Ezali na makambo mingi oyo moto nyonso soki atali akoki koloba mbala moko soki ezali malamu to mabe. Na ndakisa, koboma moto, kosangisa nzoto na moto na makasi, kobɛbisa bana, bato mingi bayebi ete ezali mabe. Nzokande, bizaleli lokola kozanga mbeba, boboto mpe motema mawa, bato mingi bakoloba ete ezali malamu. Kasi na makambo mosusu ya bomoi, na ndakisa makambo etali kosangisa nzoto, bosembo, to ndenge ya kobɔkɔla bana—mingi bandimaka ete ezali na yango mabe te moto asala ndenge ye moko amoni malamu. Bakanisaka ete oyo nyonso moto aponi kosala ezali mabe te. Mbala mingi bato bazwaka bikateli na kotalela ndenge bazali komonela makambo to ndenge bato mosusu bazali komonela likambo yango. Yango ezali mpenza lolenge ebongi?

Mbala mingi tozwaka bikateli na kotalela ndenge oyo tozali komonela makambo, to na kotalela likoki na biso ya kokesenisa mabe ná malamu, oyo babengi lisosoli. (Baroma 2:​14, 15) Ata mwana oyo azali naino moke mpenza, akoki koyeba likambo oyo ezali malamu ná oyo ezali mabe, akoki ata koyoka mpasi soki asali mabe. Wana tozali kokola, lisosoli na biso emesanaka na bizaleli oyo tozali koyekola na libota, epai ya baninga, balakisi, bato ya esika tofandi, lingomba mpe mimeseno ya mboka. Ntango tozali kozwa bikateli, lisosoli na biso eyebisaka biso soki ekateli oyo tozali kozwa eyokani na makambo oyo toyekolá to te.

Likoki na biso ya kokesenisa mabe ná malamu ekoki kotinda biso tómonisela bato motema mawa, botɔndi, mpe bosembo. Ekoki mpe kopekisa biso kosala makambo oyo ekoki kopesa bato oyo tolingaka mpasi to koloba makambo oyo ekoki koyokisa biso nsɔni mpe kopesa biso mpasi.

Ndenge oyo tomonelaka makambo ezalaka ntango nyonso malamu? Elenge mobali moko na nkombo, Garrick, alobaki boye mpo na bomoi oyo aponaki: “Ngai moko nde nakoloba soki likambo boye ezali mabe to malamu.” Kasi, ayaki komona ete kosala makambo oyo azalaki komona ete ezali malamu, ezalaki komemela ye bolamu te. Nsukansuka, ye moko alobaki ete akómaki na bomoi ya esengo te mpo amipesaki na pite, badrɔgɛ, kolangwa masanga mpe mobulu makasi.

Longola ndenge oyo biso moko tomonelaka makambo, mbala mingi mpe tozwaka bikateli na kotalela ndenge oyo bato mosusu bakotalela bikateli yango. Kosala bongo ekoki kosalisa biso tózwa matomba na eksperiansi mpe bwanya oyo bazali na yango. Bato ya libota na biso, baninga mpe bato oyo tofandi na bango esika moko bakopesa biso limemya soki tozali kosala makambo oyo bamoni ete ezali malamu.

Ndenge oyo bamosusu bamonelaka makambo ezalaka ntango nyonso malamu? Ntango azalaki elenge mwasi, Priscila azalaki kosala makambo oyo baninga na ye mingi bazalaki kosala, na ndakisa kosangisa nzoto liboso ya kobalana. Kasi, ayaki koyeba ete kosala makambo oyo bato mingi bazalaki komona mabe te ezalaki kopesa ye esengo te. Abakisi: “Kosala oyo moto nyonso azalaki kosala ezalaki mpenza likambo ya malamu te mpo na ngai. Yango ezalaki kotinda ngai nazwa bikateli ya mabe mpe nazalaki komitya na makama mingi.”

Ndenge oyo biso moko tomonelaka makambo mpe ndenge bamosusu bamonelaka makambo, ezali na ntina mingi ntango tolingi koyeba soki likambo boye ezali malamu to mabe. Kasi, yango ekoki te mpo na kozwa bikateli oyo ekobimisa ntango nyonso matomba ya malamu. Tokoki komipesa mpasi to mpe kopesa basusu mpasi mpo tomonaki te na mosika makama oyo bikateli na biso ekobimisa. (Masese 14:12) Lisusu, ata soki biso mpe bato oyo bazali zingazinga na biso tomonaka ete likambo boye ezali malamu to te, yango elakisi te ete ezali kaka bongo to ekoki kobongwana te. Kutu, ezali na bizaleli mosusu oyo na kala bato mingi bazalaki komona yango mabe, oyo sikoyo ezalaka lisusu mabe te. Ndenge moko, ezali mpe na makambo oyo na kala bato bazalaki komona yango malamu kasi sikoyo ezali lisusu bongo te.

Nini mpenza ekoki kosalisa biso tóyeba likambo oyo ebongi to ebongi te? Ezali na mibeko oyo etali bizaleli malamu oyo biso nyonso tosengeli kolanda mpe oyo ezali bongolabongola te?

Okosepela koyeba ete ezali na buku moko oyo okoki kotyela motema, oyo litambwisi na yango ezalaka malamu esika nyonso mpe mpo na moto nyonso! Lisolo oyo elandi ekolobela eloko oyo ekosalisa biso mpo tóyeba soki likambo boye ezali malamu to mabe.