Bilumbu biabiansoni nsangu na binsinsa bitâka lwaka biyôkaka mu tele, mu telefone, mu tablete na mu ordinatere.

Mpe bala mbo batalaka bio.

Bwe lendi kengerela mwana’aku ngatu nsangu zo zalembo mu tâ lwaka?

•  Ntia nsobolo nsangu zo zinataka kwe bala?

•  Bwe lendi bakisila bala baku mu zabirila nsangu zitâka lwaka?

•  Tala ti mwana’aku musamu wa mpasi kabwabane na wo?

• Bala babingi bamonaka mpasi mu nsangu za mbi zi bawâka. Ni bu sa ti bala bakaka ka batâka misamu mie nawu ku mutima ko, kâ misamu mi bamonaka milendi tomo ba mwisa mpasi. * Balendi kwizi tomo bâ na lwaka.

• Bala balendi lembo bakula nsangu zi bawâka. Mu tifwani, bakaka balendi banza ti misamu mi bamweni mbo miturila kanda diawu. Mpe bala ba ntwenia batalaka binsinsa bia mbi mbala zazingi balendi banza ti misamu miango mbala zazingi mi yilamanaka.

• Bala balendi lembana mu bakula tala ti musamu wubatazonzela ni buna wayôkele. Kampe ka bata bakula ko ti bimwangisi-nsangu organizasio zena zidilaka ku manima ma bantu. Buna, bimwangisi-nsangu bilendi sa ti misamu miamoneka mia nkatika mia tiari ngatu bantu badinga mu tomo zaba nsangu mpe batatamana mu tala zo.

• Dimineno lutangu lwa nsangu za mbi zilendi wâ bala beno. Ka wuta zolo tâ ko ti bala beno ka balendi’â bazaba misamu mita yôka mu nza ko. Kâ, ka bwena bubote ko kwe bawu mu vulu monaka na mu vulu wâka nsangu zo za mbi.

  “Ntangu zakaka, bakala diani na meno mbo tuzonzelaka nsangu ziyôkaka, kâ ka tuzabaka ko ti nguria lwaka wutâka kwe bala beto ba batuwâka.”​—Maria.

  Mutieno wa Bibila: “Maniongo mu mutima wa muntu nôkesa manôkesaka.”​—Bingana 12:25.

• Wirikileno na luvivululu lwalwansoni mpe songeleno tiari tia mutima. Tala ti musamu wa mpasi wena kwe mwana’aku mu zonzela misamu mi kamweni, mu têla kasila wo dessin. Zonzeleno musamu wuta mu tâ lwaka, bu lukwe sariri nzonzolo yi kabakula, kâ ka lutomoandi mu zonzela mio lembolo salu.

  “Mwana’eto wa wukento mbo wumonaka bubote bu tubongaka ntangu yamuwirikila. Kâ, ka monaka bubote ko bu tumutêlaka ti: ‘Misamu bu mieka bwawu bu, fweti yukunu.’”​—Sarahi.

  Mutieno wa Bibila: “Muna muntu fweti bâka na manzangu ma wirikila, mande ma zonza.”​—Zaki 1:19, NWT.

• Bakiseno bala beno mu bâ na mabanza ma delakana mu nsangu. Mu tifwani, nsangu za muntu wu balabiri zilendi sa ti mwana wabanza ti musamu wo tûla wuvulu tûlaka. Banguleno kwe mwana’eno ntia misamu lukubikaka ngatu lwamukengerela. Buna, zabeno ti musamu wamana bâ nsangu, ni mu bungu ti wa nzitukulu wena.

  “Bakiseno mwana’eno mu zabirila mbanzulu zandi. Vula-vula, mabanza mayôka masaka ti mbanzulu za butuka; buna, tala ti tubakisi bala beto mu bâ na mabanza ma mbote, bilumbu bia ku matu mbo bimoneka bia mbote kwe yandi.”​—Lourdes.

  Mutieno wa Bibila: “Mutima wa muntu we na ndwenga munwa’andi wuhanaka lenda dia bakula mpe mbo wusaka ti misamu miandi miawisa.”​—Bingana 16:23.