Ku Ouganda nabutukila, ku tizunga tia Gomba. Bantu babîngi beri bâka ku tizunga tio mputu zeri. Tizunga tieto ka tieri’â na courant ko, mpe mu mpimpa minda mia petrole tweri sarilaka.

 Bibuti biani, bieri salaka misitu, biakatuka ku Rwanda mu kwe bâ ku Ouganda. Misitu mia kafi na mia mankondi mieri nawu, mpe mankondi bu meri yelaka, mbo beri ma sarilaka malavu ma batâka nkumbu wagagi. Bibuti biani mbo bieri twilaka mpe nsusu, nkombo, ngulu na ngombe. Tikulu tieto na mpila yi bakunkurisila ya kuntuma na kwikila ti mukento wufweti tumamanaka bakala diandi ntangu zazansoni mpe kani kabwe ka wufweti’â watâka mabanza mandi ko.

 Bu ndieri na mvula 23, nayenda ku Rwanda mpe naye kota club za dance na bantu bakaka ba nkunku’ani. Mu bungu ti mbo ndieri vulu kwendaka mu club yimosi, mfumu za club yango bankungana nswa wa lembo futaka. Mbo ndieri zoloko filme zeri songelaka mpaka na misamu mia miangu. Bantu ba ndieri vulu baka na bo na nsaka zi ndieri saka biakuntuma mu nwaka malavu mamingi, mu bâ na miangu na mu sarilaka bunsunza.

 Mu 2 000 nayizi batika mu bâ na mwana mukento wumosi wu batâka nkumbu Skolastique Kabagwira, mpe tabuta bala batatu. Mu bungu dia misamu mi nalongoka mitariri bakento bu ndieri ntweniambo ndieri kekoloko ti Skolastique kafukamaka bu keri kunganaka mbote na bu keri kundombaka tima. Nayizi tâ ti bima biabiansoni bia kanda dieto bia meno bieri, mpe buna bu nazololo ni buna naketi bia sarila dieri nani dia sarila. Mbo ndieri vulu dukaka mu mpimpa mpe bu ndieri kotaka mu 3 heures, ntangu zazingi ku malavu ndieri bâka bu ndieri kâlaka. Bu ndieri konkotaka, tala ti Skolastique mande keri sarilaka mu zibula mwelo, mbo ndieri mutwaka.

 Ntangu yimosi nayizi baka tisalu tia bâ mfumu ya compagnie yimosi ya Sécurité, mpe mbongo zazingi ndieri bakaka. Ku nzo, Skolastique mbo keri yêlaka mu kundombaka mu dibundu diawu dia Pentecôtiste, kampe mbo keri banzaka ti mbo diaketi kunsobesa. Kâ, ka ndieri’a zoloko ko. Mpe nayizi tâ makangu na mukento wakaka. Mu bungu dia bifu biani bia miangu na bia bunsuza, Skolastique wabonga bala beto ba batatu mpe wakâla kwe bibuti biandi.

 Ndiku’eto yimosi ya kula yayizi kunzonela mbelo’ani mpe yakundomba nakalana na Skolastique. Yandi wakuntêla ti ka weri’a musamu wa mbote ko mu bungu dia bala bani, bahambana na tata’awu. Mu 2005 nayizi bika mu nwaka malavu, nayizi bika mukento wakaka, mpe nayizi karisa longo na Skolastique. Mu 2006, tayizi kwelana na Skolastique. Kâ miangu kwa mieri nani mpe mu mpila ya mbi ndieri tuminaka mukento’ani.

