantu ba kuluka. (Mat. 11:25) Na kuluka kwakwansoni tatambula lubakusu mu longoka matieleka. (Bis. 8:​30, 31) Kâ, tufweti sa keba mu kwizi bâ na lulendo. Tala ti lulendo lwe neto, tulendi kwizi banza ti mabanza meto madelakane na mitieno mia Bibila, kâ na lutwalusu lu hanaka organizasio ya Yehova.

9. Bwe tulendi tatamana mu bâ ba kuluka?

⁹ Mu tatamana mu bâ ba kuluka, tufweti bambuka ti ba fioti twena, tamana tifwanakasa na Yehova. (Mik. 8:​3, 4) Tulendi lomba kwe Yehova katubakisa mu bâ ba kuluka na mu bâ bantu balendi tambula ndongosolo’andi. Yehova mbo katubakisa mu mona ti mabanza ma tubakaka mu Zu diandi, na mu organizasio ntalu mena yôka mabanza ma beto beni. Mu ntangulu’aku, dinga misamu mita songela ti Yehova kuluka kazololo, lulendo kayinaka, lumpampani na lukûta. Mpe, tatamana mu sarila ngolo mu bâ wa kuluka bu baka dema dikuhana mwa timfumu peleko disa ti bantu bakaka bakumona.

BWE TULENDI SIMBIRILA MATIELEKA

10. Ngano Yehova nani kasarila mu hana mitieno na lutwalusu kwe kanda diandi?

¹⁰ Tatamana mu bâ na lukwikulu mu lutwalusu lwa Nzambi. Mu Israele ya ntama, Yehova wasarila Mose, mpe ha manima Yoswa, mu hana mitieno kwe kanda diandi. (Yos. 1:​16, 17) Bala ba Israele tusakumunu beri bakaka bu beri bongelaka bantu bo ntiana bimonikisi bia Yehova. Mvula zazingi ha manima, timvuka tia Bakristo bu tiabatika, bantumwa 12 beri tia twarisaka. (Bis. 8:​14, 15) Ha manima, mu tikunku tio, mweri mpe na bakuluntu ba ku Yerusaleme. Bu beri kwe landi malongi ma beri bakaka kwe babakala bo ba kwikama, “bimvuka ni biatatamana mu yikama ngolo mu timinu, na mu funa lumbu basiri lumbu.” (Bis. 16:​4, 5, NWT) Mu ntangu ya beto, tusakumunu mpe tubakaka bu tulandaka lutwalusu lu tu hanaka organizasio ya Yehova. Kâ, ngano Yehova bwe kamona tala ti tukariri mu  tambula bantu ba kasola? Mu hanina tiyuvu tio mvutu, tataluzuleno misamu miayôka mu ntangu bala ba Israele beri kwendaka ku Mutoto wa Kani.

11. Nti biatûrila bala ba Israele balembo tambula ti Yehova kasola Mose mu ba twarisa? (Tala mpe tifwani.)

¹¹ Bala ba Israele bu beri saka nzietolo mu kwenda ku Mutoto wa Kani, babakala ba nsangu bayizi telamana Mose na dema dia mu hana Yehova. Bawu batâ: “Diangana bantu babansoni ba timvuka [ka Mose’â ko kwa] ba santu bêna, Yehova mpe ha kati diawu kena.” (Lut. 16:​1-3, NWT) Ni bu sa ti wa matieleka weri ti ha meso ma Nzambi, “kanda diadiansoni” dia santu dieri, Yehova Mose kasola mu twarisa kanda diandi. (Lut. 16:28) Bu beri zonzelaka Mose mu mpila ya mbi, bantu bâna bakolama, bu tomo tala, Yehova beri zonzelaka mu mpila ya mbi. Ka batûla mutima’awu ko mu mio mieri zoloko Yehova; kâ batûla mutima mu mio mi beri zoloko—babâ na timfumu mpe babâ nsangu. Nzambi wafukisa bô batulumuna bukolo, na mafunda ma bantu beri ku lweka lwawu. (Lut. 16:​30-35, 41, 49) Lumbu ti tulendi bâ na lukwikulu ti Yehova ka zololo’â bantu ko balembo zitisaka lutwalusu lutûkaka ku organizasio’andi.

12. Mu bungu dia nti tufweti tatamana mu tûla lukwikulu lweto mu organizasio ya Yehova?

¹² Tulendi tatamana mu tûla lukwikulu lweto mu organizasio ya Yehova. Bu wukwizi monekaka ti bafweti sa ntomosono mu ngwilu’eto ya matieleka ma Bibila makaka, peleko mu mpila yi bakubikilaka tisalu tia Timfumu, bô batwarisaka ka bakekamaka ko mu sa nsobolo zifwanane. (Bin. 4:18) Ni bo basilaka mu bungu ti yôka tima ni tima, bazololo mu yangirika Yehova. Ngolo mpe basaka mu sikamasa nzengolo zawu mu Zu dia Nzambi; tifwani tiena tifweti landa kanda diadiansoni dia Yehova.

