Tosengeli te kokanisa ete lokola kaka bazalaki wana te ntango Yesu abandisaki Bilei ya mpokwa ya Nkolo, nde Yesu aboyaki bango to bango basundolaki ye. Yesu alingaki kaka kozala elongo na bantoma na ye na libaku yango.

Azalaki kondima bayekoli 12, azalaki kondima mpe bayekoli 70. Yesu aponaki liboso bato 12 kati ya bayekoli na ye, mpe abengaki bango bantoma. (Luka 6:​12-16) Yesu azalaki na Galile ntango “abengaki bantoma zomi na mibale” mpe “atindaki bango bákende kosakola Bokonzi ya Nzambe mpe kobikisa bato.” (Luka 9:​1-6) Na nsima, ntango azalaki na Yudea, Yesu “aponaki bayekoli mosusu 70 mpe atindaki bango mibalemibale.” (Luka 9:51; 10:1) Na yango, Yesu akómaki na bayekoli na bisika ndenge na ndenge oyo nsango na ye ezalaki kosakolama.

Bayuda oyo bakómaki bayekoli ya Yesu bazalaki kaka kosala Elekeli mbula na mbula, na ntembe te elongo na mabota na bango. (Kob. 12:​6-11, 17-20) Ntango liwa na ye ekómaki pene, Yesu ná bantoma na ye bakendaki na Yerusaleme. Kasi abengaki te bayekoli na ye nyonso oyo bazalaki na Yudea, na Galile mpe na Perea báya kosala fɛti ya Elekeli elongo na ye. Ezali polele ete Yesu alingaki kozala elongo na bantoma na ye na libaku yango. Ayebisaki bango: “Nazalaki na mposa makasi ya kolya Elekeli oyo elongo na bino liboso ete nanyokwama.”—Luka 22:15.

Asalaki bongo mpamba te. Yesu azalaki pene ya kokufa lokola “Mwana-Mpate ya Nzambe oyo azali kolongola lisumu ya mokili.” (Yoa. 1:29) Yango esengelaki kosalema na Yerusaleme, esika oyo bambeka ezalaki kopesama epai ya Nzambe banda kala. Liwa ya Yesu esengelaki komema kosikolama ya monene koleka kosikolama oyo eyaki na nzela ya mwana-mpate oyo Bayisraele balyaki na butu oyo babimaki na Ezipito. (1 Ko. 5:​7, 8) Liwa ya Yesu elingaki kosala ete bantoma zomi na mibale bákóma na kati ya moboko ya lisangá ya bokristo. (Ef. 2:​20-22) Likambo mosusu oyo ezali kobenda likebi ezali ete Yerusaleme engumba mosantu ezali na “mabanga 12 ya moboko” oyo “bankombo 12 ya bantoma 12 ya Mwana-Mpate” ekomami likoló na yango. (Em. 21:​10-14) Ya solo, bantoma ya sembo basengelaki kozala na mokumba ya ntina na kokokisama ya mokano ya Nzambe. Na yango, tokoki komona ntina oyo Yesu alingaki kozala kaka elongo na bango na Elekeli ya nsuka mpe na molulu oyo abandisaki mbala moko na nsima: Bilei ya mpokwa ya Nkolo.

Bayekoli 70 ná bayekoli mosusu bazalaki te elongo na Yesu na bilei yango. Kasi, bayekoli nyonso oyo batikalaki sembo basengelaki kozwa matomba ya molulu oyo Yesu abandisaki, Bilei ya mpokwa ya Nkolo. Baoyo na nsima bakómaki bakristo oyo batyami mafuta na elimo bakɔtaki na kondimana mpo na bokonzi, oyo Yesu ayebisaki bantoma na ye na butu yango.—Luka 22:​29, 30.