Bibila ka disarilaka ntêlo ya “katula zimi” ko mu zonzela dukisa kwa mwana weka lembo butuka, mu moyo wa nguri’andi. Kâ, verse zazingi za Bibila zihanaka mabanza ma Nzambi mu bungu dia luzingu lwa muntu, na lwa mwana weka lembo butuka.

 Luzingu kabu dia Nzambi diena. (Mbatukulu 9:6; Mikunga 36:9) Luzingu ni luzingu ntalu lwena kwe Yandi, na luzingu lwa mwana we mu moyo. Buna, tala ti muntu wuweyi mu honda mwana weka lembo butuka, yandi fwanane na muntu wuhondele muntu.

 Musiku wa Nzambi kwe bala ba Israele watâ: “Tala ti bantu bata nwana babotase mukento we na zimi, mboko mwana’andi wudukiri matiombe, mpe ka hâ fwiri’â muntu ko, muntu wuyirikiri mio fweti futa ntalu ya mbongo zi mu zengela bakala dia mukento wo, yandi fweti za futa mu nzila ya bamfundisi. Kâ tala ti muntu wufwiri, fweti hana luzingu mu bungu dia luzingu.”​—Ndukulu 21:22, 23. a

•  Luzingu lwa muntu ntia ntangu lubatikaka?

•  Ngano Nzambi mbo kalemvokela wô wakatula zimi?

•  Ngano katula kwa zimi kwa mbi kwena tala ti luzingu lwa nguri peleko lwa mwana lukotele mu mpasi?

 Kwe Nzambi luzingu lwa muntu mu zimi lubatikilaka. Mu Zu diandi, Bibila, Nzambi, mwana weka lembo butuka, ntiana muntu kabongelaka wo. Tala bifwani bisongelaka ti Nzambi ka saka luswaswanu ko ha kati dia mwana we mu zimi na wô wubutukiri.

•   Mu lutumu lwa mpeve ya Nzambi, Mutinu Davide watâ: “Meso maku makumona bu ndieri kwa menga mu moyo wa nguri’ani.” (Mikunga 139:16) Nzambi wabongela Davide ntiana muntu wa mukaka ntete kabutuka.

•   Ntete mbutukulu ya mbikuri Yeremi, Nzambi wazaba ti mbo kaketi mu hana tisalu tia nzitukulu. Nzambi wamutêla: “Ntete nakuyirika mu moyo wa nguri’aku nge nazaba, mpe ntete mbutukulu’aku nge nasantukisi. Nasiri ti nge wabâ mbikuri mu bungu dia makanda.”​—Yeremi 1:5.

•   Like, titsoniki timosi tia Bibila, doktere, wasarila ntêlo yo ya Greke mu zonzela mwana weka lembo butuka na mwana wubutukiri.​—Like 1:41; 2:12, 16.

 Bô bakatula zimi Nzambi lendi balemvokela. Tala ti bwawu bu mabanza ma Nzambi mu bungu dia luzingu batambulaka, ka bafweti’â bafwemaka ko peleko batilandaka mambu. “Yehova tiari tia lemvokela tie nandi na tiari tia mutima [. . .] Ntiana kwa ku dukilaka ntangu bu kwe mala na ku yi diaminaka, misamu mieto mia mbi mala katûlaka mala na beto.” b (Mikunga 103:8-12) Yehova mbo katomo lemvokela bô babansoni basobaka mabanza mu bunsungu mu bungu dia masumu mawu, na bô batulaka zimi.​—Mikunga 86:5.

 Mu mio mi têle Bibila mu bungu dia luzingu lwa mwana weka lembo butuka, mpasi za luzingu lwa nguri peleko lwa mwana ka zilendi zatuma muntu ko mu katula zimi.

 Mbo tala ti mu ntangu ya mbutukulu misamu mia mpasi misiri ti basola luzingu lwa mwana peleko lwa nguri? Mu misamu mia mpila yo, milembo vulu tûlaka, bantu babwiriri musamu bafweti sola nani bavukisa.