 Mu 2008 Mbangi yimosi ya Yehova yi batâka nkumbu Joël yatâ mbila ku nzo’eto, mpe nawâ misamu mi keri tâka. Yandi na Mbangi yakaka yi batâka nkumbu Bonaventure basa ngonda zazingi mu kwizi kuntalaka. Biyuvu biabingi ndieri yulaka nsungula bitariri mukanda wa Nzabukusu. Mbo ndieri dingaka mu songela ti Mbangi za Yehova bungungu bwe nawu. Mu tifwani, nabayula bwe balendi têla ti “yungi dia bantu” di bazonzelaka mu Nzabukusu 7:9 ha mutoto dibâ mu ntangu verse yitâka ti yungi dio “ditelamane ha matu ma tibuka tia timfumu [tia Nzambi] na ha matu ma mwana timeme.” Joël na luvivululu lwalwansoni keri haninaka biyuvu biani mvutu. Mu tifwani, wakunsongesa Izaya 66:1. Mu verse yo Nzambi mbo katâka mutoto “tisikamanu tia malu.” Mpe bwawu bu yungi dia bantu bu diena ha mototo, ha matu ma tibuka tia timfumu tia Nzambi ditelamane. Mpe natanga Mikunga 37:29 yitâka ti bantu ba sungama mbo bazinga ntangu zazansoni ha mutoto.

 Natambula mu longoka Bibila nandi. Buna meno na Skolastique, Bonaventure weri tu longesaka. Mu ntangu yi tweri kwe longoke nayizi bâ na nsatu ya soba mbelo’ani. Nayizi longoka mu songela buzitu kwe mukento’ani. Ka ndieri’â vutu dingaka ko kafukamaka bu keri kunganaka mbote na bu keri kundombaka tima, mpe ka ndieri’a vutu tâka ko ti bima biabiansoni bia kanda dieto bia meno kwa biabâ. Nayizi bika mpe mu talaka filme za miangu. Mu sa nsobolo zo, musamu wa mpasi weri mpe tifu tia tiyimina na kuluka zeri kundombaka.

 Mvula fioti ntete, natambika Christian, mwana’ani wa ntete, kwe kanda diani ku Ouganda. Kâ, bu natanga Lubambu 6:4-7, nayizi bakula ti ha meso ma Nzambi, meno na mukento’ani tufweti kipa bala beto mpe tufweti ba longesa mitieno mia Nzambi. Ntia mpila nsayi kwe beto na kwe mwana’eto mu ntangu yi tamukarisa ku nzo!

 Nayizi longoka ti Yehova Nzambi ya tiari yena mpe lukwikulu lwe nani ti wakundemvokela mu bungu dia mbelo’ani ya ntama. Nsayi yayingi ye nani mu bungu ti Skolastique watambula mu longoka Bibila tintwari na meno. Tayizi tihana kwe Yehova mpe tayizi batusu beto bole mu tilumbu tia 4 décembre 2010. Bwawu bu lukwikuku lwe neto mu beto bole mpe nsayi ye neto ya sarila mitieno mia Bibila mu kanda dieto. Mukento’ani nsayi ye nandi mu bungu ti ku nzo nibâka bu nimanisaka ku tisalu. Nsayi mpe ye nandi mu bungu ti mu nsayi na mu buzitu nimubongelaka, ka nasâla nwe malavu ko, mpe ka nasâla muntu wa miangu ko. Mu 2015 bayizi kungana dema dia bâ mukuluntu mu kwizi bâ muvungi mu timvuka tieto. Mu bala beto 5, batatu bê ba batusu.

 Bu nabatika mu longoka Bibila, ka ndieri’â tambulaka misamu mi beri tâka ko tala ti ka ndieri’â tomo mia bakulaka ko. Kâ nayizi yituku mu mpila yi beri haninaka biyuvu biani mvutu. Skolastique na meno tayizi longoka ti bô batâka ti Nzambi basarilaka, bafweti tumamana ntumunu zandi zazansoni. Matondo mamingi nivutulaka mu bungu ti Yehova wakungana bweso bwa bâ ndiku’andi na bwa bâ ndiku ya bantu bamusarilaka na lukwikilu. Bu nibanzaka mbelo’ani ya ntama, mbo nibakulaka ti mu lubakusu lwa Nzambi, muntu ni muntu wa sungama wulendi sa nsobolo zifwanakane mu tâ Nzambi nsayi.