Tilumbu timosi, mu ntangu Eliso we Mbangi ya Yehova, keri longokaka na mukento wumosi, bantu bole bayizi tala mukento wango; mfumu ya dibundu weri na mukento’andi. Eliso wayizi wâ ti bantu bango mwana’awu wa wumosi bafwilulu.

Mu ntangu Eliso kabatêla ti nkatika tiari weri mu tâka bu bahombesa mwana’awu, mfumu ya dibundu na mukento’andi babatika mutomo dila. Ha manima, na nkesi zazansoni mfumu ya dibundu watâ ti: “Ka nita bakula ko mu bungu dia nti Nzambi kabikiri ti mpasi zo zatuturila! Bwe kalendi ku nkaturila mwana’ani wa wumosi? Tûka mvula 28 nisarilaka Nzambi, kâ ni mu mpila yi kata kumvuturila matondo! Mu bungu dia nti Nzambi kahondele mwana’ani?”

Eliso wabangula kwe bantu bo ba bole ti ka Nzambi’â ko wabonga mwana’awu. Wayizi ba zonzela nkululu, mvumbukulu ya ba fwa na misamu misaka ti Nzambi kabika mpasi zatuturila. Mfumu ya dibundu na mukento’andi batâ kwe Eliso ti wayizi ba hana mvutu mu biyuvu bi beri tiyulaka mu lusambulu lwawu.

Lumingu lwalanda, mfumu ya dibundu na mukento’andi bakâla kwe mukento wuna mpe ha timosi na mukento wuna balongoka Bibila na Eliso. Eliso na mukento wuna tikapu tia “Une espérance réelle pour vos proches qui sont morts,” beri zonzelaka mu buku dia Qu’enseigne réellement la Bible ? Timoko tiayôka mu mpila ya mbote.

Ha manima, bantu bo ba bole bayenda ku lukutakanu lwa lunene lwa tilumbu timosi lwa Mbangi za Yehova lwayôka ku hata dia Tbilisi, ku Georgie. Luzolo na bumosi bu bamona kûna bwatomo ba simba mitima; tûka ntama beri tindisaka bantu ba eglize’awu mu bâ na bifu bio, kâ balembana.