13. Ngano “tifwani tia nzonzolo ya mbote” ni nti, mpe nti tufweti ma sila?

¹³ “Tatamana mu mu landa tifwani tia  nzonzolo ya mbote.” (2 Tim. 1:​13, NWT) “Tifwani tia nzonzolo ya mbote” timonekese ndongosolo ya Bakristo yi tubakaka mu Bibila. (Za 17:17) Misamu miamiansoni mi tukwikilaka mu ndongosolo zo misikanane. Organizasio ya Yehova yatulongesa mpe mu simbirila tifwani tio. Bu tutatamana mu sila bo, mbo tubaka tusakumunu.

14. Bwe Bakristo bakaka babikila mu landa “tifwani tia nzonzolo ya mbote”?

¹⁴ Nti bilendi tûla tala ti tuhengamane “mu tifwani tia nzonzolo ya mbote”? Tabongeno tifwani. Mu mbandu ya ntete, Bakristo bakaka bamwangasa nsangu ti tilumbu tia Yehova tiatûla. Kampe mukanda wabâ kô—bantu wu beri banzaka ti ntumwa Paulo watsoneka wo—weri singasaka musamu wo. Kani babonga ntangu ya taluzula misamu, Bakristo bakaka ba ku Tesalonike bakwikila musamu wo mpe babatika mu yangasa wo. Ka baketi’â wubakana ko tala ti babambukila misamu mia ba longesa Paulo bu kabâ na bawu. (2 Tes. 2:​1-5) Paulo walomba kwe mpangi zandi mu lembo kwikila misamu miamiansoni mi beri wâka. Mpe mu ba bakisa mu bungu dia bilumbu bieri kwizaka, Paulo wasukisa mukanda’andi wa nzole wa Bisi-Tesalonike ebu: “Yi ni mbote ya me beni Paulo, mu koko kwani ntsonekene yo, tidimbu tiena mu mikanda miani miamiansoni; ni bo nitsonekena.”—2 Tes. 3:​17, NWT.

15. Bwe tulendi tikengerela mu bungungu bulendi moneka ntiana’eti bwa matieleka bwena? Hana tifwani. (Tala mpe bifwani.)

¹⁵ Nti tulendi longoka mu misamu mia tâ Paulo kwe Bisi-Tesalonike? Bu tuwâka misamu mita lembo delakana na mio mi talongoka mu Bibila, peleko bu tuwâka nsangu tufweti sarila ndwenga. Ku ex-Union soviétique, mbeni zeto zayangasa mukanda wu beri tâka ti ku biro ya yinene watûka. Mukanda wo bampangi weri lombaka mu bâ na organizasio ya bawu kaka yaketi lembo tûka ku biro ya yinene. Mukanda wo wa matieleka weri monekaka. Kâ mpangi za kwikama ka zawubakana ko. Bawu bayizi bakula ti nsangu zeri mu mukanda wo ka zeri’â delakanaka ko na misamu mi balongoka. Lumbu ti, mbeni za  matieleka Internet na réseaux sociaux zisarilaka ntangu zakaka mu kotesa vwandi na mu tu hambasa. Kani tabika ti “mabanza [meto] makulu bâ yeko-yeko,” tulendi tikengerela bu tutiyula tala ti misamu mi tuta wâ peleko mi tuta tanga tintwari mena na matieleka ma talongoka.—2 Tes. 2:2; 1 Za 4:1.

16. Tintwari na Bisi-Rome 16:​17, 18, nti tufweti sa tala ti bantu bakaka bahengamane na matieleka?

¹⁶ Tatamana mu bâ mu bumosi na bô bê ba kwikama kwe Yehova. Nzambi zololo ti tabâ mu bumosi mu nsambululu’eto. Mbo tutatamana mu bâ mu bumosi ntangu zazansoni zi tusimbirila matieleka. Bô babansoni bahengamaka na matieleka, tihambula banataka mu timvuka; buna Nzambi tu lwengese mu ba dioka. Ku lweka lwakaka, beto beni tulendi hengama na matieleka.—Tanga Bisi-Rome 16:​17, 18.

17. Ntia ndandu tubakaka bu tuzabaka matieleka, mpe bu tutomo ma simbirilaka?

¹⁷ Bu tuzaba matieleka mpe bu tutomo ma simbirila, mbo tutatamana mu bâ penepene na Yehova, mpe mbo tubâ na timinu tia ngolo. (Efz. 4:​15, 16) Mbo tutikengerela mu ndongosolo za bungungu bwa Satana na nsangu zandi za mbi, mpe mbo tubâ mu kondo kwa bunkuta mu bungu ti Yehova mbo katukengerela mu ntangu ya mpasi ziyôkele. Tatamaneno mu simbirila matieleka, “mpe Nzambi ya tidzunu mbo kabâ nabeno.”—Flp. 4:​8, 9, NWT.