Osita odekua ni ri eco ovu ayikoru azini e’yo ecopi ’ba aje ma alea ’diyi ndepi ra ni. Tipika o’di ’diyi ru, emi eco ovu osuta si isuzu kini sa azini okpo emini angiri ri emi nga ayu odekua ma ta mbazu. O’du koza were ri ojata rua ni be eco fe agyi ma ta mbaza mi aje ma azi be ri eco eca ewaru. Le emi iritro ma ’ye ojata ecozu odekua azini aje emini ri ma ta mbazu. Egaza Bibliani eco emi aza ko e’yo ewaru ’diyi otuzu ngoniru?

E’YO BIBLIA NI ’YORI: “Leta avasiri eri asi teza be, eri asi ndriza be.” Azini, leta “ndruni e’yo i vileri ku, omvini e’yo aokosi ku.” (1 ’Ba Korintoa ’Diyi 13:4, 5) Andre o’diri ru, mi tutuni asi fe odekua mini ma dria. Te di, agupi mini eco e’do etrumu mi asi ni isi ku ani le mi avi kini agupi mini le mi ma fe ini sa indi ’dini ri ku. Asi teza si azini asi ndriza si, mi eco eri ma aza ko etrumuzu kini mva emini ma ta mbazu ri le eri indi.

“Emi agupiru ’diyi . . . emi ma ovu oku emini vu nita be.” (1 Petero 3:7) Le mi ma ni ra kini oku mini ni nga okpo angiri ayu odekua emini ri ma ta mbazu. Azi o’di ’diyi eco fe erini ecazu andezaru omisi, ruasi kaniku asisile droza angiri be. Etu azini si, eco ovu aoko si mi be, te le mi ovu aoko si ku a’dusiku “’ba aoko ’bapi mbele kuri nde ’ba okporuri onyisi ra.” (E’yo O’beza 16:32) Le mi ma e’da vata angiri azini mi ma fe erini atita erini le ri.—E’yo O’beza 14:29.

AFA MINI ECO ’YERI:

• Ata yi: Mi ma ko oku mini ma aza mva ta mbazu, vini inisi indi. Mi ma omvi sa mini ayu azi azi ’diyi ngazu ri mini ecozu sa angiri ayuzu mima oku azini odekua be

• Andre yi: Agupi mini ka le mini azakoza fe odekua ta mbaza si, le mi ma a’i ra. Ka eco ’ye kililiru ku ti, le mi ma e’da erini geri ’yezu kililiri asi ndriza si aga mini ’yozu erini kini ’ye onzi ri

E’YO BIBLIA NI ’YORI: “Yi iri tro nga efu rua aluru.” (E’doza 2:24) Emini tro ovuzu ’ba o’di be aku emini ma alea ti, emi ma ega kini emi nga kiri “rua aluru.” Emi ma ’ba okpo dria ecozu agyi emini ma ta mbazu okporu.

Oku, emi ovu awa’difosi azakoma azini atita agupi ni feleri si. E’yo mini nze awa’difosi ri eco ‘atita fe.’ (E’yo O’beza 12:18) Agupi, emi ma nze e’yo leta emini oku emini lezu azini orodri eyini ri ngopi’ari ma dria yini. Mi idu eri geri erini aku ma ta mbazuri si.—E’yo O’beza 31:10, 28.

“’Ba aluni ma ndru e’yo i ngulupi ma aza kozuri ku, te e’yo ’ba azini ma aza kozuri’i.” (1 ’Ba Korintoa ’Diyi 10:24) Sa dria si, mi ma ’ye e’yo onyiru tu ri mi aje ma azi ni i. Tualu emi ma fe sa e’yo nzezu, awa’difo fezu, azini e’yo erizu emi eselea. Le mi ma ovu indra koko icita agupi pini yi lazu oku be risi. Mi ega e’yo afa mi aje ma azi ni le ’diyi ma dria. Biblia ’yo ’dini: “Emi oga emini emi ecizu tualu ku, pe kiri emi ka e’yo ede emi eselia ’yezu ’dinile.” (1 ’Ba Korintoa ’Diyi 7:3-5) Ani emi ma otu e’yo ’di asi adasi emi eselia. Asi teza azini vata mini ri nga fe oata agyi emini ma alea ri nga eca okporu.

AFA MINI ECO ’YERI:

• Mi ma avi sa isuzu oazu mi aje ma azi be ku

• Mi ma ’ye e’yo were were ecopi mima leta e’dapi mi aje ma azi ni ’diyi, ekile afa sizu kaniku feta were fezu ri le ’diyi

E’YO BIBLIA NI ’YORI: “Engazu mini ndra ovuria mvaru mi ni e’yo siza alatararu ecopi mi ’bazaru onduaru pata isuzu.” (2 Timoteo 3:15) Mi otu afa mini nga ’ye odekua mini imbazu ri. De isu osini nga ku, eri ovu ondua angiri be e’yo onizu. Erini ovuria okpojoa, odekua mini eco o’duko azini e’yo ’yeza mini ama ra. Mi ma la erini afa erini nga ovuria mvaru. Erini ta tro afa mini la ri vazu ku ti, eco eri ma aza ko afa laza lezu erini zoria.

Odekua mini ovuni eli be were tu e’yo nzeza mini Mungu ma dria ri erizu ku. Mi ma fe ma eri mini Yehova ni ziria ci. (Azita Amvizu 11:19) Emini aviria tualu, mi ma nze e’yo afa Munguni o’ba ’diyi ma dria. (Zaburi 78:3, 4) Mi mva ni zoria, eri nga mi leta Yehova niri ne ani eri nga oni eri lezu indi.

AFA MINI ECO ’YERI:

• Mi ma izi ondua ecozu odekua mini imbazu ri isuzu

• Mi ma amvi e’yo angiri angiri ’diyi ma ale odekua ni ecozu e’dozu e’yo onizu drioru