1. 1. SATANA ZABOLO. Satana, anzelu motomboki nde moto oyo abimisaka koyinana nyonso oyo tozali komona lelo oyo. Nzambe akoboma Satana mpe bato nyonso oyo bazali kolanda ezaleli na ye ya koyina basusu.​—Nzembo 37:38; Baroma 16:20.

2. 2. MOKILI MABE YA SATANA. Nzambe akolongola bato nyonso ya mabe oyo batindaka bato na koyinana. Na kati ya bato yango tokoki kotánga bato ya politiki mpe bakonzi ya mangomba. Nzambe akolongola mpe ebongiseli ya mombongo ya lokoso, oyo etondi na kanyaka mpe oyo elyelaka bato.​—2 Petro 3:13.

3. 3. KOZANGA KOKOKA. Biblia elobi ete moto nyonso abotamaka na ezaleli ya kozanga kokoka, elingi koloba mposa ya kokanisa, ya koyoka, mpe ya kosala makambo ya mabe. (Baroma 5:12) Kokolisa momeseno ya koyina basusu ezali moko ya makanisi ya mabe ya ezaleli ya kozanga kokoka. Nzambe akosalisa bato bálongola makanisi nyonso ya kozanga kokoka mpo makambo nyonso oyo etindaka bato na koyinana elongwa mpo na libela.​—Yisaya 54:13.

1. 1. MAKAMBO OYO EZANGI BOSEMBO EKOZALA TE. Mokili ekoyangelama na Bokonzi ya Nzambe, guvɛrnema moko ya bosembo mpe oyo ekoumela libela, guvɛrnema yango ezali na likoló. (Danyele 2:44) Moto akokanisela moto mosusu mabe te, mpe moto moko te akoboya makanisi ya basusu. Nzambe akobongisa makambo nyonso oyo ezangi bosembo oyo bato bazali kokutana na yango lelo oyo.​—Luka 18:7.

2. 2. MOTO NYONSO AKOZALA NA KIMYA. Moto moko te akonyokwama mpo na mobulu to bitumba. (Nzembo 46:9) Bato nyonso ya mabele bakolinga kimya, yango wana mabele ekozala esika ya malamu mpenza ya kofanda.​—Nzembo 72:7.

3. 3. MOTO NYONSO AKOZALA NA BOMOI YA KOKOKA. Bato nyonso ya mabele bakolingana na bolingo ya solo mpenza. (Matai 22:39) Moto moko te akotungisama na makanisi mpo na makambo ya mabe to basuvenire ya mabe. (Yisaya 65:17) Ntango koyinana nyonso ekosila, bato “bakosepela mpenza na kimya mingi.”​—Nzembo 37:11.

Okosepela kofanda na mokili ya ndenge wana? Ata lelo oyo, kosalela mitinda ya Biblia ezali kosalisa bato mingi bátika ezaleli ya koyina basusu. (Nzembo 37:8) Yango nde bamilio ya Batatoli ya Yehova na mokili mobimba bazali kosala. Atako bautá na mimeseno ndenge na ndenge mpe moto na moto abɔkwamá na ndenge na ye, bazali kofanda na bolingo mpe na bomoko ndenge bandeko ya libota moko bafandaka.​—Yisaya 2:2-4.

Batatoli ya Yehova bakosepela koyebisa yo ndenge bayikaki mpiko ntango basalelaki bango makambo ya kozanga bosembo to ntango bakaniselaki bango mabe. Makambo okoyekola ekosalisa yo obanda kolongola mokemoke ezaleli mabe ya koyina basusu mpe okóma nde kolinga bango. Okoyekola ndenge ya kolinga bato nyonso, ata bato oyo bazalaka na botondi te to baoyo bayinaka basusu. Yango ekosala ete ozala na esengo sikoyo mpe boyokani na yo ná basusu ekokóma malamu mpenza. Oyo eleki nyonso, okoyeba makambo oyo okoki kosala mpo ofanda na Bokonzi ya Nzambe ntango ezaleli ya koyina basusu ekosila mpo na libela.​—Nzembo 37:29.