Mpo na nini bato bayinanaka?
Mpo na nini na mokili mobimba bato bayinanaka? Mpo na kozwa eyano, tosengeli naino koyeba ndimbola ya liloba “koyina,” ntina oyo bato bakómaka koyina basusu, mpe ntina oyo na mokili mobimba bato bayinanaka.
Koyina ezali nini?
Koyina ezali koyokela moto to bato moko boye nkanda makasi mpenza to komona ete bazali banguna. Yango ezali te koyokela moto moko boye nkanda mpo na mwa ntango.
NDENGE OYO KOYINA BASUSU EBANDAKA
Bato bakómaka koyina basusu mpo na bantina mingi. Mbala mingi bato bayinaka bato ya lolenge moko boye ata soki basali likambo ya mabe te. Bato oyo bayinami bakoki komonana lokola bato mabe mpenza, oyo bazali kotya basusu na likama mpe bakoki kobongwana te. Bakoki komonana lokola bato mpamba, lokola nde bazali likama mpo na basusu, to lokola bato oyo babimiselaka basusu mikakatano. Mbala mosusu, bato oyo bayinaka basusu ezali bato oyo banyokolá bango, basalelá bango makambo na bosembo te, to bakutaná na makambo oyo etindá bango báyinaka bato.
NTINA OYO NA MOKILI MOBIMBA BATO BAYINAKA BASUSU
Moto akoki koyina bato ya lolenge moko boye nzokande amoná naino bango te. Na ndakisa, moto moko boye akoki koyina etuluku moko boye ya bato kaka mpo baninga to bandeko na ye bayinaka bango. Yango wana, soki moto ya libota moko azali koyina bato moko boye, okomona bandeko na ye mpe babandi koyina bato yango.
Soki toyebi ndenge koyinana epalanganaka, tokoyeba mpe ntina oyo bato mingi bayinaka bato mosusu. Nzokande, mpo na kosilisa koyinana oyo etondi na mokili, tosengeli koyeba esika oyo yango eutá. Kutu Biblia emonisi yango polele.
BIBLIA EMONISI ESIKA KOYINANA EUTÁ
KOYINANA EUTÁ NA BATO TE. Koyinana ebandaki ntango anzelu moko na likoló, oyo akómaki kobengama Satana Zabolo, atombokelaki Nzambe. Zabolo “azalaki mobomi-bato ntango abandaki” botomboki na ye. Lokola azali “moto ya lokuta mpe tata ya lokuta,” akobaki kotinda bato báyinanaka mpe bábundaka. (Yoane 8:44; 1 Yoane 3:11, 12) Biblia elobi ete azali na mayele mabe, na nkanda, mpe azali na nkanza.—Yobo 2:7; Emoniseli 12:9, 12, 17.
EZALI MPASI TE ETE BATO YA KOZANGA KOKOKA BÁYINANA. Adama, moto ya liboso, alandaki ndakisa mabe ya Satana mpe asalaki lisumu. Yango wana, bato nyonso babotamaka na lisumu mpe na kozanga kokoka. (Baroma 5:12) Kaina, mwana ya liboso ya Adama, ayinaki leki na ye Abele mpe abomaki ye. (1 Yoane 3:12) Atako bongo, lelo oyo, bato mingi balingaka basusu mpe bayokelaka bango mawa. Kasi, lokola tobotamaka na lisumu, bato mingi balukaka kaka bolamu na bango moko, bakómaka na likunya, mpe na lolendo. Yango nde bizaleli mabe oyo etindaka bango bayina basusu.—2 Timote 3:1-5.
MOTO OYO ALINGAKA TE BATO OYO BAKESENI NA YE AZALAKA PENE YA KOYINA BASUSU. Mokili oyo tozali ezali kotinda bato báyinanaka na ndenge oyo ezali kotinda bato báyokelanaka mawa te, bázala na makanisi mpe na bizaleli mabe. Bato bazali kolinga te bato oyo bakeseni na bango, bazali kokaniselana mabe, kokatelana mangala, kotumolana, mpe kobebisa biloko ya basusu mpo “mokili mobimba ezali kolala na nguya ya moto mabe,” Satana Zabolo.—1 Yoane 5:19.
Kasi, Biblia esuki kaka te na kolobela esika koyinana eutá. Emonisi mpe ndenge ya kosilisa yango.
Talá mpe...
BIYANO NA MITUNA YA BIBLIA
Nzambe nde akelaki Zabolo?
Satana autá wapi? Talá ntina oyo Yesu alobaki ete Zabolo “akangamaki makasi te na solo.”
BIYANO NA MITUNA YA BIBLIA
Lisumu ya ebandeli ezalaki nini?
Adama ná Eva baboyaki kotosa Nzambe mpe bakómaki bato ya kozanga kokoka, kaka lokola maladi mabe, bátikela mpe bana na bango lisumu yango.
