Sitaani ne dayimooni balina obuyinza bungi ku bantu, era Bayibuli egamba nti: “Ensi yonna eri mu buyinza bw’omubi.” (1 Yokaana 5:​19) Bayibuli eyogera ku ngeri Sitaani gy’afugamu abantu.

•   Okulimba. Bayibuli ekubiriza Abakristaayo ‘okuziyiza enkwe za Sitaani.’ (Abeefeso 6:​11) Akamu ku bukodyo Sitaani bw’akozesa, kwe kulimbalimba abantu ng’abaleetera okulowooza nti abo abamuweereza, baba baweereza ba Katonda.​—2 Abakkolinso 11:13-​15.

•   Eby’obusamize. Sitaani abuzaabuza abantu okuyitira mu basamize, abalaguzi, n’abalogo. (Ekyamateeka 18:10-​12) Okukozesa ebiragalalagala, omuntu omulala okufuga ebirowoozo byo, n’engeri z’okufumiitiriza ezireka omuntu nga takyalina ky’alowooza, zimuleetera okufugibwa dayimooni.​—Lukka 11:24-​26.

•   Amadiini ag’obulimba. Amadiini agayigiriza ebintu eby’obulimba galeetera abantu okujeemera Katonda. (1 Abakkolinso 10:20) Enjigiriza ng’ezo ez’obulimba Bayibuli eziyita “okuyigiriza kwa badayimooni.”​—1 Timoseewo 4:1.

•   Okukwatibwa dayimooni. Bayibuli eyogera ku bantu abaaliko emwoyo emibi. Ebiseera ebimu emyoyo egyo gyafuulanga abantu abazibe, gyabalemesanga okwogera, era gyabaleeteranga okwesalaasala n’amayinja.​—Matayo 12:22; Makko 5:​2-5.

Engeri gye tuyinza okwewalamu enkwe za Sitaani

 Tosaanidde kutya dayimooni kubanga Bayibuli etubuulira engeri gye tusobola okuziyizaamu Sitaani:

•   Fuba okumanya obukodyo Sitaani bw’akozesa osobole okuba ‘ng’omanyi enkwe ze.’​—2 Abakkolinso 2:​11.

•   Yiga ebiri mu Bayibuli era obikolereko. Okukolera ku magezi agali mu Bayibuli kijja kukukuuma Sitaani aleme kukutuusaako kabi.​—Abeefeso 6:​11-​18.

•   Weggyeeko buli kintu ekirina akakwate ne Dayimooni. (Ebikolwa 19:19) Ebyo bizingiramu ennyimba, ebitabo, magazini, ebipande, ne vidiyo ezikubiriza eby’obusamize.