Na ntango ya kala, kapita azalaki kokamba makambo ya ndako to biloko ya moto mosusu. Na bantango mosusu, maloba ya Ebre mpe ya Grɛki oyo ebongolami “kapita” esalelamaka mpo na kolobela mokɛngɛli to mokambi ya ndako.

Ntango Yozefe mwana ya Yakobo azalaki moombo na Ezipito, akómaki kapita na ndako ya nkolo na ye. Kutu nkolo na ye, oyo azalaki Moezipito, “atikaki biloko na ye nyonso na lobɔkɔ ya Yozefe.” (Eba. 39:2-6) Na nsima, ntango Yozefe ye moko akómaki moto monene na Ezipito, atyaki kapita moko mpo akamba ndako na ye.​—Eba. 44:4.

Na mikolo ya Yesu, mbala mingi bankolo-mabele bazalaki kofanda na bingumba oyo ezalaki mosika na bilanga na bango. Na yango, bankolo-mabele bazalaki kotya bakapita mpo bákambaka mosala makasi oyo bato bazali kosala mokolo na mokolo na bilanga yango.

Nani akokaki kozala kapita? Columella, mokomi moko ya Roma ya siɛklɛ ya liboso alobaki ete moombo oyo akotyama mokambi to kapita asengeli kozala “moto ya kotyela motema, oyo ayebi mosala malamu.” Asengeli kozala moto oyo azali na “bizaleli oyo ekosalisa ye asalela bokonzi na ye na bopɔtu te mpe na nkanza te.” Abakisaki ete: “Longola masɛngami nyonso wana​—asengeli kokanisa te ete ayebi makambo nyonso mpe asengeli kosepela ntango nyonso koyekola makambo ya sika.”

Liloba ya Nzambe esaleli ndakisa ya kapita mpo na kolobela makambo mosusu oyo esalemaka na lisangá ya bokristo. Na ndakisa, ntoma Petro alendisi bakristo ete, mayele oyo Nzambe apesi bango ‘básalela yango mpo na kosalelana lokola bakapita malamu ya boboto monene ya Nzambe.’​—1 Pe. 4:10.

Yesu ye moko alobelaki kapita moko na ndakisa oyo apesaki na Luka 16:1-8. Lisusu, ntango apesaki esakweli mpo na kolobela elembo ya kozala na ye lokola Mokonzi, Yesu ayebisaki bayekoli na ye ete akotya “moombo ya sembo mpe ya mayele,” to “kapita ya sembo.” Mokumba ya libosoliboso ya kapita yango ezali ya kopesa bayekoli ya Kristo bilei ya elimo oyo basengeli na yango na ntango oyo ya nsuka. (Mat. 24:45-47; Luka 12:42) Tozali na botɔndi mingi ndenge tozali na kati ya bato oyo bazwaka mikanda oyo ekómisaka kondima makasi, oyo kapita ya sembo abongisaka mpe abimisaka na mokili mobimba.