Mokanda ya liboso ya Samwele 3:1-21
-
Samwele andimami lokola mosakoli (1-21)
3 Na ntango wana, elenge Samwele azalaki kosalela+ Yehova mosala liboso ya Eli, kasi na mikolo yango, liloba ya Yehova ekómaki ya koluka; bimonaneli+ ezalaki mpenza te.
2 Mokolo moko, Eli alalaki na mbeto na ye, mpe miso na ye elɛmbaki; azalaki komona lisusu malamu te.+
3 Mwinda+ oyo ezalaki na ndako ya Nzambe ezalaki naino kopela, mpe Samwele azalaki kolala na tempelo*+ ya Yehova, esika Sanduku ya Nzambe ezalaki.
4 Bongo Yehova abengaki Samwele. Mpe ye ayanolaki: “Ngai oyo.”
5 Akendaki mbangu epai ya Eli mpe alobaki na ye: “Ngai oyo, mpo obengi ngai.” Kasi Eli alobaki: “Nabengi yo te. Zongá, kende kolala.” Bongo akendaki mpe alalaki.
6 Yehova abengaki lisusu ete: “Samwele!” Na yango, Samwele atɛlɛmaki mpe akendaki epai ya Eli mpe alobaki boye: “Ngai oyo, mpo obengi ngai.” Kasi Eli alobaki: “Nabengi yo te, mwana na ngai. Zongá, kende lisusu kolala.”
7 (Samwele ayebaki naino Yehova malamu te, mpo Yehova abandaki naino koyebisa ye liloba na ye te.)+
8 Na yango, Yehova abengaki lisusu mpo na mbala ya misato ete: “Samwele!” Bongo atɛlɛmaki mpe akendaki epai ya Eli mpe alobaki boye: “Ngai oyo, mpo obengi ngai.”
Bongo Eli asosolaki ete Yehova nde azalaki kobenga Samwele.
9 Na yango, Eli alobaki na Samwele boye: “Kende, lalá, mpe soki abengi yo, osengeli koloba ete: ‘Lobá, Yehova, mpo mosaleli na yo azali koyoka.’” Mpe Samwele akendaki mpe alalaki na esika na ye.
10 Yehova ayaki mpe atɛlɛmaki wana, mpe abengaki ye kaka ndenge abengaki ye liboso, ete: “Samwele, Samwele!” Na yango, Samwele alobaki ete: “Lobá, mpo mosaleli na yo azali koyoka.”
11 Yehova alobaki na Samwele boye: “Talá! Nakosala likambo moko na Yisraele, oyo soki moto ayoki yango, matoi na ye ekosala mpasi.+
12 Na mokolo yango, nakokokisa makambo nyonso oyo nalobaki mpo na Eli mpe libota na ye, banda na ebandeli tii na nsuka.+
13 Osengeli koyebisa ye ete nazali kokatela libota na ye etumbu mpo na libela, mpo na masumu ya bana na ye. Ayebi malamu+ ete bana na ye bazali kolakela Nzambe mabe,+ kasi azali kopesa bango etumbu te.*+
14 Yango wana, nalapi ndai mpo na libota ya Eli ete masumu oyo bato ya libota na ye basali ekolimbisama soki moke te, ata soki bapesi mbeka to makabo.”+
15 Samwele alalaki tii na ntɔngɔ; na nsima afungolaki baporte ya ndako ya Yehova. Samwele azalaki kobanga koyebisa Eli emonaneli yango.
16 Kasi Eli abengaki Samwele ete: “Samwele, mwana na ngai!” Ayanolaki: “Ngai oyo.”
17 Atunaki ye boye: “Nsango nini ayebisi yo? Nabondeli yo, kobombela ngai eloko te. Tiká Nzambe apesa yo etumbu ya makasi soki obombeli ngai ata liloba moko na maloba nyonso oyo ayebisi yo.”
18 Na yango, Samwele ayebisaki ye makambo nyonso, mpe abombelaki ye ata eloko moko te. Eli alobaki ete: “Ezali Yehova. Tiká asala oyo ezali malamu na miso na ye.”
19 Samwele azalaki se kokola, mpe Yehova ye moko azalaki elongo na ye+ mpe azalaki kokokisa* maloba nyonso oyo Samwele azalaki koloba na nkombo na ye.
20 Yisraele mobimba, banda na Dani tii na Beere-sheba, eyebaki ete Samwele andimami lokola mosakoli ya Yehova.
21 Mpe Yehova akobaki komonana na Shilo. Kuna nde Yehova azalaki komimonisa epai ya Samwele, kuna nde Yehova azalaki koloba na ye.+
Maloba na nse
^ Elingi koloba, tabernakle.
^ To, “azali kopamela bango te.”
^ Lil., “kokweisa te na mabele.”
