Waliwo abagamba nti omuntu kimutwalira ennaku 21 okwemanyiiza okukola ekintu ekirungi. Naye ekituufu kiri nti, abantu abamu kibatwalira ennaku ntonoko okukola enkyukakyuka ez’amaanyi mu bulamu bwabwe, ate abalala kibatwalira ekiseera kiwanvu ddala. Ekyo kyandikumazeemu amaanyi?

Lowooza ku mbeera eno: Ka tugambe nti oyagala okutandika okukola dduyiro emirundi esatu buli wiiki.

• Wiiki esooka, otuuka ku kiruubirirwa kyo.

• Wiiki ey’okubiri, oyosaamu olunaku lumu.

• Wiiki ey’okusatu, otuuka ku kiruubirirwa kyo.

• Wiiki ey’okuna, olemererwa okukola dduyiro wadde olunaku olumu.

• Wiiki ey’okutaano, otuuka ku kiruubirirwa kyo, era okuva olwo toddamu kwosa kukola dduyiro.

Kiba kikutwalidde wiiki ttaano okwemanyiiza okukola dduyiro. Kiyinza okulabika ng’ekiseera ekiwanvu, naye bw’omala okutuuka ku kiruubirirwa kyo ekyo, kikuleetera essanyu lingi olw’okuba weemanyiizizza okukola ekintu ekikuganyula.

Bayibuli etukubiriza obutakoowa. Ekikulu si gye mirundi emeka gy’oba ogudde, wabula gye mirundi emeka gy’oba oyimuse.

• Bw’ogwa, tokitwala nti olemereddwa ddala. Emirundi egimu oyinza okulemererwa okukola ekyo ky’oyagala okukola.

• Ebirowoozo byo bisse ku mirundi gy’osobodde okukola ekituufu. Ng’ekyokulabirako, bwe kiba nti oyagala kulongoosa mu ngeri gy’oyogeramu n’abaana bo, weebuuze: ‘Ddi lwe nnasembayo okuwulira nga njagala okuboggolera omwana wange naye ne simuboggolera? Mu kifo ky’ekyo, kiki kye nnakola? Ekyo nnyinza ntya okuddamu okukikola?’ Okwebuuza ebibuuzo ng’ebyo kisobola okukuyamba okumalirira okukola ekituufu mu kifo ky’okumalira ebirowoozo ku mirundi gy’oba olemereddwa okukola ekituufu.

Wandyagadde okumanya engeri Bayibuli gy’esobola okukuyamba ng’oyolekagana n’ebintu ebikweraliikiriza, ng’oyagala okufuna essanyu mu maka, oba ng’oyagala okufuna essanyu erya nnamaddala? Yogerako n’omu ku Bajulirwa ba Yakuwa oba genda ku mukutu gwaffe ogwa Intaneeti, jw.org/lg.